80
Wofuŋ e waiŋ qizec‐ticne Israe kikefuŋ heɋârezejec
1 Israere lama soŋaŋ, hazec râec!
Josefe guru lama iŋucne soŋaŋ‐jopaekic,
â kerubim jaŋere faicnao ŋeekic, go fua tâcnec!
2 Eferaim â Benjamiŋ â Manase jaŋere maio
hâbige hetec hume ware bafic‐nâpoc.
3 Anutu Tâpiri Ɋuŋɋasaŋ Wofuŋ, go heɋârec‐nâpoc;
ʒâŋe maigezi tamaeme biaŋ‐nâpozejec.
4 O Wofuŋ, Anutu Tâpiri Ɋuŋɋasaŋ Wofuŋ,
gurufâcge jaŋe numu‐gare‐bipiehapie
kimbeŋ qajareku mo dameŋko behecmu?
5 Goki mutec ʒâŋeuc‐jeŋiczi nânâ‐jeŋic ruacneha nâeŋgopieŋ,
ʒâŋeuczi nânâ opâ‐jeŋic eekac.
6 Goki mutec ŋicne ŋicne rârec‐nâpohuc jueŋgopieŋ
jaŋe nifepupu enâreeŋgopieŋ,
râsifâc‐nâŋec jaŋe mu gâgâwi enâreeŋgopieŋ.
7 Anutu Tâpiri Ɋuŋɋasaŋ Wofuŋ, go heɋârec‐nâpoc;
ʒâŋe maigezi tamaeme biaŋ‐nâpozejec.
8 Go Aigita mâreŋkonec waiŋ qizec unuckemeŋ,
erâ qâpuc guru jâpec‐jopahuc sarameŋ;
9 go mâreŋ bâburockecnemeŋ,
eme gâtâ barâ mâreŋ bârârâŋnewec.
10 Tieŋnezi tikine tikine mumuc qajarewec,
â qaŋeŋnezi jâmâzâc sâko sâockewec;
11 tieŋne sicneme ŋifec raku hâwec bâfuawec,
â ŋifec raku Eufrata opâ sâkoo fisiwec.
12 Eme wemocte qânâsac‐ticne hetâtiemeŋ,
eme sicne fotâc eeŋgopieŋ jaŋe
fârine batara nâc eeŋgopieŋ?
13 Kâtebec ŋicne jaŋe gâtâne qâfieeŋgopieŋ,
â kâte qowi jaŋe gupiŋne kitâcne nâc eeŋgopieŋ.
14 O Anutu Tâpiri Ɋuŋɋasaŋ Wofuŋ, mocwâc forisiec,
sambâŋkonec fitec wahame honec,
ehuc waiŋ qizec kecʒirec moc mana mezac ec.
15 Go hâcne ukicne mefâregezi sarameŋ,
go hâcne nuucne jauŋketec fua sokac ewec.
16 Jaŋe ʒoczi rikembiŋ erâ wâc hetâcnembiŋ;
gore kimbeŋ ʒâŋezi bâsirowec‐jopazejec.
17 Mefâregere ŋic ine megezi bâsâockezemec,
ŋicte ɋâric jauŋkehaŋ soka‐garewec e sabeckezemec.
18 Eme nâŋe mocwâc mi râpecgunʒepeneŋ;
juju ɋâri nârec, eme ʒâŋege muafeckenaŋmu.
19 Anutu Tâpiri Ɋuŋɋasaŋ Wofuŋ, go heɋârec‐nâpoc;
ʒâŋe maigezi tamaeme biaŋ‐nâpozejec.