13
Filisa ŋic jaŋehec qaqac embiŋ
1 Saulo e ŋicwofuŋ juhame jara moc tarawec. Erâ ʒuhuckerâ Israe ŋic jaŋere ŋicwofuŋ juhame jara jajahec ewec.
2 Ehame Saulo e Israe ŋic 3 tauseŋ rowosâec‐jopawec. Eme 2 tauseŋ jaŋe e jahacnehec Mikimasi haeo â Bete tiki mâreŋko jumbiŋ â 1 tauseŋ jaŋe ine Jonataŋhec Benjamiŋ mâreŋko Gibea haeo jumbiŋ, â gâcne sâko jaŋe ine sorec‐jopame hae‐jeŋic sâc rafârembiŋ.
3 Eme Jonataŋzi Geba haeo Filisa momori qâhâmoc‐jopawec irec biŋe i Filisa ŋic jaŋe manambiŋ. Eme Saulo e qeŋ qame mâreŋ sâcke‐fârerâ rame muwec, “Hebiraio ŋic ŋoŋe mananiŋ.”
4 Eme Israe ŋic jaŋe, Saulozi Filisa momori jopawec erâ Israe ŋic nâŋâcne ʒâŋe biŋezi Filisa ŋic jaŋerao wawahane ewec, biŋe iŋuc manahuc hehefârec erâ Saulo bâfuaniŋte Giligali haeo fisimbiŋ.
5 Eme Filisa ŋic jaŋe keretac 30 tauseŋ â becâsicko rara ŋic 6 tauseŋ erâ momori guru dindiŋ sâko hâwecmecko moŋgeŋ fokac irec sâc jaŋe Israe ŋic jaŋehec qaqac eniŋte birickembiŋ. Ehuc ferâ Betaweŋ hae ʒoaŋ wewefu‐ticnao, Mikimasi haeo hâcne, ira teuŋ âtembiŋ.
6 Eme Filisa momori jaŋe somâc‐jopazo embiŋ, iŋuc honerâ Israe ŋic jaŋe qânâ hawecko â nombâŋko â qânâuŋko â ʒâŋeruŋ gufukicnao erâ opâ nombâŋ rokicnao soŋke‐fârembiŋ.
7 Erâ wâc wiserâ Jordaŋ opâ fotâcnerâ Gade â Gileade mâreŋko rambiŋ. Â Saulo e ine Giligali haeo juha ŋic jaŋe ɋarac ɋarac qahuc erao fisimbiŋ.
8 Saulo e Samuere dameŋ bakicne irec sâc ʒoaŋ gie bapa 7 woŋec juwec. Eme Samue e sifu Giligali haeo biac mi fisiwecte ŋic ŋokac jaŋe Saulo beherâ siŋsaŋ qafârembiŋ.
9 Iŋuc honerâ Saulozi muwec, “Qowi bâzi â wama bâzi i norao bawareniŋ.” Iŋuc murâ qowi bâzi rikewec.
10 E qowi bâzi rikeme taraha izia Samuezi fisiwec. Fisime Saulozi bâfuarâ “ʒoaŋ biaŋ” mucneocte rawec.
11 Eme Samuezi wiocnewec: “Go wemo emec?” Mume Saulozi muwec: “No dameŋ bakicne irec sâcko mi fisitec ŋic ŋokac jaŋe behecnurâ siŋsaŋ qambieŋ â Filisa ŋic jaŋe Mikimasi haeo birickembieŋ i honerâ ʒiŋuc mupac:
12 ‘No ʒi Wofuŋ wira wâwâsic moc mi ecnehape Filisa ŋic jaŋe Giligali haeo râsi fisi‐nâreniŋmu ine.’ Iŋuc murâ sifu qowi bâzi rikepac.”
13 Iŋuc mume Samuezi ʒiŋuc âzâcnewec: “Go wiac mutucne emec. Wofuŋ Anutugezi sâcmutâc dâŋ gaza mutâc ewec i mi reŋkemec. Go reŋketec muzac Wofuŋzi Israe maŋnao uucmaŋge basanaŋkeme raŋɋa raŋɋa fozac hâcne.
14 Ʒi ine uucmaŋgezi ʒuhuckerâ mi foocmu. Wofuŋ e maŋticnezi ŋic moc hone wosâc ewec. Go Wofuŋzi dâŋ mutâcne‐garewec i mi reŋkemeŋte ŋic e hâcne Israe ŋicfâcne jaŋere micne juocte âkendâŋnewec.”
15 Eme Samue e Giligali haeonec faharerâ Benjamiŋ mâreŋko Gibea hae ŋewec ira fewec.
Eme Saulo e jahacnehec jumbiŋ ŋic i jaŋe wosec‐jopame ʒare‐jeŋic 600 ewec.
16 Eme Saulo e ŋokâ‐ticne Jonataŋ erâ ŋic jahehec mâmâc jumbiŋ jaŋe Benjamiŋ mâreŋko Gibea hae ŋewec ira ŋeŋe juju embiŋ. Ehame Filisa ŋic jaŋe Mikimasi haeo teuŋ âtembiŋ.
17 Ehuc râsi fisi‐jareniŋte guru jahec â moc embiŋ. Ehuc guru moc jaŋe Ofira haeopec rahuc Suali mâreŋko fisimbiŋ,
18 â guru moc jaŋe Bete‐Horoŋ haeopec rambiŋ, â guru moc jaŋe ine mâreŋ burocnaopec Zeboim wâneŋ irec faicnao ma fokac irapec rambiŋ.
19 Eme Israe mâreŋko aeŋzi wiac bapa ŋic moc mi juwec. I Filisa ŋic jaŋe Hebiraio ŋic aka hejarembiŋte aeŋzi sându me ʒika wiac‐jeŋic baniŋte hewâwâŋkembiŋ hâcne.
20 Israe ŋic jaŋe giere wiac, kinoŋ sapac‐jeŋic ʒâmuniŋte Filisa ŋic jaŋerao sawa bara jumbieŋ.
21 Eme kinoŋ sapac wiac ʒâmu‐jarepie furine siliwa dâkâne jajahec râe jumbieŋ, â râric me bulimakao jâjâpec‐jopa aeŋ dâkâne i ʒâmu bâpiaŋ ejarepie ine siliwa dâkâne 1 râe jumbieŋ.
22 Irec ʒika fuawec ʒoaŋ ira ʒika me sându wiac moc mi bajumbiŋ, Saulo â ŋokâ‐ticne Jonataŋ jahe ine fojactewec.
23 Eme Filisa ŋic jaŋe Mikimasi heâŋ i soŋaŋkeniŋte momori râec‐jopambiŋ.