23
Dawidi e Keila haeo â mâreŋ burocnao juwec
1 Juku ŋic gâcne jaŋe Dawidi ʒiŋuc âzâcnembiŋ: “Manakic, Filisa ŋic jaŋe Keila haeo ʒika qahuc padi rowaŋfic‐jeŋickonec padi jowac roŋgopieŋ.”
2 Iŋuc mupie manarâ Dawidi e Wofuŋ mu wioc ecnehuc muwec, “No sâcne rarâ Filisa ŋic jopapemu me?” Mume Wofuŋzi Dawidi ʒiŋuc âzâcnewec: “Ajoc, go rarâ Filisa ŋic jopahuc Keila hae ŋezickec.”
3 Ehame Dawidire ŋicfâc jaŋe ʒiŋuc âzâcnembiŋ: “Manakic, Juda mâreŋko ʒira hâwic‐nâpoekac, eme Keila haeo rarâ Filisa momori guru ʒikare fânoc hejarenaŋmuo ine wiac hâhâwicne fua‐nâreocmu.”
4 Jaŋe iŋuc mupie Dawidizi Wofuŋ mocwâc mu wioc ecneme Wofuŋzi muwec, “Ajoc, go faharerâ Keila haeo huc. No Filisa ŋic gore meo râec‐jopapemu hâcne.”
5 Wofuŋzi iŋuc mume Dawidi â ŋicfâcne jaŋe Keila haeo rarâ Filisa ŋic jaŋehec qaqac erâ mâretec imac‐jopahuc bulimakaofâc‐jeŋic jowac rorâ bacjopa wisembiŋ. Dawidi e iŋuc ehuc Keila hae rune batarac‐jopawec.
6 Eme Ahimelec ŋokâ‐ticne Abiata e taha bapa ŋaqi rorâ wiserâ Keila haeo Dawidirao ra fisiwec.
7 Ehame ŋic gâcne jaŋe Dawidizi Keila haeo fisiwec irec biŋe i Saulo âzâcnembiŋ. Âzâcnepie Saulozi muwec, “Anutuzi menaneo râekac. E jahac hae sacsanaŋ‐ticnehec ira raʒime hata ʒickecnekac hâcne.”
8 Iŋuc murâ Keila haeo hurâ Dawidi â ŋicfâcne somâc‐jopahuc jopaniŋte ŋic hefârec‐jopawec.
9 Eme Dawidi e Saulozi wiac hehesicne ecneocte maŋkehuc juwec i manarâ taha bapa Abiatazi taha bapa ŋaqi bafisiocte âzâcnewec.
10 Erâ Wofuŋ numucnehuc muwec, “O Israere Wofuŋ Anutu, kiŋaŋŋicge no Saulozi Keila haeo warerâ nore erâ hae ʒi bâsiroweocte maŋkehuc jukac irec biŋe manakopac.
11 Eme Keila hae rune jaŋe dockerâ ere meo râecnuniŋmu me? Saulo e biŋe‐ticne manakopac iŋuc jâmbâŋ wareocmu me? O Israere Wofuŋ Anutu, no kiŋaŋŋicgezi numu‐garekopacte nazac.” Dawidi e iŋuc numume Wofuŋzi muwec, “E ware‐jâmbâŋkeocmu.”
12 Iŋuc mume Dawidizi Wofuŋ ʒiŋuc muhuc wiocnewec: “Keila hae rune jaŋe dockehuc no nahacne â ŋicfâc‐nane nâŋe Saulore meo râec‐nâponiŋmu me?” Mume Wofuŋzi muwec, “Jaŋe dockerâ erao râecguniŋmu hâcne.”
13 Iŋuc mume Dawidi â ŋicfâcne 600 heririŋ jumbiŋ jaŋe faharerâ Keila hae beherâ ŋe qatara jumbiŋ. Ehame Saulo e Dawidizi Keila hae beherâ wisewec biŋe i manarâ raocte muwec i behewec.
14 Eme Dawidi e mâreŋ burocnao raku Ʒifi tiki mâreŋte hae sanaŋko ŋeŋe juju ewec. Ehame Saulozi qaocte dameŋ sâc basahame sifu Anutuzi mi manacnewec.
15 Dawidi e Saulozi qâhâmoocte fisiwec i mana tarawec. Eme Dawidi e Ʒifi mâreŋ burocnao Horesa haeo juwec.
16 E ira juhame Saulo ŋokâ‐ticne Jonataŋzi Anuture ʒâŋeo iqickerâ mu keteŋ ecnewec.
17 Ehuc muwec, “Mi hâwicguoc, mamac‐nanezi go mi bâfuacguocmu. Go Israere ŋicwofuŋ erâ juhaŋte no gore wahamicne erâ gâjoŋgao juzokopac. Mamac‐nane Saulo e wiac ʒi manakac wâc.”
18 Eme jahe Wofuŋte maio ʒâʒâfic sanaŋne epic. Ehuc Dawidi e Horesa haeoa juhame Jonataŋzi hae‐ticnao risiewec.
19 Eme Ʒifiŋic jaŋe Gibea haeo Saulorao rarâ ʒiŋuc muhuc âzâcnembiŋ: “Dawidi e nâŋerao Hakila tiki mâreŋko Jesimoŋ hae juwicnao Horesa mâreŋko ira hae sanaŋko soŋkerâ jukac.
20 O ŋicwofuŋ, maŋgezi muocmu sâc picpac jaha wahac. Eme nâŋe gore meo râenaŋmu.”
21 Iŋuc mupie Saulozi muwec, “Wofuŋzi jambuŋ‐ŋopazejec. Ŋoŋe sowine nore busâqoc manaŋgopieŋ.
22 E eeatuc ŋic sâric, iŋuc mupie manakopac, irec ŋoŋe ʒi rarâ mu wioc ejâmbâŋkehuc wena jaha jukac â mozi honeme jukac i mâmâc mananiŋ.
23 Ŋoŋe rarâ ŋondeŋ wenimoira jâmbâŋ soŋkerâ jukac i hone‐fârerâ dâŋ fârinea barâ warenʒepieŋ. Eme no ŋoŋehec fârâ mâreŋ ijaha jukacko Judaŋic gurune gurune jaŋerao basapemu.”
24 Eme jaŋe Ʒifi mâreŋko bânierâ rambiŋ.
Eme Dawidi â ŋicfâcne jaŋe Jesimoŋ hae juwicpec Maoŋ mâreŋ burocnao jumbiŋ.
25 Ehame Saulo â ŋicfâcne jaŋe basaku bâfuaniŋte rambiŋ. Rapie Dawidizi manarâ Maoŋ mâreŋ burocnao qorac moc ŋewec ira ra soŋkerâ juwec. Eme Saulo e iŋuc manarâ Dawidi jâperâ Maoŋ mâreŋ burocnao rawec.
26 Rarâ Saulo e tiki ŋifecnao juhame Dawidi â ŋicfâcne jaŋe tiki ŋifecnao jumbiŋ. Eme Saulo â ŋicfâcne jaŋe Dawidi â ŋicfâcne rocjopaniŋte orâŋ‐jopapie Dawidizi wiseocte fâro jaha ewec.
27 Ehame kiŋaŋŋic moczi Saulorao rarâ ʒiŋuc muwec: “Go bâruŋ jaha warec, Filisa ŋic jaŋe mâreŋ‐nâŋecko râsi fisiŋgopieŋ.”
28 Eme Saulo e Dawidi jâpeocte muwec i beherâ Filisa ŋic jopaocte rawec. Eme mâreŋ ŋondeŋ irec ʒâŋe Rârâwiŋ Qorac mujumbieŋ.
29 Eme Dawidi e irecnec rarâ Eŋgedi hae sanaŋko ŋeŋe juju ewec.