77
Anutu esecne mâsi sâko bawec ere dapeŋko soŋkezo
1 No owa ruruckerâ Anutu wiracnekopac,
wiracnehuc mukopac, “Wâwâsic‐nane manac!”
2 No ʒârâ hâriŋ dameŋko Wofuŋ wira basac ecneekopac;
ŋafeo docke betaŋ tâmiric menane bafahareekopac,
maŋ qâqâtâc‐nanezi bâbâmiriŋ qikiŋneekac.
3 No Anuture manasurâ husehuc foekopac,
manatâc qâtâc ezo mupe maŋnane gâckeekac.
4 Ʒâŋe‐nane tâpâune bârâŋgeŋketec guŋ tâmiric foekopac,
maŋnanezi mezackekume dâŋezo eipieekopac.
5 Dameŋ esecne juwefukicne i bâjâpehuc
wiac fuawec i manasu‐fâreekopac.
6 No ŋafeo maŋnanezi mana wosâc eekopac
â mâro‐nanezi mana gufuc erâ ʒiŋuc wioekopac:
7 Wofuŋ e bebehe sanaŋ behec‐nâpokac me?
Âgo jauŋ mocwâc mi enâreocmu?
8 Aki anonoc‐ticne ʒicke sanaŋkewec me?
Mumupaŋ‐ticnere fârine omatac fuawec me?
9 Anutu e buuruc enâreocte nikeckewec?
Kimbeŋ‐ticnezi miriŋ‐ticne fitec qawec me?
10 Eme mupo, “Femicne mefâre‐ticne hetikiejec,
irec erâ bunane qâoriŋkekac.”
11 Wofuŋ goki mârâc gie bameŋ i manasupe,
jâmbomac, esecne mâsi bameŋ i honehuc ŋepe.
12 Giege baekic sasawa i mana biric epe,
wiac tâpirihec i mana wosâehuc jupe.
13 O Anutu, gore hata i tiri moc.
Anutu sâko‐nâŋec go iŋucne moc wena jukac?
14 Anutu go hâcne mâsi bapa Anutu,
ŋicne ŋicne jaŋere ŋondeŋko tâpirige bataniŋkemeŋ.
15 Tâpiri megezi ŋicfâcge firuec‐jopameŋ,
Jakobo â Josefe ŋokâfâc‐jekic jaŋe hâcne.
16 O Anutu, opâ jaŋe go honecgurâ fâfârembiŋ,
â ʒâkâŋ jaŋe honecgurâ ɋarac ɋarac qambiŋ.
17 Karorac jaŋe opâ hoŋkepie wahawec,
sambâŋzi ɋuŋ parandaŋ hewec,
tepe motecgezi ŋifec â ŋifec bâricnehuc wahambiŋ.
18 Mâŋâŋ ʒâkiriŋkeme ɋuŋgere fânâŋ fuawec,
bâbâriczi hae mâreŋ batamaewec,
mâreŋzi fâfârerâ ɋiɋiteckewec.
19 Hatage hâwec fofotâc âte rameŋ,
kikegezi ʒâkâŋ sâko fotâcnemeŋ,
eme sifu kike hatage mi honekicne.
20 Ŋicfâcge lama guru iŋucne jowac‐jopameŋ,
Mose â Aroŋ jahere meo hâcne.