19
Saulozi Dawidi qaocte basahuc juwec
1 Saulo e ŋokâ‐ticne Jonataŋ â kiŋaŋ qaqafâcne jaŋe Dawidi qaniŋte jazawec. Erâ ine Saulo ŋokâ‐ticne Jonataŋ e Dawidire boc ecnewec.
2 Irec Jonataŋzi Dawidi ʒiŋuc âzâcnewec: “Mamac‐nane e guocte
3 Eme no mamac‐nane qâtepe goki jucmu ira fanacmu. Ehuc gore erâ mamac‐nane dâŋ binaŋ ecnepemu. Eme dâŋ i me i bâfuapemuo gazapemu.”
4 Eme Jonataŋ e Dawidi mumbiaŋkehuc mamac‐ticne ʒiŋuc âzâcnewec: “Ŋicwofuŋ, go kiŋaŋŋicge Dawidirao bahac mi bâfuazemec, wemocte, e gorao bahac moc mi bâfuawec, erâ wâc kiŋaŋ biaŋne qagarewec.
5 E juju‐ticne qaisockehuc Filisa ŋic qâhâmowec. Ehame Wofuŋzi Israe ŋic bafic‐jopahuc bubiaŋ sâko bâfua‐jarewec. Eme go wiac i honehuc ʒeri emeŋ. Ehuc wemocte fuŋne tâmiricko Dawidi qahuc socticne hoŋkehuc bahac bâfuazo mukic?”
6 Eme Saulo e Jonataŋte dâŋ manarâ Wofuŋte ʒâŋeo ɋetickehuc Dawidizi mi hâmoocte mupaŋkewec.
7 Irec Jonataŋ e Dawidi hefârerâ dâŋ sasawa i mufuacne‐fârewec. Iŋuc ecnerâ mamac‐ticnerao jowa rame gie‐ticnao mocwâc ʒuhuckerâ juwec.
8 Juku ʒika mocwâc fuame Dawidizi Filisa ŋic jaŋehec qaqac eniŋte rawec. Ehuc râsi mâretec jopame wisembiŋ.
9 Eme Dawidi e gita‐ticne qahuc ŋewec â Saulo e ine ficticnao sându‐ticne barâ ŋehame Wofuŋzi mâro sâqocne ecneme ere maŋko huwec.
10 Eme Saulozi Dawidi sâpeo âke kindeŋneocte manasuhuc sându‐ticne wickehame Dawidizi bâricneme ra sâpeo kindeŋnerâ domawec. Iŋuc eme honerâ Dawidi e wisewec.
11 Ehame hae fureme Saulozi Dawidi qaocte manasuhuc kiŋaŋ qaqafâcne ejareme ra Dawidire fic somâckembiŋ. Iŋuc epie ŋonâŋ‐ticne Mikalizi Dawidi ʒiŋuc âzâcnewec: “Go ŋafe ʒira jujuge mi ŋezickecmuo ine tomâcko hâmocmu.”
12 Iŋuc murâ Mikalizi ŋowe‐ticne qâqâtâc kataŋko râeme hurâ wisewec.
13 Wiseme Mikalizi ɋâŋ qâqâtâc moc rorâ fofoo râeme foha noniŋ kanʒaŋnezi fofo bakicne i roŋgâŋkopec râerâ bilaŋkezi rufacnewec.
14 Eme Saulozi Dawidi roniŋte kiŋaŋ sorec‐jopame ra fisipie Mikalizi ʒiŋuc jazawec: “E huc bame fokac.”
15 Eme Saulozi Dawidi honeniŋte kiŋaŋŋic mocwâc sorec‐jopahuc ʒiŋuc jazawec: “Fofo‐ticnehec mâmâc rorâ bawarepie qape.”
16 Iŋuc jazame kiŋaŋŋic jaŋe Dawidire ficko raʒirâ ɋâŋ qâqâtâc fofoo fowec â noniŋ kanʒaŋzi fofo bakicne roŋgâŋkopec foha honembiŋ.
17 Irec Saulozi Mikali ʒiŋuc âzâcnewec: “Go wemocte eatucnuhuc râsi‐nane ecnetec wisejec?” Iŋuc mume Mikalizi dâŋ ʒiŋuc bâtikiecnewec: “E kecʒiŋuc nazajec irec epac, ‘Guzipore baficnutec wisepe.’ ”
18 Eme Dawidi e wiserâ raku Samuerao Rama haeo fisiwec. Ehuc Saulozi wiac ecnewec irec binaŋ bacne‐fârewec. Eme e â Samue jahe rarâ Naioti haeo jupic.
19 Ehame ŋic gâcne jaŋe Saulo ʒiŋuc âzâcnembiŋ: “Manakic, Dawidi e Naioti haeo jukac.”
20 Iŋuc mupie manarâ kiŋaŋŋic sorec‐jopame Dawidi roniŋte rambiŋ. Raku ra fisirâ Samuezi porofete guru micne bajareme findaŋdâŋ muhuc juhapie honec‐jopambiŋ. Honec‐jopapie Wofuŋte Mârozi fai‐jeŋicko heme jaŋe wâc jaŋerao ʒuhuckerâ findaŋdâŋ mumbiŋ.
21 Eme irec biŋe âzâcnepie manarâ Saulozi kiŋaŋŋic gâcne sorec‐jopame jaŋe wâc rarâ jaŋerao ʒuhuckerâ findaŋdâŋ jaha mumbiŋ. Iŋuc epie Saulo e harierâ kiŋaŋŋic mocwâc sorec‐jopame jaŋe rarâ iŋuc jaha findaŋdâŋ mumbiŋ.
22 Eme ʒâhec Saulo e jahac Rama haeo rawec. Raku opâ nombâŋ sâko Seku haeo ŋewec ira fisiwec. Ehuc wiowec, “Samue â Dawidi jahe wena jukopirec?” Wiome ŋic jaŋe ʒiŋuc âzâcnembiŋ: “Jahe Rama dâkâne moc ʒâŋene Naioti ira jukopirec.”
23 Iŋuc âzâcnepie irecnec fotâcnerâ Naioti haeo raocte rawec. Rahame Anuture Mârozi iŋuc jaha ecneme hatao rahuc rahuc findaŋdâŋ mumurâ raku Naioti haeo fisiwec.
24 Erâ e jahacne ŋaqi qoruc wiac‐ticne bâsuckerâ Samuere maŋfuŋko findaŋdâŋ muwec. Ehuc ʒoaŋ ʒorâ â ŋafe ʒora biuctac fowec. Iŋuc ewecte ŋic jaŋe ʒiŋuc mujumbieŋ: “Saulo e wâc porofete jaŋerao ʒuhuckewec me?”