17
Josafatazi uucmaŋ‐ticne basanaŋkewec
1 Ehame ŋokâ‐ticne Josafatazi tucticne qarâ ŋicwofuŋ juwec. Ehuc Israe ŋic jaŋere erâ sanaŋke‐jâmbâŋkewec.
2 Ehuc Juda hae sacsanaŋ‐jeŋichec ŋerawec ira momori ŋic guruc‐jopa rawec â Juda mâreŋ soŋaŋkeniŋte momori ŋic râec‐jopawec wâc, erâ mamac‐ticne Asazi Eferaim hae rorawec ira wâc iŋuc jaha râec‐jopa rawec.
3 Erâ Josafata e mamac‐ticnezi hata fuŋkerâ âtewec ijaha âte rawecte Wofuŋzi ehec juwec. E Baali nemu wiac wira basac moc mi ejarewec.
4 Erâ Israe ŋic jaŋere hatao mi rahuc mamac‐ticnere Anutu wira basac ecnehuc ere sâcmutâc dâŋkoa âte rawec.
5 Irec Wofuŋzi meticnao uucmaŋ fowec i dope hutuŋ ecnewec. Ehame Judaŋic jaŋe taha wiac bafisicnehapie moneŋ mafa â ʒâŋe biŋe sâkohec ewec.
6 E maŋticnezi Wofuŋte hatao sasanaŋ bâfuawec. Iŋuc erâ ʒuhuckerâ Juda mâreŋko furu mâreŋ â Aserim nemuɋâŋ ŋerawec i bârârie‐fârewec.
7 E ŋicwofuŋ juha jara jahec â moc eme mefârofâc‐ticne ʒiŋuc jaŋe Juda hae sâc qaqazu gie baniŋte sorec‐jopawec: Beŋ‐Haili, Obadia, Ʒekaria, Netanele â Mikaja.
8 Eme jaŋehec Lewiŋic ʒiŋuc jaŋe rambiŋ: Semaja, Netania, Ʒebadia, Asahele, Semiramo, Jonataŋ, Adonia, Tobia â Tobadonia. Eme Lewiŋic i jaŋehec taha bapa ʒiŋuczi rapic: Elisama â Jehoram.
9 Jaŋe Wofuŋte sâcmutâc dâŋte papia qizec bajuhuc Juda mâreŋko qaqazu gie bambiŋ. Ehuc Juda hae sâc sâcke‐fârerâ rahuc ŋic ŋokac qazu‐jarembiŋ.
10 Ehame Juda mâreŋ rârec rârec mâreŋ forawec irec ŋicwofuŋ jaŋe Wofuŋte hâwic‐jopa sâqoreme Josafatahec ʒika mocwâc mi bâfuambiŋ.
11 Eme Filisa ŋic gâcne jaŋe Josafata taha bacnehuc siliwa â taha wiac gâcne bafisicnembiŋ. Ehame Araba ŋic jaŋe wâc iŋuc jaha lama ŋicne 7 tauseŋ 700 â noniŋ ŋicne 7 tauseŋ 700 jaha bafisi râcnembiŋ.
12 Iŋuc epie Josafata e ʒai ʒonʒoŋ sâkohec ewec. Ehuc Juda mâreŋko ficsanaŋ â rowaŋ hae barawec.
13 Eme Juda hae sâc ira rowaŋfic sâko ŋecne rawec. Ehame momorifâc‐ticne tâpiri wânʒâŋ‐jeŋicheczi Jerusalem haeo jumbiŋ.
14 Jaŋe garikiŋ sâc biri ʒiŋuczi jumbiŋ: Juda guruonec tauseŋ gurune gurune jaŋere micnefâc ʒiŋuc: Micne Adena e ŋic tâpiri ɋicwânʒâŋ‐jeŋichec 300 tauseŋ jaŋe micne bajarewec.
15 Eme ere râpeo micne Johanaŋ e 280 tauseŋ jaŋe micne bajarewec.
16 Eme ere râpeo ine Wofuŋte giere erâ buafec jaha fuawec, Ʒikirire ŋokâ Amasia hâcne, e ŋic tâpiri ɋicwânʒâŋ‐jeŋichec 200 tauseŋ jaŋe micne bajarewec.
17 Eme Benjamiŋ guru jaŋeraonec ine Eliada, e ŋic tâpiri ɋicwânʒâŋhec, eki ŋic 200 tauseŋ tepe â maro fai‐jeŋicko feme jumbiŋ jaŋe micne bajarewec.
18 Eme ere râpeo Joʒabadazi 180 tauseŋ ʒikare ʒawiehuc jumbiŋ jaŋe micne bajarewec.
19 Ŋic i jaŋe ŋicwofuŋ e jahac Juda mâreŋko hae sacsanaŋ‐jeŋichec ŋerawec ira ŋic gâcne râec‐jopa rawec jaŋerao ʒuhuckerâ juhuc ŋicwofuŋ kiŋaŋ qacnembiŋ.