34
Josiazi ŋicwofuŋ juwec
(Ŋic II 22:1–2)
1 Josia e jara‐ticne 8 bazurâ fuŋkerâ ŋicwofuŋ ehuc Jerusalem haeo juhame jara 31 tarawec.
2 E Wofuŋte ʒâŋe faio wiac sasawa ebac eme sâcke‐fârewec. Erâ apa‐ticne Dawidire kike hata i âte sifuckehuc raʒi âte wefu âte moc mi ehuc ijaha bâjâpe‐fârewec.
Josiazi eemasaŋ gie bawec
(Ŋic II 23:4–20)
3 E ŋicwofuŋ juhame jara 8 ewec, dameŋ ira motec ɋâri jaha juhuc fuŋkerâ apa‐ticne Dawidire Anutu e wira basac ecnewec. Eme jara namba 12 ira fuŋkerâ furu mâreŋ â Aserim nemuɋâŋ â ɋâŋ qâqâtâc wiac gâcne he fasaec ehuc tucne golzi ɋorockekicne Juda mâreŋko â Jerusalem haeo ima baocte giene bawec.
4 Ehame ŋic jaŋe ʒâŋe fai‐ticnaoa Baali nemu jaŋere alata ŋerawec i henʒaŋ qanʒaŋnembiŋ. Erâ fainao hosâc âsu ririkere alata ferâ ŋewec i wâc hetâtiembiŋ. Erâ Josia e Aserim nemuɋâŋ â ɋâŋ qâqâtâc gâcne jâczi me aeŋzi ba akic ekicne i iŋuc jaha hetâtierâ henʒaŋ qanʒaŋnekume uucne fuame taha bâzi rike‐jarehuc jumbiŋ ŋic i jaŋere ʒâŋeruŋko tiewec.
5 Erâ taha bapafâc‐jeŋic jaŋere siec wâc alata‐jeŋickoa rikehuc Juda mâreŋ â Jerusalem hae emasaŋke‐fârewec.
6 Ehuc Manase â Eferaim â Simeoŋ, erâ Naftali mâreŋko hae ŋerakac ira hae sâc rârec rârec wiac iŋucne forawec i wâc henʒaŋ qanʒaŋne‐fârewec.
7 Erâ alata hetâtierâ Aserim nemuɋâŋ â ɋâŋ qâqâtâc wiac gâcne i henʒaŋ qanʒaŋnekume uucne efârewec â Israe mâreŋko hosâc âsu ririkere alata ŋerawec i wâc iŋuc jaha hetâtie‐fârewec. Iŋuc efârerâ Jerusalem haeo risiewec.
Sâcmutâcte papia qizec bâfuakicne
(Ŋic II 22:3—23:3)
8 Eme Josia e ŋicwofuŋ juhame jara 18 ewec. Ehame mâreŋ â taha ufuŋte eemasaŋ gie bawec i tara‐fâreme Azaliare ŋokâ Safaŋ â hae irec mâreŋ soŋaŋ Maseja, erâ Joahaʒire ŋokâ dâŋ mumufua ŋic Joa jaŋe Wofuŋ Anutu‐ticnere ufuŋ i mocwâc bâpiaŋkeniŋte sorec‐jopawec.
9 Eme jaŋe taha bapa sâko Hilikiaro fisipie taha bapa â Lewiŋic jaŋe haesac motâc soŋaŋ juhuc Manase â Eferaim â Israe ŋic ʒanʒaŋne, erâ Juda â Benjamiŋ guru jaŋeraonec moneŋ ro qânusuc erâ Anuture ufuŋko râembiŋ i jarembiŋ.
10 Ehuc Wofuŋte ufuŋ ba bâpiaŋ eere soŋaŋ jumbiŋ jaŋe jarembiŋ. Eme jaŋe ine ufuŋ i ba bâpiaŋ eniŋte râepie ŋewec.
11 Ehame fic bapa ŋic gie furi jarembiŋ â fic bapa ŋic jaŋe qânâ he qâfâuc ekicne i mecne erâ wâc Juda ŋicwofuŋ jaŋe ufuŋte safatariŋ â wâtuŋ ʒaŋkeme hone qâoma embiŋ irec katapa wiac i mâmâc furine baniŋte jarembiŋ.
12 Eme ŋic jaŋe gie‐jeŋic manabâc tâmiric bambiŋ. Eme jaŋere soŋaŋ ine Merarire qâricfâc jaŋeraonec Lewiŋic jajahec Jahati â Obadia erâ Kohatire ɋâricfâc jaŋeraonec ŋic jajahec jaha Ʒekaria â Mesulam, iŋuc râec‐jopambiŋ. Eme Lewi guruonec musi bapa saric
13 jaŋe ficte jâcsiec hâpombiŋ â gie fuŋne fuŋne bambiŋ ŋic i jaŋere guriŋ bapa jumbiŋ. Ehame Lewiŋic gâcne jaŋe qâqâreŋ ŋic â micne, erâ motâc soŋaŋ jumbiŋ.
14 Jaŋe Wofuŋte ufuŋko moneŋ bafisikicne i rohapie taha bapa Hilikiazi Wofuŋte sâcmutâc dâŋ Mosere micko mufuakicne irec papia qizec i bâfuawec.
15 Eme Hilikiazi qâreŋŋic Safaŋ dâŋ ʒiŋuc âzâcnewec: “No Wofuŋte ufuŋko sâcmutâc dâŋte papia qizec bâfuapac.” Iŋuc murâ Hilikia e papia qizec i Safaŋ râcnewec.
16 Eme Safaŋ e papia qizec i ŋicwofuŋtao barawec, ehuc ʒuhuckerâ ŋicwofuŋ dâŋ binaŋ ecnehuc muwec, “Kiŋaŋ qaqafâcge jaŋe gie mujarekicne i baŋgopieŋ.
17 Jaŋe Wofuŋte ufuŋko moneŋ bâfuakicne i rofârerâ gie hone soŋaŋ ŋic â gieŋic jaŋere meo râembiŋ.”
18 Qâreŋŋic Safaŋ e iŋuc murâ ʒuhuckerâ ŋicwofuŋ dâŋ ʒiŋuc âzâcnewec: “Taha bapa Hilikiazi papia qizec moc narejec,” Safaŋ e iŋuc murâ ŋicwofuŋ wosecnewec.
19 Eme ŋicwofuŋ e sâcmutâcte dâŋ i manarâ ŋaqi qoruc‐ticne bâsuckewec.
20 Ŋicwofuŋ e iŋuc ehuc Hilikia â Safaŋte ŋokâ Ahikam â Mikare ŋokâ Abadoŋ, erâ qâreŋŋic Safaŋ â ŋicwofuŋ e jahacne kiŋaŋ qaqa, ʒâŋene Asaja, jaŋe dâŋ ʒiŋuc muhuc jaza sorec ewec:
21 “Apa ŋosafâc‐nâŋec jaŋe Wofuŋte dâŋkoa juhuc papia qizec ʒira dâŋ sasawa qâreŋkekicne fokac irec sâcko wiac ebac mi embiŋte Wofuŋte kimbeŋzi nâŋâcne faio fokac hâcne. Irec ŋoŋe rarâ papia qizec ʒira dâŋ fome bâfuakicne irec erâ no nahacne â Juda â Israe ŋic ʒanʒaŋne nâŋere erâ Wofuŋ mu wioc ecnenʒepieŋ.”
22 Ŋicwofuŋ e iŋuc jazahuc Hilikia â ehec jumbiŋ ŋic i jaŋe mâmâc sorec‐jopame Haserare ŋosa Salum Tokehati ŋokâ‐ticne ere ŋonâŋ Hulidazi Jerusalem hae ŋondeŋne moc ʒâŋene Dâkâne Jajahec ira porofete ŋokac juwec erao rapie dâŋ muc manac embiŋ. Ŋowe‐ticne Salum e ine ŋicwofuŋte ŋaqi soŋaŋ juwec.
23 Eme ŋokac eki ʒiŋuc jazawec: “Israere Wofuŋ Anutu e ʒiŋuc mukac: ‘Norao sorec‐ŋopajec ŋic e ra âzâcneniŋ,
24 Wofuŋ e ʒiŋuc mukac: Manakic, no sâwecdâŋ sasawa papia qizecko qâreŋke‐fârekicne Juda ŋicwofuŋ wose‐garembieŋ irec fârine hae mâreŋ â ŋecjucfâc‐ticne jaŋerao wiac hâhâwicne bâfuapemu.
25 Jaŋe no râpecnuhuc mejeŋiczi ɋâŋ qâqâtâc wiac bahuc no aaric bâfua‐narehuc nemu gâcne hosâc âsu rike‐jareeŋgopieŋ hâcne. Eme irec erâ kimbeŋ‐nane i hae mâreŋ ʒira hoŋkepe mi hâhâpo bâruŋkehuc jaha foocmu.
26 Eme ŋoŋe no mu wioc enareniŋte sorec‐ŋopajec Juda ŋicwofuŋ e ʒiŋuc âzâcnenʒepieŋ: Go dâŋ manameŋ irec Israere Wofuŋ Anutuzi ʒiŋuc mukac:
27 Go Anutu noni hae mâreŋ ʒi â ŋecjufâc‐ticne jaŋere dâŋ mupo i manarâ maŋge bârisierâ Anutu nore maio rumemec, erâ nore maio rumehuc ŋaqi qorucge bâsuckerâ mai‐naneo kiomecte no wâc iŋuc jaha mana‐garepo, Wofuŋ nore dâŋ iŋuc.
28 Manakic, no apa ŋosafâcge jaŋerao ʒuhucguhuc ʒâŋeruŋko wamao râecgupemu. Eha hae mâreŋ ʒi â ŋejucfâc‐ticne jaŋerao wiac repicne bâfuapemu i ʒâŋe fârigezi moc mi honecmu.’ ” Iŋuc jazame jaŋe risierâ dâŋ i ŋicwofuŋ âzâcnembiŋ.
29 Eme ŋicwofuŋ e dâŋ râehuc Juda â Jerusalem soŋaŋ hefârec‐jopame tumaŋnembiŋ.
30 Eme ŋicwofuŋ â Judaŋic â Jerusalem haere ŋecjucfâc, erâ taha bapa â Lewiŋic â ŋic ŋokac fekicne â wahakicne jaŋe ʒeŋgoma Wofuŋte ufuŋko fembiŋ. Ferâ ŋehuc manahapie ŋicwofuŋ e ʒâʒâficte papia qizec Wofuŋte ufuŋko bâfuakicne irâ dâŋ fowec i jaŋe manahapie wose‐fârewec.
31 Wose‐fârerâ ŋicwofuŋ e dodoma‐ticnao domahuc Wofuŋ bâjâpehuc maŋ â qâqâtâc‐ticnezi sâcmutâc â mumutaniŋ dâŋ â dâŋsanaŋ soŋaŋkerâ ʒâʒâficte papia qizecko dâŋ qâreŋkekicne fowec i ebac eocte Wofuŋte maio mupaŋkewec.
32 Iŋuc erâ Jerusalem haeo â Benjamiŋ mâreŋko jumbiŋ jaŋe mumupaŋ dâŋ irec sâcko juniŋte mujarewec. Ehame Jerusalem haere ŋecjucfâc jaŋe apa ŋosafâc‐jeŋic jaŋere Anuture ʒâʒâfic irec sâcko wiac ebac embiŋ.
33 Eme Josia e Israe ŋic jaŋere mâreŋko wiac mamakâcne forawec i bârârie‐fârehuc Israe mâreŋko jumbiŋ jaŋe ʒeŋgoma Wofuŋ Anutu‐jeŋic kiŋaŋ qacneniŋte mujarewec. Erâ ʒuhuckerâ juhame jaŋe apa ŋosafâc‐jeŋic jaŋere Wofuŋ Anutu e moc mi râpeckembiŋ.