99
Tiri Anutu mumbiaŋkezo
1 Wofuŋ e guriŋ bakac; ŋicne ŋicne ɋarac ɋarac qaniŋ.
E kerubim faicnao ŋekacte mâreŋ e ɋiɋiteckeoc.
2 Wofuŋ e Zioŋko kâcɋene jukac,
e ŋicne ŋicne siric‐joparâ fekicne jukac.
3 Ʒâŋege kâcɋene â bipinehec i muafeckeniŋ.
E tiri moc!
4 Wofuŋ Sâko tâpirigehec, tiŋne rune,
go wiac sâckoa foocte qâzuckemeŋ.
Goki Jakoborao mumutiŋ â tiŋne juju
hatane basanaŋkemeŋ.
5 Wofuŋ Anutu‐nâŋec muafeckeniŋ,
eri ŋeŋe fuŋnao dunduŋ huniŋ.
E tiri moc!
6 Taha bapa jaŋere guruo
Mose â Aroŋ jucnepic.
Ʒâŋe‐ticne riwaseckembiŋ jaŋere guruo
Samuezi jucnewec.
Jaŋe Wofuŋ wâsickembiŋ,
eme micjeŋicko rowec.
7 E karorac ɋâfoŋnere maŋnao ŋehuc dâŋ jazawec;
jaŋe mumutaniŋ dâŋticne basanaŋkembiŋ,
â sâcmutâc dâŋticne jarewec i reŋkembiŋ.
8 O Wofuŋ Anutu‐nâŋec, go dâŋ bâtikie‐jaremeŋ,
go kiŋ bebehe Anutu jujaremeŋ,
erâ wâc hehesic‐jeŋicte okacne jaremeŋ.
9 Wofuŋ Anutu‐nâŋec e muafeckeniŋ,
erâ tiri tiki‐ticnao waha fodapeniŋ!
Wofuŋ Anutu‐nâŋec e tiri moc hâcne.