9
Seba mâreŋte ŋokac wofuŋzi Salomo iqickewec
(Ŋic I 10:1–13)
1 Eme Seba mâreŋte ŋokac wofuŋzi Salomore ʒâŋe biŋe manarâ dâŋ herâricnao esâickeocte Jerusalem haeo fisiwec. Erâ kikefuŋfâc‐ticne guru sâko jâmbâŋ â kamelefâc‐ticne jaŋe nânâ ba bâziziwec eere wiac, erâ wâc gol bocjaha jâmbâŋ â qânâ furi sâko bapie fisiwec. Eme e Salomorao fisirâ ehec dâŋ dâŋ ezore maŋkewec i âzâcne‐fârewec.
2 Ehame Salomozi wiwio‐ticnere okacne bâtikie‐fârewec. E wiwio irec me irec okacne bârisieocte moc mi bititiewec hâcne.
3 Eme ŋokac wofuŋ e Salomore maŋɋârâŋ â fic bawec,
4 tebo‐ticnao nânâ fowec â kâcɋenefâc‐ticne e orâŋ bârâŋ ecnerâ ŋembiŋ, erâ kiŋaŋ qaqafâc‐ticne jaŋe ŋaqi biaŋne rojuhuc kiŋaŋ qacnembiŋ â waiŋ soŋaŋfâc‐ticne gie‐jeŋic bambiŋ â Wofuŋte ufuŋko qowi rikehuc juwec, wiac i hone‐fârerâ maŋne omaewec.
5 Eme ŋicwofuŋ ʒiŋuc âzâcnewec: “No mâreŋ‐naneo juhuc eebapagere â maŋɋârâŋgere biŋe bâroŋ manapo i fârine ʒine hâcne bâfuakopac.
6 No biŋege sawa manahuc manape fârine mi ewec. Miŋecne no nahac fisirâ ʒâŋe fâri‐nanezi qame honehuc ʒiŋuc manakopac: Jaŋe dâŋ binaŋ huŋtuc sawa enarembiŋ, maŋɋârâŋge dâkâne sâko i mi naza‐fârembiŋ.
7 Ŋicfâcge â kâcɋenefâcge dameŋ sâc gore maio domahuc maŋɋârâŋgere dâŋ mana sakac eeŋgopieŋ jaŋere manape ʒerine ekac!
8 Wofuŋ Anutuge e mumbiaŋkezo! Wofuŋ Anutuge e gore ecneme goki ŋicwofuŋ ehuc eri ŋeŋe‐ticnao ŋecmurâ hecguwec. Erâ Anutuge e Israe ŋic maŋjauŋ ejarehuc dope hutuŋ ejareme jurahuc juniŋte â tiŋne juju â eebapa biaŋne â fâretiŋkoa ŋic jowac‐jopahuc jucmurâ ŋicwofuŋ‐jeŋic âkendâŋguwec.”
9 Iŋuc murâ ŋicwofuŋ gol ŋemâc‐ticne 120 â nânâ ba bâziziwec eere wiac bocjaha jâmbâŋ â qânâ furi sâko tahackewec. Eme Seba mâreŋte ŋokac wofuŋzi ŋicwofuŋ Salomo nânâ ba bâziziwec eere wiac tahackewec irec sâc moczi moc ʒâhec mocwâc mi bafisiwec.
10 Erâ wiac i sawa mâcne, Hiramte kiŋaŋ qaqafâc â Salomore kiŋaŋ qaqafâc jaŋe Ofiri mâreŋkonec gol â kioŋjâc â qânâ wiac furi sâko bafisimbiŋ wâc.
11 Eme kioŋjâc izi Wofuŋ ufuŋ‐ticnere riri â e jahacne ficte riri i bawec. Erâ jâc izi gae hehe ŋic jaŋere gita kulele wiac bawec wâc. Juwicnao wiac iŋucne Juda mâreŋko moc mi honekicne.
12 Eme ŋicwofuŋ Salomo e Seba mâreŋte ŋokac wofuŋzi wiac i me i irec aŋac manarâ muwec sâc tahackehuc wiac gâcne e jahac râcnezo manasuwec sâc ʒuhuckecnewec. Eme e â kikefuŋfâcne jaŋe faharerâ mâreŋ‐jeŋicko risie rambiŋ.
Salomo e moneŋ mafa â ʒâŋe biŋe sâkohec juwec
(Ŋic I 10:14–29; Bin II 1:14–17)
13 Eme jara sâc golzi Salomorao fisi jujec irec ŋemâc i 666.
14 Eme Salomo e âbârâ gie bapa ŋic â nareŋ gareŋ ejumbieŋ jaŋere sahac taha erâ Arabia mâreŋte ŋicwofuŋ jaŋere sahac taha â mâreŋ soŋaŋ sahac taha‐jeŋic gol â siliwa bafisimbiŋ i ira ʒuhuckewec.
15 Eme ŋicwofuŋ Salomozi mume gol ematauckekicnezi maro kâcɋene 200 bambiŋ. Maro mocte gol râembiŋ irec ŋemâc i 600.
16 Erâ maro piticne 300 i gol ematauckekicnezia bambiŋ wâc. Maro mocte gol râembiŋ irec ŋemâc i 300. Eme ŋicwofuŋzi mume maro wiac Lebanoŋ Kâtefic ira râembiŋ.
17 Eme ŋicwofuŋzi mume elefaŋte ʒuŋenezi eri ŋeŋe sâko moc barâ gol ematauckekicnezi foŋkembiŋ.
18 Eme ŋeŋe i riri‐ticnehec, ririre feŋgaŋne 6 fowec â kike ââtesiŋ i golzi ɋorockembiŋ, eme i eri ŋeŋehec ʒuhuckekicne. Eme ŋeŋe ŋifec â ŋifec ira ine mebapa bakicne, ehame laioŋ hawari jajahec mebapa heririŋnao domapic.
19 Eme ririre feŋgaŋ 6 irec qaŋeŋne ŋifec â ŋifec ira laioŋ hawari moc moc, iŋuc doma fepie 12 ewec. Uucmaŋ ira me ira wiac iŋucne moc mi bakicne
20 Ŋicwofuŋ Salomore waiŋ â opâ râqâc sasawa i golzi bakicne â Lebanoŋ Kâtefic irec râqâc wiac i gol ɋaɋacnezi bakicne. Salomore dameŋko siliware manapie wiac omane jâmbâŋ ewec.
21 Ŋicwofuŋte wokefâc jaŋe Hiramte kiŋaŋ qaqafâc jaŋehec Tarasisi mâreŋko rajumbieŋ. Erâ Tarasisi mâreŋkonec woke jaŋe jara jahec â moc tarame sâc gol â siliwa â elefaŋte ʒuŋe, erâ moŋki â wipe hawari biaŋ bafisi jumbieŋ.
22 Ŋicwofuŋ Salomo e moneŋ mafa sâko â maŋɋârâŋhec juhuc mâreŋ sâc ŋicwofuŋ jurambiŋ jaŋe siric‐jopa‐fârewec.
23 Ehame mâreŋ sâc ŋicwofuŋ jaŋe Salomo honerâ Anutuzi maŋɋârâŋ mamanasu‐ticnao râewec i mana taraniŋte ejarewec.
24 Eme jarane jarane fisimbiŋ sâc jaŋe buc buc taha wiac‐jeŋic bafisihuc râqâc wiac siliwa â golzi bakicne â ŋaqi qoruc â wiac âsu biaŋ â nânâ ba bâziziwec eere wiac, erâ becâsic â doŋgi tahacke jumbieŋ.
25 Eme Salomo e becâsic â keretac jaŋere ficmaŋne 4 tauseŋ barawec. Erâ becâsicko rara ŋic 12 tauseŋ jaŋe hae ŋerawec ira â ŋicwofuŋ e jahacnehec Jerusalem haeo râec‐jopawec.
26 Erâ ŋicwofuŋ sasawa Eufrata opâonec raku Filisa mâreŋko â Aigita mâreŋte mao fisikac ira jurambiŋ i jaŋe qaŋeŋ‐jopa‐fârewec.
27 Erâ ŋicwofuŋzi guriŋ bame siliwazi Jerusalem haeo qânâ iŋucne forawec â jâmâzâc jâc i Sefela mâreŋte kakikic jâc iŋucne forawec.
28 Eme Salomore becâsicfâc i Aigita â mâreŋne mâreŋne irecnec bacjopa fisimbiŋ.
Salomo hâmowec
(Ŋic I 11:41–43)
29 Eme Salomozi wiac sasawa ebac ewec i fuŋnaonecteaŋ ninic jaha porofete Nataŋte binaŋko â Siloŋic Ahiare findaŋdâŋko erâ findaŋdâŋ mumu ŋic Ido e maŋne ŋerisieme Nebate ŋokâ‐ticne Jeroboamte wiac hone manac ewec ere papiao ira ʒeŋgoma qâreŋke‐fârekicne.
30 Salomo e Israe ŋic qaŋeŋ‐jopahuc Jerusalem haeo ŋicwofuŋ juhame jara 40 tarawec.
31 Eme juku apa ŋosafâcne jaŋerao ʒuhuckehuc hâmome mamac‐ticne Dawidire hae qizecko duckembiŋ. Ehame ŋokâ‐ticne Rehoboamzi tucticne qarâ ŋicwofuŋ juwec.