12
Sisakazi Juda mâreŋko râsi fisiwec
(Ŋic I 14:21–31)
1 Rehoboamte uucmaŋ i basanaŋkepie sanaŋkeme Rehoboam e Wofuŋte sâcmutâc dâŋ râpeckeme Israe ŋic jaŋe iŋuc jaha embiŋ.
2 Jaŋe Wofuŋ râpeckembiŋte Rehoboam e ŋicwofuŋ jume jara memoc eha Aigita ŋicwofuŋ Sisakazi Jerusalem hae râsi rocnehuc fisiwec.
3 E keretac wiac‐ticne 1 tauseŋ 200 â becâsicko rara ŋicfâc‐ticne 60 tauseŋ iŋuc rocjopame fisimbiŋ. Eme Aigita mâreŋkonec ŋic wowosec‐jopane tâmiric jaŋe Sisakahec jumbiŋ. Jaŋe Libia ŋic â Sukiŋic â Etiopia ŋic iŋuczi jumbiŋ.
4 Sisaka e Juda hae sacsanaŋ‐jeŋichec i ro rauc erâ juku Jerusalem haeo fisiwec.
5 Ehame porofete Semaja e Rehoboam â mefârofâc‐ticne Juda mâreŋko jumbiŋ jaŋe Sisakare hâwic‐jopame Jerusalem haeo tumaŋnerâ juhapie fisirâ ʒiŋuc jazawec: “Wofuŋ e ʒiŋuc mukac: ‘Ŋoŋe râpecnumbiŋ, irec no wâc râpec‐ŋopahuc Sisakare meo râec‐ŋopakopac.’ ”
6 Iŋuc jazame Israe ŋic jaŋere fekicnefâc â ŋicwofuŋ jaŋe rumehuc mumbiŋ, “Wofuŋ e tiŋne rune.”
7 Iŋuc epie Wofuŋzi honerâ Semaja ʒiŋuc âzâcnewec: “Jaŋe rumeŋgopieŋ irec no mi bâsirowec‐jopahuc akic‐jopapemu. Erâ kimbeŋ‐nanezi fâre wahame Sisakazi Jerusalem hae mi bâsirowezejec.
8 Erâ jaŋe sifu ere kiŋaŋ qaqafâc juniŋmu. Iŋuc juhuc nore kiŋaŋ qaqa gie â mâreŋ sâc irec ŋicwofuŋ jaŋere kiŋaŋ qaqa gie irec fuŋne hone mana tarac enʒepieŋ.”
9 Irec Aigita ŋicwofuŋ Sisaka e Jerusalem hae râsi rocnehuc fisiwec. Ehuc Wofuŋ ufuŋ‐ticnere ʒeŋaŋ â ŋicwofuŋ ficticnere ʒeŋaŋ erâ wâc wiac gâcne sasawa i mâmâc bawise‐fârewec. Erâ Salomozi mume golzi maro bambiŋ i wâc iŋuc jaha bawisewec.
10 Ehame ŋicwofuŋ Rehoboam e irec okacne aeŋ bâbâroŋzi maro barâ momori fuŋfuŋfâc‐ticne jaŋere micnefâc ŋicwofuŋ ficticnere motâc soŋaŋkehuc domambiŋ jaŋere meo râewec.
11 Eme ŋicwofuŋ e Wofuŋte ufuŋko raʒi jujec sâc momori fuŋfuŋfâc‐ticne jaŋe maro rorâ bâjâpe jumbieŋ, ehuc mocwâc bârisierâ momori fuŋfuŋfâcne jaŋacne ficko râepie ŋejujec.
12 Rehoboam e rume‐jâmbâŋkewecte Wofuŋte kimbeŋzi ima gie sâko mi bawec. Ehame Juda mâreŋko jupie sâcke‐fârewec.
13 Irec ŋicwofuŋ Rehoboam e Jerusalem haeo ŋicwofuŋ jusanaŋkewec. E jara‐ticne 41 bazurâ fuŋkerâ ŋicwofuŋ ewec. Erâ Jerusalem haeo juhame jara 17 tarawec. Hae i Wofuŋ e jahac ʒâŋe‐ticne ira foocte Israe ŋic gurune gurune jaŋeraonec bâwosâewec. Rehoboam neŋgoc‐ticne i Amoŋ ŋokac moc ʒâŋene Nama.
14 Rehoboam e Wofuŋ wira basac ecneocte maŋticne mi domawecte wiac repicne ewec.
15 Eme Rehoboamzi wiac sasawa ebac ewec i fuŋnaonecteaŋ ninic sininic jaha porofete Semaja â findaŋdâŋ mumu ŋic Ido jahere binaŋ qâhâc papia qizecko qâreŋke‐fârekicne. Eme Rehoboam â Jeroboam jaherao ʒikazi sueme sue fowarewec.
16 Juku Rehoboam e apa ŋosafâcne jaŋerao ʒuhuckehuc hâmome Dawidire hae qizecko duckembiŋ. Ehame ŋokâ‐ticne Abiazi tucticne qarâ ŋicwofuŋ juwec.