7
1 Salomo e numu tarame sambâŋkonec ʒoc waharâ qowi bâzi â taha wiac fowec i ʒâtâmirewec. Ehame Wofuŋte huriri qâreŋzi taha ufuŋ i fusucmawec.
2 Eme Wofuŋte huriri qâreŋzi ufuŋ‐ticne fusucmarâ fowecte taha bapa jaŋe Wofuŋte ufuŋko mi raʒimbiŋ.
3 Eme Israe ŋic jaŋe sambâŋkonec ʒoc wahawec â Wofuŋte huriri qâreŋzi taha ufuŋko fowec i mâmâc honerâ ʒâŋe mai‐jeŋic mâreŋko hetutuckehuc Wofuŋ numucnerâ daŋge âzâcnehuc ʒiŋuc mumbiŋ:
“Wofuŋ e uruc jauŋ‐ticnehec,
â aki anonoc‐ticne i fofo sanaŋ foekac.”
4 Iŋuc murâ ŋicwofuŋ â ŋic ŋokac sasawa jaŋe Wofuŋte maŋfuŋko taha bâzi rikembiŋ.
5 Ŋicwofuŋ Salomo e bulimakao 22 tauseŋ â lama 120 tauseŋ iŋuc taha bâzi rikewec. Ŋicwofuŋ â ŋic ŋokac jaŋe iŋuc ehuc Anuture ufuŋ mutirimbiŋ.
6 Taha bapa jaŋe dodoma‐jeŋicko domambiŋ â Lewiŋic jaŋe Wofuŋ musi bacneniŋte musire wiac barâ domambiŋ. Wiac i Wofuŋ e aki anonoc‐ticne fofo sanaŋ foekac irec ŋicwofuŋ Dawidizi dameŋ ira me ira Wofuŋ daŋge âzâcnewec sâc bawec; e wiac izi hâcne Wofuŋ ʒeri mumuteŋ ecnewec. Ehame jaŋere ŋifecnao taha bapa jaŋe qeŋjeŋic qahapie Israe ŋic sasawa jaŋe domambiŋ.
7 Eme Salomo e Wofuŋte ufuŋko hae ʒoŋa mai fowec i mutiriwec. Ehuc e jahac aeŋ bâbâroŋzi alata bawec izi qowi bâzi â taha bâzi â wokemaŋ irec sâc mi ewecte qowi bâzi â wama bâzire wokemaŋ i ira hâcne rikewec.
8 Eme dameŋ ira Salomo â Israe kikefuŋ sâko jaŋe Hamati haeonec raku Aigita opâo fisikac, mâreŋ ŋondeŋ irecnec fisirâ ʒoaŋ gie bapa 7 tiwâ bâzi sâko ehuc fombiŋ.
9 Eme ʒoaŋ gie bapa 8 ira tutumaŋ tatarane embiŋ. Jaŋe alata mutirihuc ʒoaŋ gie bapa 7 jumbiŋ â tiwâ bâzi ehuc ʒoaŋ gie bapa 7 jaha jumbiŋ hâcne.
10 Eme mosa 7 irec ʒoaŋ gie bapa 23 ira Salomozi ŋic ŋokac râec‐jopame hae‐jeŋic sâc râwiŋnembiŋ. Ehuc Wofuŋzi Dawidi, Salomo â Israe ŋicfâc‐ticne eebapa biaŋne jowatu warewec irec ʒeri â bubiaŋ manambiŋ.
Wofuŋzi Salomo mocwâc fuacnewec
(Ŋic I 9:1–9)
11 Salomo e Wofuŋte ufuŋ â ŋicwofuŋte fic i iŋuc hâcne bawec. E Wofuŋte ufuŋ â e jahacne fic baocte manasu biric ewec sâc baku batara‐fârewec.
12 Ehame Wofuŋzi ŋafeo Salomo fuacnerâ muwec, “No nunumuge manarâ ufuŋ ʒi taha bâzire ufuŋ moc muhuc no nahacne biŋe bâwosâekopac.
13 No sawa karoracko motâc hepe hoe mi heocmu, me ɋirikiŋ ejarepe fisi mâreŋ ʒi sâcke‐fâreniŋmu, me ŋicfâc‐nane jaŋerao hucukic mimicne bâfuapemu,
14 eme nore ʒâŋe bajueŋgopieŋ ŋicfâc‐nane i jaŋe rumerâ numuhuc hawari‐nane honeniŋte basacnuniŋmu, ehuc eebapa‐jeŋic sâqocnaonec risieniŋmuo ine no sambâŋko juhuc mana‐jarerâ kiŋjeŋic behepemu â mâreŋ‐jeŋic bâpiaŋkepemu.
15 Irec ufuŋ ʒira nunumu fuaocmu sâc ʒâŋe fifi â hazec rârâe jupemu.
16 No miŋecgac ufuŋ ʒira ʒâŋe‐nanezi raŋɋa raŋɋa foocte bâwosâehuc mutirikopac hâcne. Eme ʒâŋe‐nane â maŋnane i dameŋ sâc ʒira foocmu.
17 Â go ine mamacge Dawidizi juwec irec sâc jaha nore maŋfuŋkoa juhuc dâŋsanaŋ â mumutâc dâŋ gaza mutâc epo irec sâcko ebac ecmuo
18 ine no mamacge Dawidihec ʒâʒâfic ehuc ʒiŋuc mupo irec sâcko eri ŋeŋege dope hutuŋ ecnepemu: ‘Ŋic moczi Israe ŋic ŋoŋe qaŋeŋ‐ŋopaocte moc mi basaniŋmu.’
19 “Ŋoŋe ine râpecnurâ dâŋsanaŋ â mumutâc dâŋnane mai‐ŋeŋicko râepo i iŋuc jaha râpeckehuc ra nemu gâcne dape‐jareniŋmuo
20 ine no mâreŋ ŋarepo ʒirecnec qâunuc‐ŋopapemu. Erâ ufuŋ ʒira nore ʒâŋe biŋe foocte mutiripo i ʒâŋe mai‐naneonec tuŋkepe raocmu, eme ŋicne ŋicne jaŋe ufuŋ ira iticnehuc qâqiŋ qarâ âke sisic dâŋ ecneniŋmu.
21 Ehame ufuŋ ʒâŋe biŋe rara sâkonehec ʒi hatapecne izi me izi fotâcnehuc hone warec erâ ʒiŋuc wionʒoŋgopieŋ: ‘Wofuŋzi wemocte hae mâreŋ â ufuŋ ʒi wiac iŋucne ejactewec?’
22 Jaŋaczia iŋuc wiohuc ʒiŋuc munʒoŋgopieŋ: ‘Jaŋe Wofuŋ Anutu‐jeŋiczi kâcɋenefâc‐jeŋic Aigita mâreŋkonec jowac‐jopa wefuwec e beherâ nemu gâcne jaŋerao qohotarâ numu‐jarehuc kiŋaŋ qajarembiŋte Wofuŋ Anutu‐jeŋiczi wiac hâhâwicne keci sasawa bâfua‐jare‐fârewec.’ ”