76
Anutu mumuteŋkere saoreŋ
1 Juda mâreŋko Anuture fuŋne manakicne,
ʒâŋe‐ticne Israe mâreŋko bafaharekicne fokac.
2 Ŋeŋe juju‐ticne Jerusalem haeo bâfuakicne,
Zioŋ tikio fic hae‐ticne ŋekac.
3 Irec hâcne tepe motec qazu qanʒaŋ ewec,
erâ wâc sându maro â ʒikare wiac sasawa.
4 O Anutu, go bipinehec jâmbâŋ, ɋuŋɋasaŋgezi
tiki ŋeŋe sanaŋ siric‐jopakac.
5 Hâbi hâro jaŋe mafa mateŋ jowac rokicne,
jaŋe rândiŋkerâ guŋko utuckembiŋ,
ʒikare ŋicsaric sasawa mejeŋic betaŋkewec.
6 Jakobore Anutu goki hanec‐jopakutec
becâsic â keretac qiriŋmâc waha fombiŋ.
7 Jâmbomac, go hâhâwicne, kimbeŋgezi fahareme
mozi gore maio sâcne domaocmu?
8 Mumutara dâŋgezi sambâŋkonec fuame
mâreŋ e bipic tatara erâ niniŋkewec.
9 I Anutu goki mâreŋŋic ro waha âte ejarekicne
jaŋe bafic‐jopacmurâ dâŋ mutarazo faharemeŋ
dameŋ ira iŋuc fuawec.
10 Ʒikare nâfocne jaŋe mumbiaŋguniŋmu,
ŋic kimbeŋ‐jeŋiczi ŋerisieme mumuteŋ‐jeŋic eocmu.
11 Ŋoŋe Wofuŋ Anutu‐ŋeŋic taha bacneniŋte mupaŋkenʒepieŋ,
erâ mumupaŋ‐ŋeŋicte fârine bâfuanʒepieŋ;
ŋic rârec bârârec juraŋgopieŋ sasawa
ŋoŋe Anutu araŋ babacnene e taha bacnenʒepieŋ.
12 Eki micne bapa maŋfefe juŋgopieŋ
jaŋe bawahac‐jopaekac;
â mâreŋte ŋicwofuŋ juraŋgopieŋ
jaŋe wiac hâhâwicne ejareekac.