6
Filisa ŋic jaŋe Anuture ʒâʒâfic katapa bârisiembiŋ
1 Wofuŋte katapazi Filisa ŋic jaŋere mâreŋko mosa 7 juwec.
2 Eme Filisa ŋic jaŋe taha bapa â faŋfaŋdâŋ mumu jaŋerao dâŋ ʒiŋuc râehuc mumbiŋ: “Nâŋâc Wofuŋte katapa i weniŋuc enaŋmu? Nâŋâc wemo wiachec râepene hae mâreŋ‐ticnao risieocmu i nâzâniŋ.”
3 Mupie ʒiŋuc jazambiŋ: “Ŋoŋe Israe ŋic jaŋere Anuture katapa i bârisiehuc okacne kiŋte taha bacnenʒepieŋ. Iŋuc epie ine ŋoŋerao bibiaŋ fuaocmu â Wofuŋte mezi wemocte ŋoŋerao mi râriekac irec fuŋne wâc mana‐fâreniŋmu.”
4 Mupie jaŋe dâŋ ʒiŋuc bâtikie‐jarembiŋ: “Kiŋte taha i wemo wiac bâtikiecnenaŋmu?” Iŋuc wiopie okacne ʒiŋuc jazambiŋ: “Filisa ŋic fekicne ʒare‐jeŋic sâc manahuc iroŋ hawari golzi bakicne 5 â ʒuc hawari golzia bakicne 5 jaha râepie razejec. Wiac hâhâwicne izi hâcne ŋoŋe â fekicnefâc‐ŋeŋic rocŋopawec.
5 Irec wiac fua‐ŋarewec irec hawari jaha banʒepieŋ, erâ mâreŋ ʒi imackembiŋ ʒuc i jaŋere hawari wâc banʒepieŋ. Iŋuc erâ Israere Anutu e muac baafec ecnenʒepieŋ. Iŋuc epie Anutuzi ŋaŋacne â nemufâc‐ŋeŋic erâ mâreŋ‐ŋeŋic sâcne ŋezic‐ŋopaocmu mecne.
6 Ŋoŋe wemocte Aigita ŋic â Farao maŋsanaŋ embiŋ irec sâc eniŋmu? Anutu e mâsi qâreŋ fuŋne fuŋne ejarekume jaŋe Judaŋic râec‐jopapie rambiŋ.
7 Ajoc, keretac ɋâricne moc barâ susu bapa bulimakao jajahec sahac furu kioŋ mi râe‐jactekicne jahe rocjofarâ keretac ɋeticke‐jacteniŋ â motec jahec‐jekic ine sapao bârisiec‐jofaniŋ.
8 Iŋuc erâ Wofuŋte katapa rorâ keretacko henʒepieŋ. Erâ kiŋte taha wiac golzi bakicne Wofuŋ râcnezo eŋgopieŋ i katapa piticne mocko râepie hume ŋifecnao hepie ŋezejec. Iŋuc efârerâ râepie hae mâreŋ‐ticnao razejec.
9 Erâ soŋaŋkehapie Bete‐Semesi hae mâreŋ‐ticnao raocmuo ine ʒiŋuc muzo: Anutuzi hâcne wiac hâhâwicne ʒi bâfua‐nârekac. Â iŋuc mi fuaocmuo ine ʒiŋuc manazo: Anuture mezi mi nâpowec, wiac i mâc iŋuc fua‐nârewec.”
10 Eme ŋic jaŋe iŋuc erâ susu bapa bulimakao jajahec i rocjofarâ keretac ɋeticke‐jactembiŋ, â motecne jahe ine sapao râec‐jofarâ motâc hejactembiŋ.
11 Ehuc Wofuŋte katapa â ʒuc hawari golzi bakicne i, erâ iroŋ hawari bakicne i mâmâc keretacko râembiŋ.
12 Eme bulimakao jahe hata fuŋkepic i mi qâsoriehuc dândâŋne jaha Bete‐Semesi haeopec owackehuc rapic. Eme Filisa ŋic fekicne jaŋe bâjâpec‐jofarâ raku Bete‐Semesi haere mao fisimbiŋ.
13 Eme Bete‐Semesi haeonec jaŋe wâneŋko padi‐jeŋic qa roro ehuc juhapie Wofuŋte katapazi fisime honerâ ʒeri embiŋ.
14 Ehame keretaczi raku Bete‐Semesi rune Josua ere gieo niniŋkerâ ŋewec, mâreŋ ŋondeŋ ira ine qânâ sâko moc ŋewec. Eme jaŋe qânâ irec fainao jâczi keretac bakicne i hesuckerâ ʒoc izi bulimakao jajahec i hâcne Wofuŋ taha bâzi rikecnembiŋ.
15 Ehame Lewiŋic jaŋe Wofuŋte katapa â golzi hawari wiac barâ guruckekicne katapa i rorâ qânâ sâko irec fainao hepie ŋewec. Eme ʒoaŋ ira Bete‐Semesi hae rune jaŋe Wofuŋ taha bâzi rikecnembiŋ.
16 Ehame Filisa ŋic fekicne 5 jaŋe wiac i honerâ ʒoaŋ ijaha Ekoroŋ haeo risiembiŋ.
17 Filisa ŋic jaŋe hae ʒiŋuc jaŋere manasuhuc kiŋte taha Wofuŋ râcneniŋte golzi iroŋ hawari wâŋ wâŋ bambiŋ: Asidode, Gaza, Asikaloŋ, Gati â Ekoroŋ.
18 Erâ wâc golzi ʒuc hawari bambiŋ i Filisa ŋic fekicne 5 jaŋe ŋec juc embiŋ hae i jaŋere ʒare manasuhuc bambiŋ. Erâ hae gâcne sacsanaŋ‐jeŋichec â hae piic piic gâcne sac tâmiric i jaŋere mâmâc bambiŋ hâcne. Eme Wofuŋte katapa bararâ fainao hembiŋ qânâ sâko i mumutaniŋ erâ Bete‐Semesi rune Josua ere gieo ŋeweczi ŋekac jaha.
19 Bete‐Semesi haeonec Jekoniare ɋâricfâc jaŋe Wofuŋte katapao fipie huwecte Wofuŋzi ŋic 70 jopawec. Eme ŋic jaŋe Wofuŋzi guru‐jeŋickonec ŋic bocjaha jopawecte ki busâqoc embiŋ.
20 Iŋuc erâ Bete‐Semesi ŋic jaŋe mumbiŋ, “Anutu tirine ʒi ere maio mozi sâcne sanaŋkerâ domaocmu? Nâŋâc katapa ʒi weni jaŋerao sâcne râepene raocmu?”
21 Iŋuc murâ Kiriati‐Jearim haere ŋecjucfâc jaŋerao kiŋaŋ sorec‐jopahuc ʒiŋuc mumbiŋ: “Filisa ŋic jaŋe Wofuŋte katapa bârisiembiŋ. Irec ŋoŋe waha rorâ bahefâniŋ.”