83
Israe râsifâcne roroc eŋgopieŋ
1 O Anutu, go mi fâsâec,
Anutu, go niniŋkerâ dâŋemâc mi juc.
2 Honec me, râsifâcge ojowa qaŋgopieŋ,
qaisocgueŋgopieŋ jaŋe pepec eŋgopieŋ.
3 Jaŋe ŋicfâcge doc bacjopaniŋte dâŋ birickeŋgopieŋ,
sabec‐jopaekic jaŋe wiac ejareniŋte meo roroc eŋgopieŋ.
4 Muŋgopieŋ, “Ajoc, ŋicguru i omaec‐jopanaŋ,
eme Israe ʒâŋe somarezejec.”
5 Jâmbomac, jaŋe muc manac eku maŋ mocjaha embiŋ,
go râsi egarehuc ʒâʒâfic sanaŋ eŋgopieŋ:
6 Edom ŋicguru â Isimaere ɋâricfâc,
Moabi ŋicguru â Hagiri kikefuŋ;
7 Gebale â Amoŋ â Amaleke ŋic,
Filisa mâreŋ â Tiro hae rune;
8 eme Asiriazi jaŋerao wâc ʒuhuckekac,
eki hâcne Lotire ɋâricfâc neŋgoc ŋesiŋ ejarekac.
9 Go mârâc Midiaŋ wiac ecnemeŋ ijaha ejarezemec,
erâ Sisera â Jabiŋ Kisoŋ opâo ejactemeŋ iŋuc;
10 jaŋe Eŋdoro hae ŋifecnao bâsirowec‐jopatec,
sahac biuc‐jeŋiczi mâreŋ irec guec ewec.
11 Ŋicbomboŋ‐jeŋic Orebe Ʒebe jahe iŋucne enʒepieŋ,
â micnefâc‐jeŋic ine Ʒeba Ʒalimuna jahere sâc.
12 Jaŋe hâcne mumbiŋ, “Anuture gie hata
sakarepene nâŋâcne ezejec.”
13 O Anutu‐nane, goki mutec rehac hâmocne
me padi jawa mâŋâŋzi ficne sueekac iŋuc enʒepieŋ.
14 Ʒoczi jâckâte ʒâseŋkeekac,
â ʒocbâruŋzi sopâc tiki bârârâŋneekac,
15 irec sâc bâbâricgezi jâpec‐jopazejec,
â mâŋâŋgezi bipic tatara bâfua‐jarezejec.
16 Mimizi ʒâŋe mai‐jeŋic bâsoŋkeme,
Wofuŋ, gore ʒâŋe wâsickenʒepieŋ.
17 Mimizi fai‐jeŋicko ferâ fohuc juzejec,
erâ ŋecjopakume omaenʒepieŋ.
18 Ʒiŋuc mananʒepieŋ: Wofuŋ ʒâŋe bajukomec,
goki mocjaha mâreŋte faio Femicne sâko juekic.