84
Wofuŋ fic hae‐ticnere ʒeri bubiaŋ
1 O Anutu Tâpiri Ɋuŋɋasaŋ Wofuŋ,
gore fic hae i aŋac baŋacne jâmbâŋ.
2 Maŋ qâqâtâc‐nanezi Wofuŋ gore hae ʒoŋare ecneekac,
erâ irec hâmohuc juekac.
Bunanezi â mesahac‐nanezi Anutu jujune
go ʒeri egarehuc gae hegareekac.
3 Qendeczi ficticne bâfuakac,
sawa hehetâczi hândâŋ motec eocte jawa‐ticne hekac,
i gore alatao hâcne, Anutu Tâpiri Ɋuŋɋasaŋ Wofuŋ,
Wofuŋ Sâko‐nane â Anutu‐nane.
4 Ficgao juhuc mumuteŋ gae hati hegareeŋgopieŋ,
jaŋere manape ʒerine ekac.
5 Ŋiczi Zioŋ hata mana maŋ ehuc
goraonec tâpiri bâfuaeŋgopieŋ,
jaŋere manape ʒerine ekac.
6 Jaŋe ʒâŋeuc wâneŋ fotâcnepie,
opâ ʒâŋe fua raekac,
â furic hoezi bâgunuckeekac.
7 Rahuc tâpiri ɋâricnezi ɋâricne bâfuaeŋgopieŋ,
eku Zioŋko Anutu gohec bâbâfuac eeŋgopieŋ.
8 O Wofuŋ, Anutu Tâpiri Ɋuŋɋasaŋ Wofuŋ,
go nunumu‐nane manac,
Jakobore Anutu, go hazec râec.
9 O Anutu, go maro‐nâŋec jukomeczi fitec wareoc,
wokemaŋ ruacnekicnege ʒâŋe mai‐ticne honec.
10 Gore hae ʒoŋao ʒoaŋ mocjaha juju izi fekac,
hae gâcnao ʒoaŋ wâŋ tauseŋ jujuzi ine wahakac;
Anutu‐nanere ficte motâc soŋaŋ dodoma,
irec manape aŋacne eha,
ŋic sindaŋne jaŋere ficko jujure takicnukac.
11 Wofuŋ Anutu e ʒoaŋ â maro hâcne,
e aki anonoc â ʒâŋe biŋe tahac‐nâpoekac.
Wofuŋ e siocmâc jueŋgopieŋ ŋic iŋucne jaŋe
wiac biaŋne moc mi sakare‐jareekac.
12 O Anutu Tâpiri Ɋuŋɋasaŋ Wofuŋ,
ŋic gorao roweckeekac ere manape ʒerine ekac.