10
Samuezi Saulo wokemaŋ ruacnewec
1 Eme Samuezi wokemaŋ ʒopo rorâ Saulo qizec‐ticnao hoŋkewec. Erâ muduckehuc muwec, “Wofuŋzi Israe ŋicfâc‐ticne micne bajarecmurâ wokemaŋ rua‐garekac. Eme go Wofuŋte ŋicfâc micne bajarehuc râsifâc‐jeŋic rârec rârec juraŋgopieŋ jaŋere meonec batarac‐jopacmurâ wokemaŋ rua‐garekac irec ma ʒiŋuc fua‐gareocmu:
2 Go miŋecgac no behecnurâ rahuc Benjamiŋ mâreŋko mâreŋ dâkâne moc ʒâŋene Zeleza, Rahere ʒâŋeruŋ fokacko ira ŋic jajahec bâfuac‐jofatec ʒiŋuc gazanicmu: ‘Doŋgi basac‐jopa rameŋ i bâfuac‐jopakicne. Eme mamacge e doŋgi jaŋere manabâc eweczi beherâ ʒi gore maŋ kukumbuc ecneme ʒiŋuc mukac: “No motec‐nanere weniŋuc epemu?” ’
3 Eme go irecnec ipec rarâ Taborore boriŋjâc fuŋnao fisicmu. Eme ira ŋic jahec â moc jaŋe Anutu mai ecnezore Bete haeo feniŋte warehuc bâfuacguniŋmu. Moc e lama motecne jahec â moc baocmu â moc e poroŋ jahec â moc baocmu â moczi ine waiŋ ʒopo kâcɋene moc baocmu.
4 Eme jaŋe ‘ʒoaŋ biaŋ’ mugarehuc poroŋ jajahec garepie sâcne rozemec.
5 Eme Anuture tiki, Filisa mâreŋ soŋaŋzi ŋec juc eekac ira fisirâ porofete guru jaŋe furu mâreŋkonec gita, woŋgâŋ, mimi ŋokac â kâriŋɋaŋhec wahahuc findaŋdâŋ muhapie bâfuac‐jopacmu.
6 Eme Wofuŋte Mârozi basanaŋgume jaŋehec findaŋdâŋ muhuc ŋic sâc moc jâmbâŋ ecmu.
7 Ma i sasawa fua‐gare‐fâreocmu dameŋ ira wiac i me i eene fuame ezemec. Anutu e gohec juocmu hâcne.
8 Eme go bânierâ Giligali haeo hufâhaŋtec no qowi bâzi â wama bâzi rikezore ijaha gorao hufâpemu. Go ʒoaŋ gie bapa 7 woŋec juhaŋtec noni fisirâ wiac weniŋuc jaha ecmurâ gaza gowatuc ezepac.”
9 Eme Saulo e Samue râpeckerâ razo ehame Anutuzi maŋ mamanasu moc tahackewec. Ehame erao ma wiac gâcne fua raocte mukicne i ʒoaŋ ira fuacne‐fârewec.
10 Eme jahe raku Gibea haeo fisihapire porofete guru jaŋe ware bâfuac‐jofambiŋ. Bâfuac‐jofapie Anuture Mârozi Saulo basanaŋkeme jaŋerao ʒuhuckerâ findaŋdâŋ muwec.
11 Eme juwicnao Saulo hone manac ecnembiŋ ŋic i jaŋe Saulozi porofete jaŋerao ʒuhuckerâ findaŋdâŋ muwec i honerâ nazaŋ gazaŋ erâ mumbiŋ, “Kisi ŋokâ‐ticne wemo wiac mo fuacnewec? Saulo e porofete jaŋerao ʒuhuckewec me?”
12 Eme hae irec ŋic moczi dâŋ ʒiŋuc wiohuc bâtikie‐jarewec: “Eme gâcne jaŋere mamac, e mo?” Irec qâqiŋdâŋ ʒiŋuc muhuc jumbiŋ: “Saulo e porofete jaŋerao ʒuhuckewec me?”
13 Eme Saulo e findaŋdâŋ mume tarame furu mâreŋko fewec.
14 Ehame mamac piic‐ticnezi Saulo â kiŋaŋŋic‐ticne ʒiŋuc wio‐jactewec: “Ŋohe wena rapic?” Wiome Saulozi dâŋ ʒiŋuc bâtikiecnewec: “Nâhe doŋgi basac‐jopanacte rapec. Eme basac‐jopa‐bipierâ Samuerao rapec.”
15 Iŋuc mume mamac piic‐ticnezi muwec, “Samuezi weniŋuc gazajec i nazac.”
16 Mume Saulozi mamac piic‐ticne ʒiŋuc âzâcnewec: “E doŋgi bâfuac‐jopakicne i fâretiŋ jaha nâsâjec.” Â Saulo e jahacne ŋicwofuŋ erâ juocte Samuezi muwec i ine hesoŋkecnewec.
17 Eme Samue e Israe ŋic hefârec‐jopame Wofuŋtao Mizipa haeo tumaŋnembiŋ.
18 Tumaŋnepie ʒiŋuc jazawec: “Israere Wofuŋ Anutu e ʒiŋuc mukac: ‘No hâcne Aigita ŋic jaŋere meonec batarac‐ŋopahuc Aigita mâreŋkonec jowac‐ŋopa wefupo. Erâ ŋicwofuŋ gurune gurune jaŋe fific bacŋopahapie sifu jaŋere meonec wâc batarac‐ŋopapo.
19 Eme ʒi ine fific guguriŋ â ʒâic busâqoc maŋko juhapie bafic‐ŋopaekopac Anutu‐ŋeŋic no hâcne behecnuŋgopieŋ. Ehuc ʒiŋuc muŋgopieŋ: “Aricne, ŋicwofuŋ moc âkendâŋne‐nârezo.” Irec ŋoŋe guru‐ŋeŋic sâc Wofuŋte maio birickeniŋ.’ ”
20 Eme Samue e Israe guru sasawa ejareme maŋfuŋnao tumaŋne‐fârepie ɋâsâi qame Benjamiŋte guru âke fuawec.
21 Eme Benjamiŋ guru jaŋe garikiŋ‐jeŋic sâc hefârec‐joparâ ɋâsâi qame Matirire garikiŋ âke fuawec. Eme Matirire garikiŋ jaŋe ŋic buc buc hefârec‐joparâ ɋâsâi qame Kisi ŋokâ‐ticne Saulo âke fuawec. Erâ e ira mi juwecte basa‐bipiembiŋ.
22 Irec jaŋe mocwâc Wofuŋ mu wioc ecnehuc ʒiŋuc mumbiŋ: “Ŋic e mocwâc risie wareocmu me?” Wiopie Wofuŋzi muwec, “E mafa guruo soŋkejec irec ira honeniŋ.”
23 Iŋuc mume jaŋe gasacke rarâ jowa warembiŋ. Jowa warepie guru‐jeŋicko domame ŋic sasawa jaŋe ere ɋaweo sawa qafârembiŋ, â eki ine jowaru‐fârewec.
24 Eme Samuezi ŋic ŋokac ʒiŋuc jazawec: “Ŋoŋe Wofuŋzi ŋic rowosâewec e honeniŋ. Guru‐ŋeŋicko ŋic moc e iŋucne moc mi jujâmbâŋkekac.” Iŋuc jazame ŋic ŋokac jaŋe micne mic sâc musereckehuc mumbiŋ, “Ŋicwofuŋ e juraʒihuc juzejec.”
25 Eme Samue e ŋicwofuŋzi gie weniŋuc jaha baocmu i ŋic ŋokac mutâcne‐jarewec. Eme dâŋ i sasawa papiao qâreŋke‐fârerâ Wofuŋte maŋfuŋko râeme fowec. Iŋuc erâ ŋic râec‐jopame hae‐jeŋic sâc râwiŋnembiŋ.
26 Râwiŋnepie Saulo e iŋuc jaha Gibea hae‐ticnao rawec. Rahame Anutuzi maŋjeŋic bâuŋtowec momori i jaŋe e bâjâpembiŋ.
27 Ehame ŋic kosane gâcne jaŋe ʒiŋuc mumbiŋ: “Weniŋuc, ŋic keciŋucnezi sâcne ŋezic‐nâpoocmu me?” Iŋuc murâ qaisockehuc taha wiac moc mi râcnembiŋ. Eme Saulo e irec dâŋ moc m muhuc mâc juwec.