81
Hombaŋ gae uŋdâŋ‐ticnehec
1 Anutu tâpiri‐nâŋec e gae bafehuc hecneniŋ,
Jakobore Anutu kiwaecneniŋ.
2 Mumuteŋ gae fuŋkehuc woŋgâŋ qaniŋ,
kulele marac faŋfaŋ â gita fâzeniŋ.
3 Mosa wahaocmuo qeŋ dâŋezejec,
erâ wâc hombaŋ‐nâŋecko, toŋ heocmuo mâmâc.
4 Israe kikefuŋ iŋuc mutâcnecnewec,
Jakobore Anutuzi mupaŋkewec.
5 Aigita mâreŋ maickehuc faharewecko,
Josefe sâcmutâc iŋuc ecnewec.
Dâŋ moc hazec furu‐nane manakopac:
6 “Ɋawegao tagi fowec i qatarapo,
megao sasac fowec i gowac ropo.
7 Ʒâicmaŋko wira‐naretec baficgupo,
ɋuŋ parandaŋte haesoŋko juhuc mana‐garepo,
Meriba opâo esâicgupo.
8 “Gurufâc‐nane, manahapie uŋ ŋazape;
Israe guru, dâŋnane mananʒapiŋ me!
9 Ŋoŋe nemu jabane moc mi bajunʒepieŋ,
guru moc jaŋere nemu mi dapecnenʒepieŋ.
10 Wofuŋ noni gore Anutu jukopac,
Aigita mâreŋkonec jowacgu warepo no hâcne;
go micge aŋketec bâfuse‐garepe.
11 “Ŋicfâc‐nane jaŋe ine dâŋnanere hazec mi râembiŋ;
Israe guru jaŋe micnane mi reŋkembiŋ.
12 Eme maŋsanaŋ‐jeŋicte faio fehuc mana‐jarepe,
jaŋacne mamana biri bâjâpembiŋ.
13 Jâi, ŋicfâc‐nane jaŋe hazec râe‐narenʒapiŋ!
Israe guru jaŋe nore hata âtenʒapiŋ me!
14 Eme noni râsifâc‐jeŋic biac bawahac‐jopazapo,
â menanezi kisâfâc‐jeŋic imac‐jopazac.
15 Eme Wofuŋte takic‐jopaekac jaŋe e mezarecnenʒapiŋ,
â ʒâic dameŋ‐jeŋiczi tatarane mi ezac.
16 Ŋoŋe ine waizeŋ uucne aŋac baŋacne
kâdoc qaŋarezapo,
â qânâonec baŋac gumeqiŋ‐ŋopazapo.”