5
Wofuŋte ʒâʒâfic katapazi Filisa mâreŋko juwec
1 Filisa ŋic jaŋe Anuture katapa rorâ Ebeneʒe haeonec Asidode haeo reŋke rambiŋ.
2 Erâ Anuture katapa barambiŋ i Dagoŋte ufuŋko baferâ Dagoŋ nemure ɋâŋ qâqâtâc domawec irec heririŋnao hepie ŋewec.
3 Ŋehame hae fureme Asidode hae rune jaŋe furic uupicte faharerâ honepie Dagoŋ nemure ɋâŋ qâqâtâc e Wofuŋte katapa ŋewec maŋfuŋnao rândiŋkerâ hetutuckerâ fowec. Eme jaŋe Dagoŋ nemure ɋâŋ qâqâtâc i rorâ ŋeŋe‐ticnao mocwâc hepie ŋewec.
4 Izi hae mocwâc fureme furic uupicte faharerâ honepie Dagoŋ nemure ɋâŋ qâqâtâc e ombâŋne sawazi ŋeŋe‐ticnao domawec â qizecne â mejahecne ine herickerâ Wofuŋte katapa ŋewec irec maŋfuŋnao mâreŋko fowec.
5 Irec hâcne dameŋ ʒiŋuczia Asidode haeo taha bapa mecne â ŋic i me i Dagoŋ nemure ufuŋko feeŋgopieŋzi Dagoŋte ŋeŋe bakicne i mi âte uaeŋgopieŋ.
6 Eme Wofuŋ e meticnezi Asidode ŋic ŋokac bomac‐jopahuc mume iroŋzi jopa bâʒâic ejare‐jâmbâŋkewec. Ehuc ʒuc ejareme Asidode hae â rârec mâreŋ forawec i fusucma‐fârembiŋ.
7 Ehame Asidode hae rune jaŋe wiac fua rawec i honerâ ʒiŋuc mumbiŋ: “Anuture mezi nâŋe nâŋâcne â nemu‐nâŋec Dagoŋ boc bomac‐nâpokacte Israe ŋic jaŋere Anuture katapazi nâŋâcnao mi ŋezejec.”
8 Iŋuc murâ dâŋ râepie rame Filisa ŋic fekicne sasawa jaŋe tumaŋne‐fârepie ʒiŋuc jazambiŋ: “Nâŋâc Israe ŋic jaŋere Anuture katapa i weniŋuc enaŋmu?” Wiopie jaŋe dâŋ ʒiŋuc bâtikie‐jarembiŋ: “Israe ŋic jaŋere Anuture katapa i Gati haeo barazo.” Iŋuc murâ hae ira barambiŋ.
9 Barapie Wofuŋ e hae i râsi boc ecnewec. Erâ hae irec ŋic ŋokac kâcɋene â piticne maŋ bâsifuc ejarerâ bâʒâic‐jopahuc mume iroŋzi sahac‐jeŋicko fua rawec.
10 Irec jaŋe Anuture katapa i râepie Ekoroŋ haeo ra fisime hae rune jaŋe honerâ hahaŋne bahuc mumbiŋ: “Jai, jaŋe Israe Anutu‐jeŋicte katapa i nâŋe nâŋâcne â ŋicfâc‐nâŋec nâŋe nâpoocte bawareŋgopieŋ.”
11 Iŋuc murâ dâŋ râepie rame Filisa ŋic fekicne sasawa jaŋe tumaŋnepie ʒiŋuc jazambiŋ: “Ŋoŋe Israe ŋic jaŋere Anuture katapa i nâŋe nâŋâcne â ŋicfâc‐nâŋec nâŋe nâpozacte râepie hae mâreŋ‐ticnao risieoc.” Wofuŋ e hae irec ŋic bomac‐jopahuc ima gie sâko bawec.
12 Eme hae irec ŋic mi hâmombiŋ jaŋe iroŋzi jopame kio wâuŋa‐jeŋiczi sawao fehuc fowec.