35
Josiazi aakic hombaŋ mocwâc fuŋkerâ ŋewec
(Ŋic II 23:21–23)
1 Josia e Wofuŋte aakic hombaŋ moc Jerusalem haeo ŋewec. Ehame aakic hombaŋte lama i fufuŋke mosare ʒoaŋ gie bapa 14 ira qa hezuc embiŋ.
2 Eme Josia e taha bapa gie‐jeŋicko râec‐jopahuc Wofuŋte ufuŋko gie baniŋte fânoc hejarewec.
3 Ehuc Lewiŋic Wofuŋtao tirine juhuc Israe ŋic jaŋerao qaqazu gie bambiŋ jaŋe ʒiŋuc jazawec: “Ŋoŋe ʒâʒâfic katapa tirine i Dawidire ŋokâ Israe ŋicwofuŋ Salomozi ufuŋ bawec ira râenʒepieŋ. Ŋoŋe ɋawe‐ŋeŋicko reŋkerâ juju i mocwâc mi eniŋ. Ʒi ine Wofuŋ Anutu‐ŋeŋic â Israe ŋic ŋokacfâc‐ticne kiŋaŋ qajareniŋ.
4 Ŋoŋe Israe ŋicwofuŋ Dawidi â ŋokâ‐ticne Salomo jahere mumutâc i bâjâpehuc gurune gurune garikiŋ‐ŋeŋic sâc ʒaʒawie gie baniŋ.
5 Ehuc hae ʒoŋa tirine ira garikiŋ sâc soctofafâc‐ŋeŋic gurune gurune jaŋere âkehoc domanʒepieŋ. Erâ ŋic ŋokac garikiŋ gurune gurune jaŋere ŋondeŋ sâc Lewiŋic jaŋe doma ranʒepieŋ.
6 Eme aakic lama qa hezuc erâ ŋoŋe ŋaŋacnao eemasaŋ gie banʒepieŋ. Ehuc Wofuŋte dâŋ Mosere micko râekicne irec sâcko ebac eniŋte qomâfâc‐ŋeŋic jaŋere wâc bâmockenʒepieŋ.”
7 Iŋuc jazarâ Josia e ŋic ŋokac jumbiŋ jaŋere âkehoc aakic lama â noniŋ motecne 30 tauseŋ â bulimakao ŋicne 3 tauseŋ tahare biŋe râewec. Qowi i ŋicwofuŋ e jahacnaonec rorâ râewec.
8 Ehame mefârofâc‐ticne jaŋe wâc buafec jaha ŋic ŋokac â taha bapa â Lewiŋic jarembiŋ. Eme taha bapa sâko Hilikia â Ʒekaria â Jehiele jaŋe taha bâzi ririkere biŋe lama â noniŋ motecne 2 tauseŋ 600 â bulimakao ŋicne 300 iŋuc taha bapa jarembiŋ.
9 Ehame Lewiŋic fekicne Konania â ɋa jahec‐ticne Semaja â Netanele, erâ Hasabia â Jeiele â Joʒabada jaŋe taha bâzi ririkere biŋe lama â noniŋ motecne 5 tauseŋ â bulimakao ŋicne 500 iŋuc Lewiŋic jarembiŋ.
10 Eme giere wiac emoc bâmoc efârerâ ŋicwofuŋzi mutâcnewec irec sâcko taha bapa jaŋe dodoma‐jeŋicko domambiŋ â Lewiŋic jaŋe wâc iŋuc jaha guru‐jeŋicko domambiŋ.
11 Eme aakic lama jopapie Lewiŋic jaŋe sahac‐jeŋic âkehockehapie taha bapa jaŋe socjeŋic rorâ tiembiŋ.
12 Eme jaŋe Mosere papia qizecko dâŋ qâreŋkekicne irec sâcko ŋic ŋokac omane garikiŋ sâc gurune gurune jaŋere biŋe Wofuŋ taha bacnehuc qowi bâzi rikeniŋte bârâriepie ŋewec. Erâ bulimakao ŋicne i sâc ijaha embiŋ.
13 Eme aakic lama i mumutâc dâŋte sâcko ʒegoc rikembiŋ. Ehuc taha tirine ine kuʒio â hapecko â faŋko rikerâ izia ŋic ŋokac omane jaŋerao barambiŋ.
14 Eme Aroŋte ɋâricfâc taha bapa jaŋe qowi bâzi â wokemaŋ i rikehuc juhapie ŋafewecte jaŋe jaŋacne â taha bapa jaŋere biŋe i ʒâhec bâmockembiŋ.
15 Eme Asafare ɋâricfâc gae hehe ŋic jaŋe Dawidi â Asafa â Hemaŋ â ŋicwofuŋte findaŋdâŋ mumu ŋic Jedutuŋ jaŋe mutâcnembiŋ irec sâcko dodoma‐jeŋicko doma‐fârembiŋ. Erâ motâc soŋaŋ jaŋe wâc iŋuc jaha motâckoa doma rambiŋ. Jaŋe qomâfâc‐jeŋic Lewiŋic jaŋe bâmocke‐jarembiŋte gie‐jeŋic moc mi hetarambiŋ.
16 Irec Wofuŋte gie sasawa, aakic hombaŋ ŋeŋe â Wofuŋte alatao qowi bâzi ririke i ŋicwofuŋ Josiazi mutâcnewec irec sâcko ʒoaŋ ira emoc bâmoc efârembiŋ.
17 Eme Israe ŋic ijaha jumbiŋ jaŋe dameŋ ira aakic hombaŋ ŋehuc goreŋ sowa hombaŋ mâmâc ŋehapie ʒoaŋ gie bapa 7 tarawec.
18 Porofete Samue juwec irecnec fuŋkerâ juwefukupie Josiarao tarawec, dameŋ ŋondeŋ ira Israe maŋnao aakic hombaŋ iŋucne moc mi ŋembiŋ. Israe ŋicwofuŋ jaŋeraonec moczi moc Josia â taha bapa â Lewiŋic â Judaŋic â Israe ŋic hombaŋ ira jumbiŋ, erâ Jerusalem haere ŋecjucfâc jaŋe aakic hombaŋ ŋembiŋ iŋucne moc mi ŋewec.
19 Josia e ŋicwofuŋ juhame jara 18 ewec dameŋ ira hâcne aakic hombaŋ i ŋembiŋ.
Josia hâmowec
(Ŋic II 23:28–30)
20 Josia e taha ufuŋ ba bâpiaŋ ewec irec faicnao Aigita ŋicwofuŋ Nekozi Eufrata opâo Kakemisi hae rune jaŋehec qaqac eniŋte feme Josia e râsi rocnehuc rawec.
21 Ehame Neko e Josiarao kiŋaŋ sorec‐jopahuc dâŋ kecʒiŋuc muwec: “Juda ŋicwofuŋ, no wiac moc egarekopac me? No dameŋ ʒi gore râsi mi fisikopac, no kikefuŋ moc jaŋehec rârâsi‐nâŋec fokacte fisikopac. Erâ Anutuzi fâronehec epemurâ munarewec Anutu e nohec jukac, irec eki bâsirowecguzacte go râsi ecnekic i behezemec.”
22 Eme Josia e ine mi behehuc ehec qaqac enicte ʒoɋac ewec. Ehuc Anutuzi Neko dâŋ âzâcnewec i mume irec hazec mi rârâe Megido wâneŋko ʒikao rawec.
23 Ehame tepeŋic jaŋe ŋicwofuŋ Josia murumbiŋ. Murupie ŋicwofuŋ e kiŋaŋ qaqafâcne jazarâ muwec, “No rerepic jâmbâŋ murucnuŋgopieŋ irec bacnu wiseniŋ.”
24 Iŋuc jazame kiŋaŋ qaqafâcne jaŋe keretackonec rorâ reŋke rarâ keretac‐ticne mocko râerâ Jerusalem haeo barambiŋ. Eme hâmome apa ŋosafâc‐ticne jaŋere ʒâŋeruŋ gieo duckembiŋ. Duckerâ Judaŋic â Jerusalem hae rune jaŋe Josiare ki mamakuc embiŋ.
25 Eme Jeremia e Josiare makuc gae moc hefuawec. Ehame gae hehe ŋic ŋokac jaŋe Josiare manasuhuc gae makuc‐jeŋic hefuambiŋ i dameŋ ʒi hehuc juŋgopieŋ jaha. Eme gae hehe izi Israe maŋnao hata sanaŋ‐jeŋic ewec. Ehame gae i hâcne Makuc Papia Qizecko qâreŋkekicne.
26 Eme Josiazi wiac sasawa ebac ewec, â Wofuŋte sâcmutâc dâŋko qâreŋkekicme irec sâcko eehâmo gie bawec,
27 erâ eebapa‐ticne gâcne i fuŋnaonecteaŋ ninic jaha Israe â Juda Ŋicwofuŋ jaŋere Papia Qizecko qâreŋke‐fârekicne.