74
Tiri ufuŋ hetâtiekicnere kikefuŋzi numuwec
1 O Anutu, go wemocte bebehe sanaŋ behec‐nâpomeŋ?
Kimbeŋgere hosâczi wemocte sapagere lama guru jâpec‐jopahuc jukac?
2 Kikefuŋfâcge esecne rocjopameŋ jaŋere manasuc!
Fuŋfuŋfâcge juniŋte furi‐jeŋic bameŋ jaŋe hâcne.
Erâ Zioŋ tiki, ŋeŋe haege sakaremeŋ irec wâc manasuc!
3 Sesuctac foku fofone ewec i rârâ honec:
Râsi e tiri ufuŋko wiac hetâtie‐fârewec.
4 Râsifâcge jaŋe tiri hae ʒoŋagao owa sâko embiŋ,
jaŋe jaŋacne filac fârepie feha ma âkendâŋnembiŋ.
5 Motâc faicpec jâczi hendiŋ bakicne fowec,
i râriczi henʒaŋ qanʒaŋnembiŋ.
6 Erâ jâczi metâ basarickekicne doma rawec,
i râric â hamazi hezu henʒaŋ embiŋ.
7 Jaŋe tiri ufuŋge turuŋkepie ʒawec,
ʒâŋegere fic bâsâqore‐fârembiŋ.
8 Jaŋe mumbiŋ, “Nâŋâc omaec‐jopanʒepeneŋ,”
ehuc hae piicko nunumufic ʒoczi rike‐fârembiŋ.
9 Tirima‐nâŋec mocwâc mi doma rame honeŋgopeneŋ;
ŋondeŋ‐nâŋecko porofete moc mi junârekac;
eme wiac kecʒi mo dameŋko taraocmu i mi manaŋgopeneŋ.
10 O Anutu, râsi e wezimucko mururuc i beheocmu?
Kisâ e ʒâŋege musoriŋkehuc jaha juocmu me?
11 Go fuŋne weniŋucte akic‐jopakic?
Mefârege wemocte sakarekic?
12 Anutu go mârâc jaha Wofuŋ Sâko‐nane jumeŋ,
ehuc mâreŋŋic ŋondeŋko bâbâpiaŋ gie bajumec.
13 Go tâpirigezi hâwec bâtâcnemeŋ,
â ʒâkâŋte momori utune hefâuckemeŋ.
14 Go oâ qizecne qanʒaŋnemeŋ,
erâ biucne kâte qowi jaretec nâmbiŋ.
15 Go qânâ hefâucketec opâ ʒâŋe fuawec,
â opâ fifisine hezicketec kereŋkewec.
16 Go ʒoaŋte rune jukic â ŋafere iŋuc jaha,
goki hâcne mosa â ʒoaŋ râec‐jofameŋ.
17 Mâreŋ qaŋeŋne gokizia basanaŋke‐fâremeŋ;
hoemaŋ â ʒoaŋ dameŋ i goki wâc mutec fuawec.
18 Wofuŋ, go râsizi mu ruruc ekac irec manasuzemec,
ŋicguru hehesicnezi ʒâŋege musoriŋkeeŋgopieŋ.
19 Ŋicfâcge jaŋe râsi jaŋere meo mi râec‐jopazemec;
qarâ suriŋnefâcge jaŋere jujure ninikec mi ezemec.
20 Ʒâʒâficgere mana mezac ezemec;
haesoŋko sindaŋte toma bocjaha forakac.
21 Ro waha âte ejarekicne jaŋere faio mimi mi fezejec;
hapetac â qarâ suriŋne jaŋe ʒâŋege mumbiaŋkenʒepieŋ.
22 O Anutu, go faharerâ gahacne dâŋ ŋezickec;
hehesicne jaŋe ʒoaŋ ʒora mu ruruc egareeŋgopieŋ irec manasuc.
23 Râsifâcge jaŋere dâŋ ojoware mi nikecguoc.
Kisâfâcge jaŋere micʒonʒoŋ ʒuʒuhuc hefakac i manac.