13
Abiazi ŋicwofuŋ juwec
(Ŋic I 15:1–8)
1 Jeroboam e ŋicwofuŋ jume jara 18 eha Abiazi fuŋkerâ Judaŋic qaŋeŋ‐jopahuc ŋicwofuŋ ewec.
2 Ehuc Jerusalem haeo jara jahec â moc juwec. E neŋgoc‐ticne i Gibea hae rune Uriele ere otâ ʒâŋene Mikaja. Eme Abia â Jeroboam jaherao ʒikazi ʒuhuckeme ʒuhuc fowarewec.
3 Eme Abia e momori ŋic bâwosâec‐jopakicne ʒikafac jâmbâŋ 400 tauseŋ rocjopame ʒikao rambiŋ. Ehame Jeroboam e iŋuc jaha ehec qaqac enicte ŋic bâwosâec‐jopakicne momori wânʒâŋ 800 tauseŋ rocjopame birickembiŋ.
4 Eme Abia e Eferaim tiki mâreŋko tiki moc ʒâŋene Zemaraim ira domahuc muwec, “O Jeroboam â Israe ŋic sasawa ŋoŋe mananiŋ.
5 Israere Wofuŋ Anutu e Israe ŋic qaŋeŋ‐jopahuc juju i Dawidi â ɋâricfâc‐ticne jaŋehec ʒâʒâfic sanaŋ moc ehuc tahac‐jopawec i mi manaeŋgopieŋ me?
6 Salomore kiŋaŋŋic Nebatere ŋokâ Jeroboam hâcne eki ine fekicne‐ticne Dawidire ŋokâ Salomo maŋrâŋgeŋ bâfuacnewec.
7 Eme Rehoboam e motec ɋârire râsi sâcne mi sanaŋke‐jareha ŋic repic qapicne jaŋe Jeroboamtao tumaŋnerâ juhuc Salomore ŋokâ Rehoboam e râsi ecnembiŋ.
8 “Nâŋe ŋic guru sâko juŋgopeneŋ, erâ Jeroboamzi bulimakao motecnere hawari golzi ɋâŋ bacjofawec bajuŋgopeneŋ, irec sâcne sanaŋkerâ Wofuŋte uucmaŋ i Dawidi ŋokâfâcne jaŋere meonec jowac ronaŋmu, ŋoŋe iŋuc moc mupie.
9 Ŋoŋe Aroŋte ɋâricfâc, Wofuŋte taha bapafâc hâcne â Lewiŋic jâpec‐jopambiŋ. Ehuc mâreŋ gâcne irec ŋic gurune gurune jaŋere sâc jaha ehuc ŋoŋe ŋaŋacne taha bapafâc âkendâŋ‐jopambiŋ. Ehame ŋic moc e bulimakao ŋicnezi motecne moc â lama ŋicne 7 bacjopa fisime ŋoŋe e nemu jabanere taha bapa erâ juocte mutirieŋgopieŋ hâcne.
10 Nâŋere Wofuŋ ine Anutu, nâŋe e mi râpeckembeŋ. Nâŋerao Aroŋte ɋâricfâc taha bapa jaŋe Wofuŋ kiŋaŋ qacnehuc juŋgopieŋ â Lewiŋic jaŋe wâc gie‐jeŋicko juŋgopieŋ.
11 Jaŋe qowi bâzi â hosâc âsu i furic owâc sâc Wofuŋ rikecneeŋgopieŋ. Ehuc poroŋ furu mukicne i tebo gol ɋaɋacnezi bakicne ira râeeŋgopieŋ â lambe jaŋe ŋafe sâc tamaeniŋte lambe dodoma i soŋaŋkeeŋgopieŋ. Nâŋe Wofuŋ Anutu‐nâŋecte mumutâc i soŋaŋkeeŋgopeneŋ, ŋoŋe ine e râpeckembiŋ.
12 Manaŋgopieŋ, Anutu e nâŋehec juhuc bânie‐nâreekac â taha bapafâc‐ticne jaŋe qeŋ qapie ŋoŋehec qaqac enaŋte qeŋjeŋichec juŋgopieŋ. O Israere ɋâricfâc, ŋoŋe apa ŋosafâc‐nâŋec jaŋere Wofuŋ Anutuhec qaqac mi enʒepieŋ; ŋoŋe sâcne mi sanaŋkeniŋmu hâcne.”
13 Eme Jeroboam e somâ guru moc râpefuŋ‐jeŋicko fisi‐jareniŋte sorec‐jopawec. Eme momori guru moc Judaŋic maic‐joparâ domahapie somâc‐jopambiŋ jaŋe ine râpefuŋ‐jeŋicko fisimbiŋ.
14 Ehame Judaŋic jaŋe râpefuŋ‐jeŋicko ʒâŋe firâ honepie ʒikazi orâŋ‐jopa‐fârewec. Eme jaŋe Wofuŋ wirâ wâwâsic ecnehuc taha bapa jaŋe qeŋ qambiŋ.
15 Eme Judaŋic jaŋe aŋara hehapie Anutuzi Jeroboam â Israe ŋic sasawa Abia â Judaŋic jaŋere ʒâŋe faio bawahac‐jopawec.
16 Bawahac‐jopame Israe ŋic jaŋe wisepie Anutuzi Judaŋic jaŋere meo râec‐jopawec.
17 Ehame Abia â ŋicfâcne jaŋe mâretec jopambiŋ. Irec Israe ŋic bâwosâec‐jopakicne 500 tauseŋzi hâmombiŋ.
18 Dameŋ ira Israe ŋic iŋuc hâcne bawahac‐jopakicne, â Judaŋic jaŋe ine apa ŋosafâc‐jeŋic jaŋere Wofuŋ Anuturao roweckembiŋte sanaŋkembiŋ.
19 Eme Abia e Jeroboam qa jâpec ecnehuc eraonec hae ʒiŋuc rowec: Bete â hae bozefâcne â Jesana â hae bozefâcne, erâ Eforoŋ â hae bozefâcne.
20 Abiare dameŋko Jeroboamte tâpiri mocwâc mi fuawec. Eme juku Wofuŋzi qame hâmowec.
21 Abia e ine tâpirihec jaha juwec. Ehuc ŋonâŋfâc‐ticne 14 rocjopawec, â ŋokâfâcne 20 â otâfâcne 16, iŋuc jumbiŋ.
22 Eme Abiazi wiac gâcne ebac ewec â hata âtewec erâ dâŋ muwec i sasawa porofete Idore binaŋko qâreŋke‐fârekicne.