88
Ŋic moc hucsâko fohuc mu huacbuc ewec
1 O Wofuŋ, Anutu‐nane, no ʒoaŋko wâsicguekopac,
â ŋafeo gore maio owackehuc foekopac.
2 Nunumu‐nanezi fâ bâfuacguzejec,
ki owa‐nanere hazec râezemec!
3 Maŋ qâqâtâc‐nanezi ʒâic manaku gapeckekac,
â juju‐nanezi hâmoc hae bâqiŋkekac.
4 Ŋiczi nore manapie nombâŋko hukopac ekac,
jujure tâpiri‐nanezi hesackekac.
5 Qâŋɋâŋne jaŋere ŋondeŋko fokopac tinac ekac,
qâhâmoc‐jopakicne ʒâŋeruŋko foeŋgopieŋ iŋucne tinac;
erâ megaonec batarac‐jopakicne,
eme mocwâc mi manasuc‐jopaekic jaŋe iŋucne.
6 Go biac mâreŋmaŋko tuŋnutec hukopac,
nombâŋ ʒorao, duŋdapâc maŋko.
7 Kimbeŋgezi mâretec ŋemacnukac,
â sirigezi qâurucnu‐fârekac.
8 Go âgofâc‐nane ejaretec bâec banareŋgopieŋ,
jaŋe nore manapie wiac hâhâwicne ekac;
motâc henarekicnere qiŋquŋkehuc fokopac.
9 Ʒâic busâqoczi enarekume ʒâŋe‐nane sisifucne ekac;
no ʒoaŋ sâc, Wofuŋ, go wâsicguhuc foekopac,
me jahec‐nane goraopec sicnehuc juekopac.
10 Go hâmokicne jaŋerao mâsi moc baekic me?
Qâqâtâc‐jeŋiczi faharerâ muteŋgueŋgopieŋ me?
11 Ʒâŋeruŋko aki anonoc moc mutaniŋkeeŋgopieŋ me?
Me hâmoc haeo jauŋ fârige moc musokazo?
12 Dapâcmaŋko mâsigere fuŋne manaeŋgopieŋ me?
 ninikec mâreŋko bâbâpiaŋge fua tâcnerâ foekac?
13 No ine, Wofuŋ, go wira wâwâsic egareekopac,
uupictea nunumu‐nanezi fâ bâfuacguekac.
14 O Wofuŋ, go wemocte suŋgiŋnuekic?
go wemocte ʒâŋe maige bâsoŋke‐nareekic?
15 No ɋieonecteaŋ huc ʒâichec juhuc hâmoc bâqiŋke jupac,
enaretec bipic tatara juwefuku maŋnane omaekac.
16 Kimbeŋgere ʒocbâruŋzi norao fisi fotâcnewec,
goraonec wiac hâhâwicnezi imacnuwec;
17 ʒoaŋ ʒora opâ rumi iŋucnezi bârârecnuwec,
eku qâurucnuwec.
18 Âgo qomafâc‐nane ejaretec dic banareŋgopieŋ,
ehame duŋdapâczi ju qâtec enarekac.