16
Asa â Beŋhada jahe ʒâʒâfic epic
(Ŋic I 15:16–24)
1 Asazi ŋicwofuŋ juhame jara 36 ewec dameŋ ira Israe ŋicwofuŋ Basazi Judaŋic râsi rojarehuc ferâ Rama hae bawec. E ŋic i me i moczi Juda ŋicwofuŋ Asarao rac warec mi eniŋte iŋuc ewec.
2 Eme Asa e Wofuŋ ufuŋ‐ticnere kânoŋko â ŋicwofuŋ ficte kânoŋko siliwa â gol fowec i rorâ ʒiŋuc muhuc Siria ŋicwofuŋ Beŋhada e Damasko haeo juhame râecneme rawec:
3 “Mamac jahec‐nâhec jaherao ʒâʒâfic fowec irec sâc nâhâc ʒâʒâfic moc bâfuazeperec. Irec no siliwa â gol râe‐garekopac i honezemec. Erâ go rorâ Israe ŋicwofuŋ Basahec ʒâʒâfic‐ŋekic fokac i hetâcnezemec. Iŋuc etec no behecnuzejec.”
4 Iŋuc mume Beŋhada e ŋicwofuŋ Asare dâŋ manarâ Israe hae râsi rojareniŋte momorifâcne jaŋere micne sorec‐jopawec. Eme jaŋe rarâ hae ʒiŋuc ro rauc embiŋ: Ijoŋ, Daŋ â Abe‐Maim, erâ Naftali mâreŋte rowaŋ hae sasawa i mâmâc.
5 Eme Basa e biŋe i manarâ Rama hae bahuc juwec i beheme forâ fowec.
6 Ehame ŋicwofuŋ Asa e Judaŋic sasawa rocjopame jaŋe Basazi Rama hae bahuc qânâ â katapa rome fewec i ropie rawec. Eme wiac izi Geba â Mizipa hae bawec.
7 Eme dameŋ ira findaŋdâŋ mumu ŋic Hanani e Juda ŋicwofuŋ Asarao fisirâ ʒiŋuc âzâcnewec: “Go Siria ŋicwofuŋtao roweckehuc Wofuŋ Anutugerao mi roweckemeŋte Siria ŋicwofuŋte momori guru jaŋe goraonec wiseŋgopieŋ.
8 Eme Etiopia ŋic â Libia ŋic jaŋe momori guru sâko jâmbâŋzi keretac â becâsicko rara ŋicfâc‐jeŋic bocjaha jâmbâŋ wâc fisimbiŋ. Ehame go sifu Wofuŋtao siŋkemeŋte eki megao râec‐jopawec.
9 Wofuŋ e ŋic maŋjeŋic erao râepie foekac jaŋe tâpiri‐ticne jowatuocte mâreŋ sâko mâreŋ ira ʒâŋe fime rac warec eekac. Go wiac mutucne jâmbâŋ emeŋ, irec dameŋ ʒi fuŋkerâ jufecmu ira ʒikamaŋko jucmu hâcne.”
10 Iŋuc âzâcneme Asa e findaŋdâŋ mumu ŋicte aarickeme kâpâcwâru ficko râewec. Ere dâŋzi aaric bâfuacne‐jâmbâŋkewec hâcne. Erâ Asa e dameŋ ijaha ŋic ŋokac gâcne fific guguriŋ repic qapicne jâmbâŋ ejarewec.
11 Eme Asazi wiac sasawa ebac ewec irec binaŋ i fuŋnaonecteaŋ ninic jaha Juda â Israe Ŋicwofuŋ jaŋere Papia Qizecko qâreŋke‐fârekicne.
12 Eme Asa e ŋicwofuŋ juhame jara 39 ewec dameŋ ira kike‐ticne sâqoreme puriŋ jâmbâŋ ewec. Erâ huc i fuacneme sifu Wofuŋ wira basac mi ecnehuc riuc bapa ŋic jaŋeraonec badafic bâfuaocte babasa gie bawec.
13 Asa e ŋicwofuŋ juhame jara 41 ewec dameŋ ira apa ŋosafâc‐ticne jaŋerao ʒuhuckehuc hâmowec.
14 Hâmome âsu biaŋ fuŋne fuŋne râekupie katapa âsu mumundoŋ biaŋzi sâckerâ fowec ira râembiŋ. Erâ e jahac Dawidire hae qizecko ʒâŋeruŋ gufuwec ira duckembiŋ. Ehuc ere manasuhuc ʒoc sâko mako ruqepie ʒawec.