6
Taha ufuŋ mutirikicne
(Ŋic I 8:12–66)
1 Eme Salomozi ʒiŋuc muwec: “O Wofuŋ, go duŋdapâcko ŋeŋe juju ezore mukic.
2 Irec go ʒira ŋeŋe juju ecmurâ ficsâko moc ʒâŋe biŋehec bagarepo, go irec maŋnao ŋeŋe juju erahuc juzemec sanaŋ.”
3 Eme Israe kikefuŋ jaŋe woŋec doma‐fârehapie ŋicwofuŋzi fotikierâ jambuŋ‐jopawec.
4 Jambuŋ‐jopahuc kecʒiŋuc muwec: “Wofuŋ, Israere Anutu, e mumbiaŋkezo. Eki hâcne mamac‐nane Dawidi dâŋ kecʒiŋuc âzâcnehuc fârine bâfuawec:
5 ‘No Israe ŋicfâc‐nane Aigita mâreŋkonec jowac‐jopape wahambiŋkonecteaŋ Israe gurune gurune jaŋerao ʒâŋe biŋe‐nane fuaocte fic moc baniŋte hae moc mi bâwosâepo, erâ wâc ŋic moc ŋicfâc‐nane jaŋere fekicne juocte moc mi rowosâepo.
6 Aricne, no Dawidi e Israe ŋicfâc‐nane soŋaŋ‐jopaocte bâwosâepo.’
7 Eme mamac‐nane Dawidi e Wofuŋ, Israere Anutu sâsehuc fic moc bacneocte maŋkehuc juwec.
8 Wofuŋzi ine mamac‐nane Dawidi ʒiŋuc âzâcnewec: ‘Go ʒâŋe biŋe‐nanere fic moc bazo maŋkekic i honepe mamana biaŋne ekac.
9 Erâ sifu go gahac mi bazemec. Aricne, ŋokâge moc fua‐gareocmu eki ʒâŋe biŋe‐nanere fic moc fuaocte bazejec.’
10 Eme Wofuŋzi muwec irec fârine bâfuawec wâc. No mamac‐nane Dawidi âkehockehuc Israere eri ŋeŋeo ŋekopac. I Wofuŋzi muwec irec sâc fuawec. Eme no Wofuŋ, Israere Anutu ere ʒâŋe biŋe fuaocte ufuŋ moc bapo hâcne.
11 Ehuc ira ʒâʒâfic katapa hepo; katapa ira hâcne Wofuŋzi Israe ŋic jaŋehec ʒâʒâfic ewec i ŋekac.”
12 Eme Salomo e Wofuŋte alata irec maŋfuŋko Israe kikefuŋ jaŋere maio domahuc meticne qaratiewec.
13 Salomo e aeŋ bâbâroŋzi ʒae moc ʒoricne‐ticne kubi 5 â otecne kubi 5 jaha â hâŋne kubi 3, iŋuc barâ hae ʒoŋao heme ŋewec. Ehame irec faio fe domahuc Israe kikefuŋ jaŋere ʒâŋe faio dieŋzi herâ meticne sambâŋkopec fâretiŋnewec.
14 Ehuc ʒiŋuc muwec: “O Wofuŋ, Israere Anutu, sambâŋko me mâreŋko gore sâc Anutu moc mi jujâmbâŋkekac. Goki hâcne kiŋaŋŋicfâcge gore maio maŋ hâcbuc jueŋgopieŋ jaŋe maŋjauŋ fofo sanaŋ ejarehuc jaŋehec ʒâʒâfic emeŋ i mi hetâcneekic.
15 Go kiŋaŋŋicge, mamac‐nane Dawidi hâcne, e findaŋdâŋ âzâcnemeŋ irec fârine bâfuameŋ. Go mârâc miczi dâŋ mumeŋ i miŋecgac megezi fârine bâfuakomec.
16 O Wofuŋ Israere Anutu, go kiŋaŋŋicge mamac‐nane Dawidi findaŋdâŋ ʒiŋuc âzâcnemeŋ i mutec fârio qazejec: ‘Ŋokâfâcge jaŋe goki nore maio jumeŋ irec sâcko juhuc hata‐jeŋic aimuŋ jaha soŋaŋkehuc nore maio juniŋmuo ine noni mupe go ŋic moc Israere eri ŋeŋeo nore maio ŋeocte mi basacmu.’
17 O Israere Anutu, go irec hâcne kiŋaŋŋicge, mamac‐nane Dawidi hâcne dâŋ âzâcnemeŋ i mutec sanaŋkezejec.
18 “Jai, Anutu, go mâreŋko sâcne jucmu? Jâmbomac, sambâŋne sambâŋne jaŋe gore sâc mi ehapie go iŋucne sâkozi no fic ʒi bagarepo ira weniŋuc sâcne ŋeŋe juju ecmu?
19 O Wofuŋ Anutu‐nane, go kiŋaŋŋicge no miŋecgac gore maio wira wâwâsic ekopac irec hazec râerâ nunumu‐nane manazemec.
20 Go fic ʒirec ʒiŋuc mumeŋ: ‘I ʒâŋe‐nanere ŋeŋe hae ezejec’; irec go ŋafe ʒoaŋ sâc fic ʒira ʒâŋe fitec wahazejec â kiŋaŋŋicge no fic ʒira nunumu gie bahape mana‐narezemec.
21 Kiŋaŋŋicge no me Israe ŋicfâcge nâŋe fic ʒirâ wâsicgupene goki faic sambâŋko ŋeŋe haegao juhuc nunumu‐nâŋec manarâ aki anonoc enârezemec.
22 “Ŋic moczi âgo‐ticnerao bahac ŋemâcne bâfuame âgonezi mumupaŋ dâŋ muocte fânoc hecneme fic ʒira alatagere maŋfuŋko mumupaŋ dâŋ i muocte fisiocmuo
23 ine goki faic sambâŋko juhuc dâŋjekic manarâ kiŋaŋŋic jahecge jahere mumutara gie bahuc ŋic hehesicne eebapa‐ticnere sâcko okacne râcnezemec â bahacmâc juwec e ine tiŋne juju‐ticnere sâcko akickezemec.
24 “Israe ŋicfâcge jaŋe hehesic juhuc bugao bahapie go râsifâc‐jeŋic mana‐jaretec bawahac‐jopapie jaŋe maŋjeŋic bârisiehuc gorao risierâ ʒâŋege mutaniŋkehuc fic ʒira numu hefârec egareniŋmuo
25 ine goki faic sambâŋko juhuc dâŋjeŋic manarâ sâqocne‐jeŋic mutâmire‐jarehuc kâcɋenefâc‐jeŋic mâreŋ jaremeŋ ira mocwâc râec‐jopazemec.
26 “Jaŋe hehesic juhuc bugao bahapie goki sambâŋte motâc hetec hoe mi hehe mâc foocmu, eme goki bâtiŋ‐jopakomecte fic ʒira ʒâŋege mutaniŋkehuc sâqocne‐jeŋic beherâ nunumu gie baniŋmuo
27 ine goki faic sambâŋko juhuc dâŋjeŋic manarâ kiŋaŋŋicge no â ŋicfâcge Israe nâŋere sâqocne mutâmirehuc mutec ŋicfâcge mâreŋ‐jeŋic biŋe qajaremeŋ ira hoe hezejec. Go iŋuc ehuc hata biaŋne âte raniŋte qazu‐jareekic hâcne.
28 “Eme mâreŋ‐nâŋecko roroc me huc mimicne moc fuaocmu me nânâzi gieo hâmo qanʒaraŋ eocmu me hâpic me qoki guru sâko fisiniŋmu, me râsifâc‐nâŋec jaŋe fisirâ hae‐nâŋec moc somâ baniŋmu me wiac hâhâwicne me hucsâko moc fuaocmu
29 me wiac hâhâwicnezi ru sâc buʒâic bâfua‐nâreme ŋic izi me izi me Israe ŋicfâcge sasawa nâŋe numu hefârec egarehuc fic ʒira menâŋec nunumuo sicne‐garenaŋmuo
30 ine goki faic sambâŋko ŋeŋe haegao juhuc aki anonoc enârerâ ru sâc eebapa‐nâŋecte sâcko wiac enârezemec. Goki bucge mâreŋ ŋic sasawa maŋjeŋic hone taraekiczi maŋnâŋec honeekic wâc.
31 Irec erâ nâŋe kâcɋenefâc‐nâŋec mâreŋ tahac‐jopameŋ ira jufenaŋmu sâc araŋ bagarehuc junʒepeneŋ.
32 “Eme ŋic jaŋe ʒâŋe sâkoge â tâpiri ɋuŋɋasaŋgere biŋe mananiŋmu; ehame ŋic furune moc, Israe ŋicfâcne nâŋere guruo mi fuakicnezi mâreŋ ʒorickonec ʒâŋe biŋegere ehuc fisirâ fic ʒirâ nunumu gie baocmu
33 ine goki faic sambâŋko ŋeŋe haegao juhuc dâŋticne manarâ wiac irec me irec numu‐gareme manacnezemec. Go iŋuc etec ŋic gurune gurune mâreŋ sâc juraŋgopieŋ jaŋe ʒâŋe biŋege manarâ Israe ŋicfâcge nâŋe araŋ bagareeŋgopeneŋ irec sâc jaha araŋ bagarehuc ʒiŋuc mananʒepieŋ: Fic bagarepo ʒira ʒâŋe biŋege fokac.
34 “Eme go ŋicfâcge ira me ira sorec‐nâpotec râsifâc‐nâŋec jopanaŋte ʒikao rahuc hae sâko ʒi bâwosâemeŋ â ʒâŋe biŋege fuaocte fic bagarepo ʒirapec ʒâŋe fihuc gorao nunumu gie banaŋmuo
35 ine goki faic sambâŋko juhuc numu hefârec dâŋnâŋec manarâ dopec‐nâpozemec.
36 “Ŋic moczi hehesic tâmiric moc mi jukac, irec nâŋe hehesic moc bâfuarâ bugao banaŋmu ine goki aaric manahuc râsifâc‐nâŋec jaŋere meo râec‐nâpotec jaŋe mâreŋ‐jeŋic bembeŋko me ʒoricko fokac ira kâpâcwâruo bacnâpo raniŋmu.
37 Eme nâŋe kâpâcwâruo râec‐nâponiŋmu mâreŋ ira maŋnâŋec bârisiehuc gorao risierâ numu hefârec egarehuc ʒiŋuc munaŋmu: ‘Nâŋe sâqorehuc sindaŋ â hehesic bâfuambeŋ.’
38 Nâŋe iŋuc muhuc gorao risierâ râsifâc‐nâŋec kâpâcwâruo bacnâpo raniŋmu mâreŋ ira maŋ qâqâtâc‐nâŋec furu jaha gorao râehuc mâreŋ‐nâŋec kâcɋenefâc‐nâŋec tahac‐jopameŋ erâ hae sâko bâwosâemeŋ erâ ʒâŋe biŋege fuaocte fic bagarepo ʒirapec ʒâŋe fihuc nunumu gie gorao banaŋmuo
39 ine goki faic sambâŋko ŋeŋe haegao juhuc numu hefârec dâŋnâŋec manarâ dopec‐nâpozemec. Erâ hehesic â qaqatara bâfuarâ bugao bambeŋ i mutâmire‐nâre‐fârezemec.
40 O Anutu‐nane, ʒi ʒâŋe fihuc hazec râera ufuŋ ʒirec nunumu moc manac.
41 “O Wofuŋ Anutu, go fahare ŋeŋemana haegao rac,
go â tâpiri ʒâʒâfic katapage.
O Wofuŋ Anutu, taha bapafâcge tiŋne juju hejaretec huzejec,
â mitiŋicfâcge jaŋe ʒeri bari enʒepieŋ.
42 O Wofuŋ Anutu, wokemaŋ ruacge e mi suŋgiŋkezemec,
go kiŋaŋŋicge Dawidi aki anonoc ecne waremeŋ i manasuzemec.”