8
Salomo gie‐ticnere binaŋ
(Ŋic I 9:10–28)
1-2 Salomo e Wofuŋte ufuŋ â e jahacne fic i jara 20 baku bafârewec. Bafârerâ Hiramzi hae gâcne qikiŋnecnewec i heɋârerâ bahuc Israe ŋic jaŋe hae ira juraniŋte râec‐jopawec.
3 Erâ Salomo e Hamati‐Zoba haeo rarâ hae i ro rauc ewec.
4 Erâ mâreŋ burocnao Tadamori hae bawec â Hamati mâreŋko rowaŋ hae barawec.
5 Erâ wâc Bete‐Horoŋ hae faic â Bete‐Horoŋ hae juwic i hae sanaŋ sac â motâc babasanaŋ‐ticnehec bawec.
6 Erâ Balata hae â rowaŋ hae ŋecne rawec â keretacfâcne jaŋere hae sasawa becâsicko rara ŋicfâcne jaŋere hae, erâ Salomo e Jerusalem haeo â Lebanoŋ â mâreŋ soŋaŋkewec sasawa ira wiac i me i baocte manasuwec sâc bafârewec.
7 Erâ Hitiŋic â Amori ŋic â Periʒi ŋic â Hiwiŋic â Jebusi ŋic jaŋeraonec ŋic ʒika nâfoc ʒanʒaŋne sasawa jaŋe Israe ŋic mâcne.
8 Eme jaŋere ɋâricfâc ʒanʒaŋne Israe ŋic jaŋe mi jopa miziembiŋte Kanaaŋ mâreŋkoa jumbiŋ; eme i jaŋe hâcne Salomozi sâcmutâc ejareha gie bahuc juniŋte mujarewec, eme dameŋ ʒi iŋuc hâcne ehuc juŋgopieŋ.
9 Israe ŋic jaŋeraonec ine Salomozi gie‐ticnere kiŋaŋ qaqa moc mi bacjopawec. Jaŋe ine momori â fekicnefâc‐ticne â keretacfâcne jaŋere micne â becâsicko rara ŋicfâc‐ticne jumbiŋ.
10 Eme ŋicwofuŋ Salomore micne fekicne 250 jaŋe ŋic ŋokac hone soŋaŋ ejarembiŋ.
11 Salomo e ʒiŋuc hâcne muhuc Faraore otâ Dawidire hae qizeckonec jowa ware ficticne bawec ira râewec: “Ŋonâŋ‐nane e Israe ŋicwofuŋ Dawidire ficko mi juzejec. Wofuŋte qorac tapa katapazi warejec ŋekac fic tirine ekac.”
12 Eme Salomo e hae gâŋgâŋ maŋfuŋnao Wofuŋte alata bawec ira Wofuŋ qowi bâzi rikecnewec.
13 I ʒoaŋ gie bapa sâc me sabata hombaŋko â mosa furune wahaekac ira, me jara mocte maŋnao arec jahec â moc goreŋ sowa jumbiŋ ira, me woka sâc me Rehac Bozere hombaŋko Mosere sâcmutâc dâŋte sâcko tiwâ bâzi rikeniŋte mujarekicne irec sâc rikewec hâcne.
14 Salomo e mamac‐ticne Dawidizi mutâcnewec i bâjâpehuc taha bapa jaŋe gie‐jeŋicko biric‐jopawec â Lewiŋic jaŋe ʒoaŋ gie bapa sâc taha bapa jaŋere maio ʒeri mumuteŋ eniŋte biric‐jopawec, â haesac motâc soŋaŋ jaŋe motâc sâc biric‐jopawec. Anuture ŋic Dawidi e iŋuc hâcne mutâcnewec.
15 Jaŋe ŋicwofuŋzi taha bapa â Lewiŋic jaŋere dâŋ mecne â ʒeŋaŋte dâŋ mutâcne‐jarewec i moc mi ririmbiŋ.
16 Salomo e Wofuŋ ufuŋ‐ticnere gie sasawa i wâtuŋ neŋgocne râepie huweckonecteaŋ bahuc juku batarawec ira iŋuc hâcne fuawec. Wofuŋte ufuŋ i iŋuc hâcne baku batara‐fârekicne.
17 Eme Salomo e Edom mâreŋko hâwecmecko Ezioŋ‐Gebe â Eloti hae ŋepic ira rawec.
18 Eme Hiram e woke mecne erâ woke â hâwec jahere fuŋne mamana ŋic gâcne râec‐jopame kiŋaŋŋicfâc‐ticne gâcne jaŋe Salomorao bacjopa rambiŋ. Eme jaŋe Salomore kiŋaŋ qaqafâc jaŋehec mâmâc jaha Ofiri mâreŋko rarâ irecnec gol ŋemâc‐ticne 450 rorâ ŋicwofuŋ Salomorao bafisimbiŋ.