11
Saulozi Amoŋŋic bawahac‐jopawec
1 Eme Amoŋ ŋicwofuŋ Nahasi e rarâ Jabesi‐Gileade hae somâckewec. Iŋuc eme Jabesi haeonec jaŋe ŋicwofuŋ Nahasi ʒiŋuc âzâcnembiŋ: “Nâŋâc ʒâʒâfic‐nâŋec moc bâfuapene fome kiŋaŋ qagarehuc junʒepeneŋ.”
2 Iŋuc mupie Amoŋ ŋicwofuŋ Nahasi e ʒiŋuc jazawec: “Wiac ʒiŋuc ehuc ine ŋoŋehec ʒâʒâfic epemu: Ʒâŋe‐ŋeŋic fâreopec i ripo‐fârezepac. Iŋuc ehuc Israe guru mimi bâfuacnezepac.”
3 Iŋuc mume Jabesi haere micne jaŋe dâŋ ʒiŋuc bâtikiecnembiŋ: “Go ʒoaŋ gie bapa 7 mana‐nâretec dâŋ râepene Israe mâreŋ sâckerâ razejec. Eme ŋic moczi mi ŋezic‐nâpoocmuo ine gore meo fefârenʒepeneŋ.”
4 Eme dâŋ barambiŋ ŋic i jaŋe juku Saulore hae Gibea ira fisirâ biŋedâŋ i mupie ŋic ŋokac jaŋe manarâ mâretec kiombiŋ.
5 Eme Saulo e gieonec bulimakao ŋicne jaŋere râpefuŋko warehuc kifânâŋ manarâ muwec, “Ŋic ŋokac jaŋe wemo wiaczi weniŋuc ejareme kioŋgopieŋ?” Iŋuc wiome jaŋe Jabesi haeonec jaŋere biŋedâŋ i âzâcnembiŋ.
6 Âzâcnepie Anuture Mârozi basanaŋkeme mâretec aaricke sâqorewec.
7 Aarickeme bulimakao jajahec jofarâ hezume feme dâkâne dâkâne Israe mâreŋ sâckerâ baraniŋte biŋedâŋ mumu ŋic jaŋere meo râehuc ʒiŋuc muwec: “Moc e Samuehec nâhe mi bâjâpec‐nâfome ere bulimakaofâc jaŋe ijaha ejarezo.” Eme Wofuŋte hâhâwiczi ŋic ŋokac jaŋerao fusucmame quruŋ herâ fahare‐fârembiŋ.
8 Eme Beʒeki haeo biric‐jopame Israe ŋic jaŋere ʒare 300 tauseŋ â Judaŋic jaŋe ine 30 tauseŋ iŋuc fuawec.
9 Eme biŋedâŋ barâ fisimbiŋ jaŋe ʒiŋuc jazambiŋ: “Ŋoŋe Jabesi‐Gileade haeonec ʒiŋuc jazanʒepieŋ: ‘Tomâcko ʒoaŋ ʒâʒâŋiŋ ehame ŋoŋerao aakic fuaocmu.’ ” Eme biŋedâŋ mumu ŋic jaŋe risierâ biŋedâŋ biaŋ jazapie Jabesi haeonec jaŋe manarâ bujeŋic biaŋkewec.
10 Eme Jabesi haeonec jaŋe ŋicwofuŋ Nahasi ʒiŋuc âzâcnembiŋ: “Nâŋe tomâcko ŋoŋere meo fefârehapene ŋoŋe manaŋgopieŋ sâc enârenʒepieŋ.”
11 Eme hae fureme Saulo e ŋicfâc‐ticne bâfuac‐jopame guru jahec â moc embiŋ. Guru jahec â moc epie rocjopame ʒoɋachec jaha ŋafe furec hehec‐jekicko râsi jaŋere teuŋko fisirâ Amoŋŋic hetâc qâtâc‐jopakupie ʒoaŋ ʒâʒâŋiŋ ewec. Eme jumbiŋ jaŋe siaŋ siperec qahuc wise‐fârembiŋ.
12 Iŋuc fuame ŋic ŋokac jaŋe Samue ʒiŋuc âzâcnembiŋ: “Weni jaŋe ʒiŋuc mumbiŋ: ‘Saulozi ŋicwofuŋ sâcne junâreocmu me?’ Ŋic i jaŋe jowac‐jopa warepie qâhâmoc‐jopanaŋ.”
13 Iŋuc mupie Saulozi ʒiŋuc jazawec: “Wofuŋzi miŋecgac Israe guruo aakic bâfuajecte ʒoaŋ ʒira ŋic moc mi qâhâmozo.”
14 Iŋuc mume Samuezi ŋic ŋokac ʒiŋuc jazawec: “Nâŋâc Giligali haeo rarâ ira ŋicwofuŋ‐nâŋecte dâŋ mocwâc muhâmonʒepeneŋ.”
15 Iŋuc mume ŋic ŋokac jaŋe ʒeŋgoma Giligali haeo rarâ ira Wofuŋte maio Saulozi ŋicwofuŋ jujareocte âkendâŋnembiŋ. Ehuc wama bâzi rikembiŋ. Iŋuc ehuc Saulo â Israe ŋic jaŋe mâretec ʒeri embiŋ.