15
Asazi bâbâfirie gie bawec
(Ŋic I 15:13–15)
1 Anuture Mârozi Odedere ŋokâ Aʒaria neŋgoc ŋesiŋ ŋecnehame
2 Asa bâfuaocte rarâ bâfuahuc âzâcnerâ muwec, “Asa â Juda â Benjamiŋ ŋoŋe ʒeŋgoma hazec râeniŋ: Ŋoŋe Wofuŋhec juhapie eki wâc iŋuc jaha ŋoŋehec jukac. Ŋoŋe e wira basac ecneniŋmuo ine sâcne bâfuaniŋmu, â ŋoŋe e râpeckeniŋmuo ine eki wâc iŋuc jaha ŋoŋe râpec‐ŋopaocmu.
3 Israe ŋic jaŋe dameŋ ʒora jâmbâŋ Anutu tâmiric, me taha bapa moczi sâcmutâcte fuŋne jaza qazuc mi eha sâcmutâc dâŋ tâmiric juwarembiŋ.
4 Eme sisi hâhâŋ faio iŋuc juhuc risierâ Wofuŋ, Israere Anutu hâcne, e wira basac ecnehuc juku bâfuambiŋ.
5 Eme dameŋ ira mâreŋ ira ŋeŋe juju embiŋ jaŋerao sisi hâhâŋ sâkozi sâckerâ fowecte rarac wawarec embiŋ sâc wama moc mi bâfuambiŋ.
6 Anuturaonec ʒârâ hâriŋ fuŋne fuŋnezi fific bacjopawecte jaŋe fâuckerâ ŋic gurune gurune erâ juhuc rârâsi embiŋ â haene haene jaŋe wâc iŋuc jaha rârâsi embiŋ.
7 Â ŋoŋe ine hâbi hârohec junʒepieŋ! Meŋeŋic mi betaŋkezejec. Ŋoŋe gie‐ŋeŋicte fârine tofa bazu‐ŋarezo hâcne.”
8 Eme Asa e Odede ŋokâ‐ticne Aʒariare dâŋ manarâ ʒoɋachec jaha faharerâ ɋâŋ qâqâtâc repic qapicne Juda mâreŋko â Benjamiŋ mâreŋko, erâ Eferaim tiki mâreŋko hae ro rauc ewec ira doma rawec i bârârie‐fârewec. Ehuc Wofuŋte alata Wofuŋ ufuŋ‐ticnere hae gâŋgâŋ maickerâ ŋewec i bâpiaŋkewec.
9 Erâ Judaŋic â Benjamiŋ guru mecne, erâ wâc Eferaim, Manase â Simeoŋ guru jaŋeraonec gâcnezi mâmâc ŋondeŋ‐jeŋicko ŋic jaba jumbiŋ jaŋe qânusuc‐jopawec. Israe mâreŋkonec ŋic bocjaha jâmbâŋ jaŋe Wofuŋ Anutuzi Asahec juwec i honerâ hae mâreŋ‐jeŋic beherâ erao ʒuhuckembiŋ hâcne.
10 Jaŋe Asazi ŋicwofuŋ juhame jara 15 ewec, eme irec mosa jahec â moc ira Jerusalem haeo tumaŋne‐fârembiŋ.
11 Ehuc ʒikaonec mafa mateŋ wiac bawarembiŋ irecnec bulimakao 700 â lama 7 tauseŋ i ʒoaŋ ira Wofuŋ taha bâzi rikecnembiŋ.
12 Ehuc Wofuŋ apa ŋosafâc‐jeŋic jaŋere Anutu e maŋ â qâqâtâc‐jeŋiczi wira basac ecnehuc juniŋte ʒâʒâfic moc embiŋ.
13 Eme ŋic ŋokac socɋâri me ŋic ŋokac raŋɋa i me i moc e Wofuŋ Israere Anutu wira basac mi ecnewecko ine hâmocko râezo mujomirembiŋ.
14 Jaŋe aŋara hehuc owa kâcɋene owackerâ qeŋ jâmbâŋ â bulimakao ʒuŋezi qeŋ bakicne i qahuc Wofuŋtao mujomirembiŋ hâcne.
15 Judaŋic ʒeŋgoma jaŋe mumupaŋ irec ʒeri embiŋ. Jaŋe maŋzi mana ʒakiehuc mujomirembiŋ â ʒoɋachec wira basac ecnembiŋ, erâ wâc Wofuŋzi iqic‐joparâ wama sâko tahac‐jopawec irec mâmâc ʒeri bari embiŋ.
16 Erâ ŋicwofuŋ Asa e neŋgoc‐ticne Makazi Asera nemure ɋâŋ qâqâtâc repicne barâ bawecte ŋokac wofuŋ mi juocte bârâriewec wâc. Ehuc ɋâŋ qâqâtâc‐ticne i henʒaŋ qanʒaŋnerâ Kidoroŋ opâo rikewec.
17 Â furu mâreŋ ine Israe mâreŋko mi bârârie‐fârekicne. Erâ Asa e juwec sâc sifu maŋticne bahac fâsâc fowec.
18 Eme Asa e mamac‐ticnere â e jahacne taha bâtirikicne siliwa â gol â râqâc i bafisirâ Anuture ufuŋko râewec.
19 Eme wama fuarâ fohame juku Asa ŋicwofuŋ juju‐ticnere jara dameŋ 35 tarawec.