22
1 Eme Dawidi e hae i beherâ wise ra Adulam qânâ hawecko soŋkerâ juwec. Ira jume hahacfâcne â mamac‐ticnere wiacfâc jaŋe biŋe manarâ erao rambiŋ.
2 Ehame ŋic wiac izi me izi bâmâmâc‐jopawec â tofa fojarewec â wiac irec me irec manapie mi sâckewec jaŋe erao tumaŋne‐fârepie eki micne‐jeŋic juwec. Ŋic 400 heririŋ ehec jumbiŋ.
3 Eme Dawidi e irecnec Moabi mâreŋko hae moc ŋewec ʒâŋene Mizipe ira rawec. Ehuc mâreŋ irec ŋicwofuŋ ʒiŋuc muhuc wâsickewec: “Anutuzi norao gie weniŋuc jaha baocmu irec woŋec mana‐naretec neŋgoc mamac jahec‐nane gorao râec‐jofape juzepirec.”
4 Iŋuc murâ Moabi ŋicwofuŋtao râec‐jofame jahe Dawidizi hae sanaŋko ŋeŋe juju ewec dameŋ irec sâc ŋicwofuŋhec jujupirec.
5 Ehame porofete Gadezi Dawidi ʒiŋuc âzâcnewec: “Go hae sanaŋkoa boc mi juc, beherâ Juda mâreŋko rac.” Iŋuc âzâcneme Dawidi e hae sanaŋ i beherâ Hareta kâte mâreŋko rawec.
Saulozi Nobo haeonec taha bapa jopawec
6 Dawidi â ŋicfâcne jaŋe bâfuac‐jopakicne, biŋedâŋ iŋuc Gibea haeo Saulorao fisiwec. Â Saulo e ine sându‐ticne barâ tikitoŋko kasaŋ kasaŋ jâc nâkumucnao ŋehame kiŋaŋ qaqafâcne jaŋe rârec bârârec doma rambiŋ.
7 Eme irec ʒiŋuc jazawec: “Benjamiŋ ŋic, ŋoŋe hazec râeniŋ: Ŋoŋe Isai ŋokâ‐ticnezi waiŋ gie â giegaŋ gâcne ŋare‐fâreocte eŋarekac me? Erâ wâc ŋoŋe sasawa momori 1 tauseŋ â 100 jaŋere micne âkendâŋ‐ŋopaocmu me?
8 Eme irec hâcne ŋoŋe râsi enare‐fâreŋgopieŋ. Ŋokâ‐nanezi Isai ŋoka‐ticnehec maŋ mocjaha epic i ŋoŋeraonec moczi moc mi naza‐jâmbâŋkewec. Me ŋoŋeraonec moczi nore busâqoc manarâ ŋokâ‐nanezi no nahacne kiŋaŋ qaqa ecneme somâcnuhuc jukac i wâc mi mufua‐narembiŋ.”
9 Iŋuc mume Edomŋic moc ʒâŋene Doege e Saulore kiŋaŋ qaqafâc jaŋehec domahuc dâŋ ʒiŋuc bâtikiecnewec: “No Isai ŋokâ‐ticne e Nobo haeo Ahitubu ŋokâ‐ticne ʒâŋene Ahimelec erao fisime honepo.
10 Eme Ahimeleczi ere erâ Wofuŋ mu wioc ecnehuc hatare nâsiŋ â Filisa ŋic Goliatare ʒika iŋuc râcnewec.”
11 Iŋuc mume ŋicwofuŋzi taha bapa Ahimelec â wiacfâcne taha bapa sasawa Nobo haeo jumbiŋ jaŋerao kiŋaŋ sorec‐jopame rarâ ejarepie ŋicwofuŋtao fisi fua‐fârembiŋ.
12 Fua‐fârepie Saulozi muwec, “Ahitubu ŋokâ‐ticne go hazec râec.” Mume Ahimeleczi muwec, “Sâcne, bomboŋ‐nane.”
13 Mume Saulozi âzâcnewec, “Go Isai ŋokâ‐ticne ŋohe wemocte râsi enarekopirec? Go ere erâ Anutu mu wioc ecnehuc nânâ â ʒika râcnemeŋ. Eme e irec dameŋ ʒi râsi enarerâ somâcnuhuc jukac.”
14 E iŋuc mume Ahimelec dâŋ ʒiŋuc bâtikiecnewec: “Kiŋaŋ qaqafâcge jaŋeraonec mozi Dawidire sâc juhuc ŋicwofuŋte kimo jukac? Erâ e ŋic omane mâcne, kiŋaŋ qaqafâcge jaŋerao ʒuhucketec gie fekicnao jukac.
15 Irec no ere erâ Anutu mu wioc ecnepe sâqorewec me? Aricne, irec ŋicwofuŋ go kiŋaŋŋicge no â garikiŋfâc‐nane nâŋe maŋgâŋ dâŋ mi munârezemec. Kiŋaŋŋicge no dâŋ sasawa mukomec i pitic siŋsiŋne moc mi mana huŋgaŋke‐jâmbâŋkekopac.”
16 Mume ŋicwofuŋzi muwec, “Ahimelec, go gahacne â ŋicfâcge sasawa ŋoŋe hâmo‐jâmbâŋkeniŋmu.”
17 Iŋuc murâ momori fuŋfuŋfâcne gâjoŋnao domambiŋ jaŋe ʒiŋuc jazawec: “Ajoc, Wofuŋte taha bapa jopaniŋ. Dawidihec heheʒakiec ehuc wisewec i mana‐bipiehuc sifu mi mufua‐narembiŋ.” Eme ŋicwofuŋte kiŋaŋ qaqafâc jaŋe Wofuŋte taha bapa jopaniŋte mejeŋic ŋemâckewec.
18 Jaŋe iŋuc epie ŋicwofuŋzi Edomŋic ʒâŋene Doege e ʒiŋuc âzâcnewec: “Doege, goki faharerâ taha bapa jopac.” Iŋuc mume Doegezi ʒoaŋ ira taha bapa 85 ŋaqi qaŋqaŋ rojumbiŋ jaŋe qâhâmoc‐jopawec.
19 Ehuc taha bapa jaŋere hae i ʒikazi imackewec. Erâ ŋic ŋokac, naru motec â kogoc geune, erâ doŋgi â lama bulimakao wiac i ʒikazi jopa miziewec.
20 Ehame Ahitubu ŋokâ‐ticne Ahimelecte ŋokâ mocjaha, ʒâŋene Abiata e wiserâ Dawidirao rawec.
21 Rarâ Dawidi binaŋ bacnehuc Saulozi Wofuŋte taha bapa qâhâmoc‐jopawec i âzâcnewec.
22 Âzâcneme Dawidizi Abiata ʒiŋuc muhuc âzâcnewec: “Edomŋic Doege e dameŋ ira ijaha juwecte biac ʒiŋuc manapo: E Saulo âzâcne‐jâmbâŋkeocmu. No wiacfâcge jaŋere juju i rofe ʒoraŋko râepo.
23 Irec go nohec ʒira juc, mi hâwicguoc. Jujuge gowac roocte manasuhuc basacgukac e nore juju wâc mâmâc nowac roocte basacnukac jaha. Go nohec ʒira sahac furu sâcne jucmu.”