15
Saulozi qaqatara bâfuawec
1 Samuezi Saulo ʒiŋuc âzâcnewec: “Wokemaŋ rua‐garehuc Israe ŋicfâc‐ticne jaŋere ŋicwofuŋ âkendâŋgupemurâ Wofuŋzi no hâcne sorecnuwec. Irec go Wofuŋ dâŋticnere hazec râezemec.
2 Anutu Tâpiri Ɋuŋɋasaŋ Wofuŋ e ʒiŋuc mukac: ‘No Israe ŋic jaŋe Aigita mâreŋkonec wefuhapie Ameleke ŋic jaŋe râsi ejarembiŋ irec tofa bazuzo manahuc jukopac.
3 Irec go rarâ Ameleke ŋic ʒeŋgoma jopahuc wiac‐jeŋic sipiricke‐fârezemec. Go ŋic me ŋokac, naru motec kâcɋene â susuonec, erâ lama bulimakao â kamele erâ doŋgifâc‐jeŋic moc mi akic‐jopahuc ʒeŋgoma jopa‐fârezemec.’ ”
4 Iŋuc âzâcneme Saulozi ŋic hefârec‐joparâ Telaim haeo wosec‐jopame Israe ŋic kikezi rarane jaŋe 200 tauseŋ embiŋ, â Judaŋic jaŋe 10 tauseŋ embiŋ.
5 Eme Saulo e Ameleke hae mocko fisirâ wâneŋko somâ râerâ fowec.
6 Fohuc Keniŋic jaŋere dâŋ râehuc ʒiŋuc muwec: “Ŋoŋe Ameleke ŋic behec‐joparâ wahaniŋ. No jaŋe jopahuc ŋoŋe mâmâc ŋopazipore biac fahareniŋ. Israe ŋic jaŋe Aigita mâreŋkonec wefuhapie ŋoŋe âgo ejarembiŋ.” Iŋuc muhuc jazame Keniŋic jaŋe Ameleke ŋic behec‐joparâ rambiŋ.
7 Jaŋe rahapie Saulozi Ameleke ŋic Hawila haeo fuŋkerâ jopa jopa raku Aigita mâreŋ ʒoaŋ wewefu‐ticnao Suru hae ŋewec ira fisiwec.
8 Ehuc Ameleke ŋic jaŋere ŋicwofuŋ Agage e ɋâricne rowec â ŋicfâc‐ticne ine ʒikazi jopa miziewec.
9 Eme Saulo â ŋicfâcne jaŋe ŋicwofuŋ Agage akickehuc lama bulimakao â doŋgi kâcɋene me piticne wokemaŋ sâkohec i wâc akic‐jopambiŋ. Â wiac tâpiri tâmiric hone suŋgiŋ eene ine ʒeŋgoma omaec‐jopambiŋ.
10 Ehame Wofuŋte dâŋzi Samuerao ʒiŋuc fisiwec:
11 “No Saulo ŋicwofuŋ âkendâŋnepo irec busâqoc manakopac. E râpecnuhuc sâcmutâc dâŋnane qâsuakac.” Iŋuc mume Samue e busâqoc sâko manarâ ŋafe ʒora i Wofuŋ kio wâwâsic ecnewec.
12 Eme hae fureme Samuezi Saulo bâfuaocte uupictea faharewec. Fahareme ʒiŋuc âzâcnembiŋ: “Saulo e Karamele tikio fisirâ maticne âkendâŋnehuc fotâcne Giligali haeo hujec.”
13 Eme Samue e Saulorao ra fisime âzâcne muwec, “Wofuŋte jambuŋ faigao fezejec. No ine Wofuŋte mumupaŋ dâŋ reŋkepac.”
14 Mume Samuezi muwec, “Eme lamare owazi hazec‐naeo qaqazukac â bulimakao marac fânâŋ tinac manakopac i wemo?”
15 Mume Saulozi muwec, “I Ameleke ŋic jaŋeraonec bacjopa warembieŋ, ŋic jaŋe lama bulimakao biaŋne moc moc Wofuŋ Anutuge taha bâzi rikecneniŋte bâwosâec‐joparâ akic‐jopambieŋ, gâcne sâko imac‐jopapene omatac fuajec.”
16 Eme Samuezi Saulo âzâcnewec, “Go dâŋ behec, ehame Wofuŋzi ŋafe ʒira dâŋ nazajec i gazape.” Mume muwec, “Muc.”
17 Eme Samuezi muwec, “Gahacne manatec pitiwaha Israe kikefuŋ gurune gurune jaŋere jâcne mi ekomec me? Wofuŋ e Israe ŋic jaŋere ŋicwofuŋ jucmurâ wokemaŋ rua‐garewec i!
18 Erâ giedâŋ moc mugarehuc ʒiŋuc muwec: ‘Go rarâ sâqocne bapa, Ameleke ŋic hâcne, jopaku jopa miziezemec.’
19 Eme Wofuŋte dâŋ i wemocte mi reŋkemec? Wemocte râsi jaŋere wiac bâuahuc Wofuŋzi wiac hone gâpâreekac i emec?”
20 Iŋuc mume Saulozi Samue ʒiŋucâzâcnewec: “No Wofuŋte dâŋ reŋkehuc gie munarewec i bapac, no Ameleke ŋic jaŋere ŋicwofuŋ Agage barâ warepac, no Ameleke ŋic jopa miziepac.
21 Ehame ŋic jaŋe ine râsi jaŋere wiac imacke‐fârezo mukicne irecnec lama â bulimakao biaŋne moc moc akic‐jopambieŋ, ine Wofuŋ Anutuge Giligali haeo taha bacnezo muhuc embieŋ.”
22 Eme Samuezi muwec,
“Wofuŋ e bâzi ririkecnere â taha babacnere aŋac focnekac,
aŋac izi dâŋticne rereŋkere aŋac irec sâc ekac me?
Mâcne, dâŋ rereŋzi taha bapa jâuru‐fârekac,
â hazec hâriczi lama ŋicnere wokemaŋ sirickekac.
23 Dâŋ qaqatara i hafec qaŋgec irec sâc jaha ekac,
â maŋ râŋgeŋzi hehesicte â nemuɋâŋ babajure sâc ekac.
Goki Wofuŋte dâŋ qikiŋnemec,
irec eki qikiŋguhuc ŋicwofuŋ gie gowac rokac.”
24 Eme Saulozi Samue âzâcne muwec, “No Wofuŋte mumupaŋ â gore dâŋ huckehuc kiŋ bahac bâfuapac, i ŋic jaŋere hâwicnume dâŋjeŋic reŋkepacte iŋuc epac.
25 Eme ʒi numu‐garekopac, kiŋnane beherâ waretec risienac, eme Wofuŋ taha nunumu ecnepe.”
26 Mume Samuezi âzâcnewec, “No gohec mi risiepemu, go Wofuŋte dâŋ qikiŋnemecte eki go qikiŋguhuc Israe ŋicguru jaŋere ŋicwofuŋ mocwâc juju i gowac rokac.”
27 Samue e iŋuc murâ raocte forisiehame Saulozi ŋaqi‐ticne tofanao rohame suckewec.
28 Eme Samuezi ʒiŋuc âzâcnewec: “Ʒoaŋ ʒira Wofuŋzi Israere uucmaŋ i gore meonec bârâriekac. Erâ ŋic biaŋne moc gore sâc sirickekac e râcneocmu.
29 Erâ Israere Tâpiri Ɋuŋɋasaŋ Rune e eeatuc me maŋ bâbârisie i mi focnekac. E ŋic aricne, irec wemocko maŋne risieocmu.”
30 Eme Saulozi muwec, “No bahac bâfuapac, erâ ine sifu ŋicfâc‐nane soŋaŋfâc‐jeŋic jaŋere maio â Israere maio mana‐naretec sâckeme nohec risienac. Erâ no Wofuŋ Anutuge numu hefârec ecnezepac.”
31 Eme Samuezi Saulo bâjâpeme rapic. Erâ Saulozi Wofuŋ numu hefârec ecnewec.
32 Eme Samuezi muwec, “Ameleke ŋicwofuŋ Agage e ʒira norao jowa wareniŋ.” Iŋuc mume Agagezi hâhâwic tâmiric Samuerao fisiwec. Ehuc muwec, “Hamoc hâtâne e rârâŋne‐jâmbâŋkekac.”
33 E iŋuc mume Samuezi muwec, “Ʒikagezi ŋokac ɋâric tâmiric hufiŋne bacjopawecte neŋgocge e ŋokac jaŋere ŋondeŋko ɋâric tâmiric jaha juzejec.” Iŋuc murâ Samuezi Giligali haeo Wofuŋte maio Agage hetâc qâtâcneme fewec.
34 Eme Saulo e Gibea hae‐ticnao rawec â Samue e wâc Rama haeo risiewec.
35 Eme Samue e Saulo mocwâc mi hohone juhame Saulore hâmoc dameŋ maickewec. Erâ sifu Samue e Saulore ki mamakuc ewec. Ehuc Wofuŋ e Saulo Israe ŋic jaŋere ŋicwofuŋ âkendâŋnewec irec busâqoc manawec.