18
Jonataŋzi Dawidihec ʒâʒâfic epic
1 Eme Dawidi e Saulo dâŋ iŋuc âzâcne tarame Jonataŋzi Dawidire ecneme maŋticne erea boc domawec.
2 Saulozi iŋuc honerâ ʒoaŋ ira sakareme juhuc mamac‐ticnerao mocwâc mi risiewec.
3 Jonataŋ â Dawidi jahe jahacnere boc ejactewec irec sâc maŋzi ʒâʒâfic ehuc heheʒakiec epic.
4 Ehuc Jonataŋzi ŋaqi rojuwec i hetararâ Dawidi râcnewec. Erâ maruku â ʒika â tepe â umbika‐ticne i mâmâc râcnewec.
5 Eme Saulozi Dawidi ʒikao ira me ira soreme rajujec i fârinehec ejujec. Iŋuc eme honerâ Saulozi momori jaŋere micne âkendâŋnewec. Âkendâŋneme ŋic omane jaŋe ere manapie sâckewec â Saulore fekicnefâc jaŋe wâc iŋuc jaha manapie sâckewec.
Saulozi Dawidi kisâ ecnewec
6 Dawidizi Goliata qarâ haeo risiehame momori jaŋe wâc haeo risiembiŋ. Risiehapie ŋokac jaŋe Israe hae sâc irecnec warembiŋ. Ehuc gae wowo ŋokac jaŋe ʒeri ehuc woŋgâŋ‐jeŋic qahuc gae woworâ ŋicwofuŋ Saulo bâfuaniŋte rambiŋ.
7 Ehuc ŋokac jaŋe bubiaŋko gae ʒiŋuc hembiŋ:
“Saulozi ŋic 1 tauseŋ jopawec
â Dawidizi ine 10 tauseŋ jopawec.”
8 Eme Saulo e irec mâretec aarickewec â dâŋ izi erao mi sâckewec. Eme ʒiŋuc muwec: “Jaŋe Dawidizi ŋic 10 tauseŋ jopawec muŋgopieŋ â nore muŋgopieŋ, e 1 tauseŋ sawa jopawec. Eme ʒi ŋicwofuŋ âkendâŋneniŋmu hâcne.”
9 Iŋuc murâ ʒoaŋ ira hâcne fuŋkerâ Dawidi kisâ ecnehuc hone jâjâpehuc juwec.
10 Ehame hae fureme Anutuzi mâro sâqocne moc ecneme Saulo sakioŋkewec. Iŋuc ecneme maŋne sifuckeme ficticnaoa dâŋ kosa barasa wosewec. Dawidi e ʒoaŋne ʒoaŋne ejujec iŋuc jaha gita‐ticne qahame wiac iŋuc hâcne fuawec. Saulo e ine sându‐ticne barâ ŋewec.
11 Eme Saulo e sându i ʒiŋuc muhuc wickewec: “No Dawidi sâpeo âke kindeŋnepe domazejec.” Muhuc wickewec. Eme Dawidizi bâricnehame arec jajahec ewec.
12 Wofuŋ e Saulohec juweczi e beherâ Dawidi dope hutuŋ ecnewec i honerâ Saulozi Dawidire hâwickewec.
13 Irec ficticnaonec bârârierâ momori 1 tauseŋ jaŋere micne âkendâŋnewec. Iŋuc ecneme Dawidi e rarâ ŋic micne bajarewec.
14 Micne bajareha Wofuŋzi bafickeme wiac sasawa ewec i moc mi ririwec.
15 Dawidi e wiac sasawa eme sâcke‐fârewec i Saulozi honerâ ere mâretec hâwicke sâqorewec.
16 Eme Israe ŋic â Judaŋic jaŋe ine Dawidizi ʒikao micne bajarerâ bânie‐jarehuc juwec irec erea boc ejarewec.
17 Eme Saulozi Dawidi ʒiŋuc âzâcnewec: “Ʒi mârâc otâ‐nane Meraba e hâcne ŋonâŋge eocte garepemu. Mâc, go ine nore erâ hâbi hâro jaha juhuc ʒika qazemec.” Saulo e ʒiŋuc maŋkehuc dâŋ i muwec: “No sifu mi qazepac, Filisa ŋic jaŋe sâcne qanʒepieŋ.”
18 Mume Dawidizi dâŋ kecʒiŋuc bâtikiecnewec: “No mo ŋic fekicne â mamac‐nanere garikiŋfâc jaŋe Israe maŋnao ʒâŋe biŋehec wena juŋgopieŋ irec noni ŋicwofuŋte kimo epemu?”
19 Eme Saulore otâ Meraba e Dawidi râcnenʒapiŋ dameŋko ine rorâ Maholati ŋic moc ʒâŋene Aderiele e râcnembiŋ.
20 Ehame Saulo otâ‐ticne moc ʒâŋene Mikali e Dawidire maŋne domawec. Eme i Saulo mufuacnepie maname sâckewec.
21 Ehuc ʒiŋuc maŋkewec: “No e râcnepe eki bitiŋ‐ticne eme Filisa ŋic jaŋe qanʒepieŋ.” Irec Saulozi mocwâc Dawidi ʒiŋuc âzâcnewec: “Go kimo‐nane.”
22 Iŋuc murâ kiŋaŋ qaqafâcne ʒiŋuc jazawec: “Ŋoŋe gâmbuŋko Dawidi ʒiŋuc âzâcneniŋ: ‘Manakic, ŋicwofuŋ e gore maname sâckekac â kiŋaŋ qaqafâcne nâŋe wâc gore boc enârekac. Irec go ŋicwofuŋte kimo ezemec.’ ”
23 Eme Saulore kiŋaŋ qaqafâc jaŋe dâŋ i Dawidi âzâcnembiŋ. Âzâcnepie dâŋ ʒiŋuc bâtikie‐jarewec: “Ŋoŋe manapie ŋicwofuŋte otâ roro i wiac afecne ekac me? I ŋic hapetac â waha qaqane no iŋucnezi sâcne eene me?”
24 E iŋuc mume Saulore kiŋaŋ qaqafâc jaŋe Saulorao risierâ Dawidizi dâŋ muwec i âzâcnembiŋ.
25 Âzâcnepie Saulozi dâŋ ʒiŋuc bâtikie‐jarewec: “Dawidi ʒiŋuc âzâcneniŋ: Ŋicwofuŋ e râsifâc‐ticne okacne jarehuc Filisa ŋic 100 jaŋere sahac tofa masunezi ŋokac furi eocte sawa manasukac.” Saulo e Dawidi qaisockehuc Filisa ŋic jaŋere meo hâmoocte manasuwec hâcne.
26 Eme Saulo kiŋaŋ qaqafâcne jaŋe Saulozi dâŋ muwec i Dawidi binaŋ bacnembiŋ. Binaŋ bacnepie mâsi iŋuc ehuc ŋicwofuŋte otâ rozo irec maname sâckewec. Eme dameŋ bakicne irec juwicnao
27 Dawidi e ŋicfâc‐ticne jaŋehec rarâ Filisa ŋic 200 joparâ sahac tofa‐jeŋicte masune i bawarerâ ŋicwofuŋte kimo eocte wosecnewec. Iŋuc eme Saulozi otâ‐ticne Mikali râcnewec.
28 Erâ ine Saulo e Wofuŋzi Dawidihec juwec â otâ‐ticne Mikalizi Dawidirea boc ecnewec iŋuc hone manac erâ
29 Dawidire mâretec hâwicke sâqorewec. Hâwicke sâqoreme Saulo e Dawidi râsi sanaŋ ecnewec.
30 Eme Filisa ŋic fekicne jaŋe Israe ŋic jaŋehec qaqac eniŋte rajumbieŋ. Rapie sâc Dawidi e Saulore ŋicfâc gâcne siric‐jopahuc Filisa ŋic mâretec jopa jâpec ejare jujec. E iŋuc ehuc ʒâŋe biŋe sâkohec ewec.