14
1 Ʒoaŋ mocko Saulo ŋokâ‐ticne Jonataŋ e ŋicmotec maro babaju‐ticne ʒiŋuc âzâcnewec: “Waretec nâhâc tiki ocniŋuc Filisa momori juŋgopieŋ ira ranac.” E iŋuc raocte irec dâŋ mamac‐ticne moc mi âzâcnewec.
2 Saulo e dameŋ ira Gibea hae mendâŋko binawec jâc fuŋnao boze‐ticne ŋewec ira ŋeŋe juju ewec. Â ŋic 600 heririŋ jaŋe wâc ehec jumbiŋ.
3 Ehame Eli â Pinehasi jahere apa ŋosa Ahia e Ikabodore hahac Ahitubu ere ŋokâzi Silo haeo Wofuŋte taha bapa juhuc taha bapa ŋaqi rojuwec. Ehame Jonataŋzi rawec i ŋic moczi mi manawec.
4 Eme Jonataŋzi qânâ hârâc ŋifec â ŋifec domapic heâŋ ira fisirâ fotâcne Filisa momori jaŋere teuŋko raʒiocte gie sâko bawec. Eme qânâ hârâc moc irec ʒâŋe Boseze â mocte ʒâŋe ine Sene.
5 Eme qânâ hârâc moc izi faicpec Mikimasi hae maickerâ fe domawec â moczi ine juwicpec Geba hae maickerâ domawec.
6 Eme Jonataŋzi maro‐ticne bajuwec ŋicmotec e ʒiŋuc âzâcnewec: “Waretec nâhâc sahac tofa‐jeŋic mi hezukicne momori kecocni jaŋerao ranac. Wofuŋzi nâhâcnere erâ sâcne mecne ʒika qaocmu. Wofuŋ e ŋic bocjaha me afecne jaŋehec ŋeŋezic gie baocte mi quŋkeocmu.”
7 Eme ŋicmotec maro babaju‐ticne eki dâŋ ʒiŋuc bâtikiecnewec: “Manasu biric ekic sâc efârec. Manakic, go wiac manasukic sâc ecmu ijaha efârepemu.”
8 Iŋuc mume Jonataŋzi ʒuhuckerâ ʒiŋuc âzâcnewec: “Manakic, nâhâc fotâcnerâ ŋic jaŋerao fisirâ fua‐jarezeperec.
9 Fua‐jarepere jaŋe, ‘Domakopirecko ijaha domahapire nâŋe ŋoherao fanaŋ,’ iŋuc wiac moc muniŋmuo ine nâhâc jaŋere maŋfuŋko mi rahuc domanacmu mâreŋ ŋondeŋ ijaha domazeperec.
10 Â jaŋe, ‘Nâŋerao wefunic,’ iŋuc moc muniŋmuo ine feranacmu. Jaŋe Wofuŋzi nâhâcne meo râec‐jopawec irec ma iŋuc hâcne fuaocmu.”
11 Eme ŋic jahe mâmâc jaha Filisa momori fua‐jarepic. Fua‐jarepire Filisa ŋic jaŋe honec‐jofarâ mumbiŋ, “Honeniŋ, Hebiraio ŋic hawecko soŋkerâ foeŋgopieŋzi fuaŋgopieŋ.”
12 Iŋuc murâ Jonataŋ â maro babaju‐ticne jahe wira‐jactehuc mumbiŋ, “Nâŋerao ʒira wefupire wiac moc ŋofatunaŋ.” Iŋuc mupie Jonataŋzi maro babaju‐ticne ʒiŋuc âzâcnewec: “Ware napec, Wofuŋzi Israere meo râec‐jopawec hâcne.”
13 Iŋuc murâ Jonataŋ e hârâcko mezi babarâ feme maro babaju‐ticne e wâc bâjâpewec. Eme fe fisizo ehapire Filisa ŋic jaŋe Jonataŋte meo fefârembiŋ. Ehame maro babaju‐ticne e wâc bâjâpehuc jopawec.
14 Eme Jonataŋ â maro babaju‐ticne jahe dameŋ ira ŋic ʒare‐jeŋic 20 heririŋ jopapire ŋic moczi mâreŋ dâkâne mocko bokokoc takariŋ bame foekac irec sâc forambiŋ.
15 Ehame momori guru ʒikao jumbiŋ jaŋe â ŋic ŋokac guru sâko jaŋerao hâhâwic sâko fuawec. Erâ momori teuŋko râec‐jopambiŋ â ʒika qahuc domambiŋ jaŋe wâc hâwic‐jopawec. Eme mâreŋzi ɋiɋiteckeme maŋjeŋic gâckewec.
16 Ehame Benjamiŋ mâreŋko Gibea hae ŋewec ira Saulore ŋicfâc ruc bahuc ŋembiŋ jaŋe fipie rame Filisa ŋic jaŋe rândiŋke qa ehuc tâtiepie honec‐jopambiŋ.
17 Eme mo ŋiczi ŋondeŋ‐jeŋicko mi juwec i fuaocte ŋic wosec‐jopaniŋte Saulozi mujarewec. Eme iŋuc erâ honepie Jonataŋ â maro babaju‐ticne jahe ira mi jupic.
18 Dameŋ ira Anuture katapazi Israe ŋic jaŋehec juwecte Saulozi Ahia ʒiŋuc âzâcnewec: “Anuture katapa bawarezo.”
19 Saulo e taha bapa dâŋ âzâcnehuc juhame Filisa jaŋere teuŋko maŋ gogoroŋzi boc ɋârâŋkewec. Iŋuc honerâ Saulozi taha bapa ʒiŋuc âzâcnewec: “Behetec ŋeoc.”
20 Iŋuc murâ Saulo e jahacne â ŋicfâcne jaŋe aŋara hehuc gasackerâ râsi jaŋere teuŋko rambiŋ. Ehuc honepie Filisa ŋic jaŋe qâsifuc sâko ehuc jaŋaczia qaqac embiŋ.
21 Eme Hebiraio ŋic gâcne Filisa ŋic jaŋehec juwarembiŋ â teuŋko wâc mâmâc jumbiŋ jaŋe ŋerisierâ Saulo â Jonataŋ jahehec jumbiŋ Israe ŋic i jaŋerao ʒuhuckembiŋ.
22 Ehame wâc Israe ŋic tucne Eferaim tiki mâreŋko soŋkerâ jumbiŋ jaŋe, Filisa ŋic jaŋe wiseŋgopieŋ, biŋe i manarâ fahare guru sâko jaŋerao ʒuhuckehuc ʒoɋachec jaha Filisa ŋic jopa jâpec ejarembiŋ.
23 Eme ʒoaŋ ira Wofuŋzi Israe ŋic ŋezic‐jopawec â ʒikazi ine Betaweŋ hae jâururâ ocniŋucnao rawec.
24 Saulo e ʒiŋuc muhuc ŋic ŋokac jaŋerao mumupaŋ râewecte Israe ŋic jaŋe boc betaŋkembiŋ: “No râsifâc‐nane okacne mi jarehape ʒoaŋ ʒira ŋic moczi nânâ nâocmu e sâwechec eocmu.” Iŋuc mume Israe ŋic moczi nânâ moc mi nâhuŋgaŋkewec.
25 Eme Israe ŋic jaŋe kâte mocko rahuc mâreŋko baŋac fome honembiŋ.
26 Eme ŋic jaŋe kâte ira fisirâ honepie baŋac i qâŋnaonec wahahuc fowec. Ehame ŋic jaŋe mumupaŋte hâwic‐jopawecte mo ŋiczi moc rorâ nazac.
27 Jonataŋ e ine mamac‐ticnezi ŋic dâŋ jazawec i mi manawec. Ehuc gunu‐ticne bajuwec izi baŋac âke uarâ micticnao râewec. Iŋuc ehuc ʒâŋe mai‐ticnezi boc fie ruruckewec.
28 Ehame ŋic jaŋeraonec moczi ʒiŋuc âzâcnewec: “Mamacgezi muac‐nâpohuc ʒiŋuc mujec: ‘Moc e nânâ nâocmuo ine sâwecte biŋe eocmu.’ ” Iŋuc mujecte ŋic jaŋe nânâre hâmorâ betaŋke sâqorembiŋ.
29 Eme Jonataŋzi muwec, “Mamac‐nane e ŋic sipiric‐ŋopa‐jâmbâŋkekac. Honeŋgopieŋ, no baŋac piticne mac nâ honepac irec erâ ʒâŋe mai‐nane fie ruruckekac.
30 Ʒoaŋ ʒira ŋic jaŋe râsifâc‐jeŋic jaŋere nânâ wiac rombieŋ i rambaŋko nanʒapiŋ muzac sâckezac, eme Filisa ŋic afecne mi jopanʒapeŋ.”
31 Eme Israe ŋic jaŋe Filisa ŋic Mikimasi haeonec jopa jâpec ejare raku Ajaloŋ haeo fisimbiŋ. Ehuc ŋic jaŋe boc betaŋkembiŋ.
32 Irec Israe ŋic jaŋe râsi jaŋere lama â bulimakao wiac mâreŋ taniŋnao qarâ socnehec nâmbiŋ.
33 Iŋuc epie ŋic gâcne jaŋe Saulo ʒiŋuc âzâcnembiŋ: “Ŋic jaŋe Wofuŋ sindaŋ ecnehuc qowi socnehec nâŋgopieŋ.” Iŋuc âzâcnepie Saulozi muwec, “I bahac, irec picpac jaha qânâ sâko moc norao qârândiŋkepie wareoc.”
34 Iŋuc murâ ʒiŋuc ʒuhuckerâ muwec: “Ŋoŋe ŋic juraŋgopieŋ sâc rarâ jazapie lama â bulimakaofâc‐jeŋic bacjopa fisinʒepieŋ. Eme moc e jahacne qowi i hezu rike nâc ezejec. Eme Wofuŋ sindaŋ ecnehuc qowi socnehec mi nânʒepieŋ.” Irec ŋafeme ŋic jaŋe qowifâc‐jeŋic bacjopa fisirâ mâreŋ ira hezu rike nâc embiŋ.
35 Iŋuc ehapie Saulozi fuŋkerâ Wofuŋte alata moc bawec.
36 Ehuc Saulozi muwec, “Nâŋâc ŋafeo hurâ Filisa ŋic jopahuc mafa wiac‐jeŋic jowac ropene hae furezejec. Ŋic moc mi akic‐jopa‐jâmbâŋkenʒepeneŋ.” E iŋuc mume ŋic jaŋe dâŋ ʒiŋuc bâtikiecnembiŋ: “Wiac manatec sâckekac sâc ezo.” Jaŋe iŋuc mupie taha bapazi muwec, “Nâŋâc qanaŋ ʒira Wofuŋ mai ecnenaŋ.”
37 Eme Saulozi Wofuŋ mu wioc ecnehuc muwec, “No Filisa ŋic sâcne râsi fisi‐jarepemu me? Go Israe ŋic nâŋere meo sâcne râec‐jopacmu me?” Eme dameŋ ira Wofuŋzi dâŋ okacne moc mi bâtikiecnewec.
38 Eme Saulozi muwec, “Israe micne sasawa ŋoŋe mai fua‐fârepie bahac wena fokac i bâfuanʒepeneŋ.
39 Wofuŋ e jujâmbâŋkehuc Israe ŋezickeekacte bahac i ŋokâ‐nane Jonataŋtao fokacko hâmo‐jâmbâŋkezejec.” Eme sifu ŋic jaŋeraonec moczi micticnao moc mi rowec.
40 Eme Saulozi Israe ŋic ʒiŋuc jazawec: “Ŋoŋe ŋifec â no â ŋokâ‐nane Jonataŋ nâhe ŋifec, iŋuc domanʒepeneŋ.” E iŋuc mume ŋic jaŋe dâŋ ʒiŋuc bâtikiecnembiŋ: “Wiac manatec sâckekac sâc ezo.”
41 Iŋuc mupie Saulozi Israe Wofuŋ Anutu ʒiŋuc numucnewec: “O Israere Wofuŋ Anutu, go wemocte dameŋ ʒi kiŋaŋŋicge no dâŋ okacne mi bâtikie‐narekomec? O Israere Wofuŋ Anutu, kiŋ i no nahacnao me ŋokâ‐nane Jonataŋtao fokacko ine irec ma moc fuazejec â Israe ŋicfâcge jaŋerao fokacko ine ma moc fuazejec.” Iŋuc mume ɋâsâi qapie Jonataŋ â Saulo jahe âke fuac‐jofawec, â ŋic jaŋe ine kiŋfâsâc embiŋ.
42 Eme Saulozi muwec, “Ʒi ine no â ŋokâ‐nane nâhere ɋâsâi qazo.” Eme iŋuc epie Jonataŋ âke fuawec.
43 Eme Saulozi Jonataŋ ʒiŋuc âzâcnewec: “Go wemo wiac emec i nazac.” Mume Jonataŋzi dâŋ ʒiŋuc bâtikiecnewec: “Jâmbomac, no gunu‐nane bajupac irec botâŋnezi baŋac piticne âke uarâ nâ honepac. No hâmopemurâ ʒi domakopac.
44 Iŋuc mume Saulo e Jonataŋzi hâmoocte mupaŋke‐jâmbâŋkewec.
45 Ehame ŋic jaŋe Saulo ʒiŋuc âzâcnembiŋ: “Jonataŋ e Israe maŋnao bâbâfirie gie sâko bahuc domajeczi jâmbomac hâmoocmu me? Jonataŋ e ʒoaŋ ʒira Anutuhec ʒikao domajec, irec Wofuŋ e jujâmbâŋkekacte Jonataŋte qizec susuc mocjaha mac moczi mâreŋko moc mi wahazejec.” Eme ŋic jaŋe Jonataŋ ŋezickembiŋte mi hâmowec.
46 Eme Saulo e Filisa ŋic jopa jâpec ejareocte muwec i beherâ hae‐ticnao risiewec. Ehame Filisa ŋic jaŋe wâc hae mâreŋ‐jeŋicko rafârembiŋ.
47 Saulo e Israe ŋic jaŋere ŋicwofuŋ juwec dameŋ ira kisâfâc‐ticne ŋicguru ʒiŋuczi ŋifec â ŋifec jumbiŋ jaŋe râsi ejare‐fârewec: Moabi, Amoŋ â Edom ŋicguru erâ Zoba ŋicwofuŋ â Filisa ŋic. E ira me ira rawec sâc imac‐jopa‐jâmbâŋkewec.
48 E Ameleke ŋic tâpiri‐ticne jowatuhuc bawahac‐joparâ Israe ŋic ba imac ejarembiŋ jaŋere meonec batarac‐jopawec.
49 Eme Saulo ŋokâfâc‐ticne jaŋere ʒâŋe ine ʒiŋuc: Jonataŋ, Isiwi â Malikisua. Â otâ jahecne jahere ʒâŋe ine hahac‐ticne Meraba â qoticne Mikali.
50 Â Saulo ŋonâŋ‐ticnere ʒâŋe ine Ahinoam. E Ahimazire otâ. Â momorifâc‐ticne jaŋere micne ere ʒâŋe ine Abene. E Saulo mamac piic‐ticne Nera ere ŋokâ.
51 Kisi, Saulore mamac, â Abene mamac‐ticne Nera jahe ine Abiele ere ŋokâ jahec jupic.
52 Saulore dameŋko Filisa ŋic jaŋehec qaqac ee i ŋemâcnea fowec. Irec Saulo e ŋic tâpirihec â hâhâwic tâmiric jaŋe sasawa rocjoparâ e jahacnao ʒuhuc‐jopawec.