20
Sebazi maŋrâŋgeŋ bâfuawec
1 Eme hae mâreŋ ijaha ŋic repic qapicne moc juwec, ʒâŋene Seba. E Benjamiŋ ŋic moc ʒâŋene Bikiri ere ŋokâ. Eki qeŋ qahuc ʒiŋuc muwec: “Nâŋâc Dawidihec wiac moc wirec mi fonârekac. Isai ŋokâ‐ticne eraonec wiac moc mi rauckerâ juŋgopeneŋ. O Israe ŋic, fic hae‐ŋeŋic sâc rafâreniŋ!”
2 Iŋuc mume Israe ŋic jaŋe Dawidi râpeckerâ Bikiri ŋokâ‐ticne Sebarao qohota‐fârembiŋ. Eme Judaŋic jaŋe ŋicwofuŋ‐jeŋictao qohota sanaŋkerâ bâjâpepie Jordaŋkonec Jerusalem haeo rambiŋ.
3 Eme Dawidi e Jerusalem haeo ficticnao risiewec. Ehuc juwicnao ŋokac mamare 10 rocjoparâ juku ficticne soŋaŋkeniŋte Jerusalem haeo behec‐joparâ rawec, ŋokac i jaŋe hâcne fic mocko soŋaŋ‐jopapie juniŋte râec‐jopawec. Ehuc wiac gâcne bâmockerâ râe‐jarewec, e jahac ine jaŋehec moc mi fowec. Eme ŋokac i jaŋe hozec hawari tinac fic ira soŋaŋ‐jopapie ŋehuc juhapie hâmoc dameŋ‐jeŋic maickewec.
4 Eme ŋicwofuŋzi Amasa dâŋ ʒiŋuc âzâcnewec: “Go rarâ Judaŋic ejaretec ʒoaŋ gie bapa jahec â moc irec maŋnao norao fisiniŋ, erâ go gahacne wâc fisizemec.”
5 Iŋuc mume Amasa e Judaŋic hefârec‐jopaocte rawec. Ra juhame dameŋ bacnekicne i qâtiriwec.
6 Eme irec Dawidizi Abisai âzâcnerâ muwec, “Bikiri ŋokâ‐ticne Seba e Abisalomte sâc jâuruhuc wiac hâhâwicne enâreocmu. E hae sacsanaŋ‐ticnehec ira raʒirâ ŋehuc ʒâŋe hândâŋ‐nâŋec ripozacte go bomboŋgere kiŋaŋ qaqafâc rocjopatec jâperâ raniŋ.”
7 Iŋuc âzâcneme Abisai e bânieme Joabe â ŋicfâcne erâ Kereti ŋic â Peleti ŋic tâpirihec sasawa jaŋe rambiŋ. Jaŋe Bikiri ŋokâ‐ticne Seba jâperâ raniŋte Jerusalem haeonec faharembiŋ.
8 Erâ Gibeoŋ haeo qânâ sâko moc ŋewec ira fisihapie Amasazi ware bâfuac‐jopawec. Eme Joabe e momori jaŋere ŋaqi heme hume juwec. Erâ fainao becsahac moc ʒika‐ticne kânoŋ‐ticnao domaha ombâŋnao jomawec. Erâ Amasa bâqiŋkeocte rahuc unuckerâ
9 ʒiŋuc muhuc Amasa wiocnewec: “Qomâ‐nane, go sâcne jukomec me?” Iŋuc murâ muduckeocte mecʒâwânao rowec.
10 Amasa e ine Joabezi menao ʒika bawec i mi honewec. Eme Joabe e wiac izi arec mocjaha sawa âeckeme honezi mâreŋko rucneme hâmowec.
Eme Joabe â ɋaticne Abisai jahe ʒuhuckerâ Bikiri ŋokâ‐ticne Seba jâpepic.
11 Ehame Joabere ŋicfâc jaŋeraonec ŋic moczi Amasa fowecko domahuc muwec, “Moc e Dawidire biŋe jukacko ine Joabe bâjâpeoc.”
12 Eme Amasare qâŋɋâŋzi hata ʒâʒâŋiŋko soc ruahuc fohame ŋic jaŋe fisirâ Amasa honehuc sâc niniŋkerâ domambiŋ. Eme ŋic e iŋuc epie honec‐joparâ Amasa qâŋɋâŋ‐ticne hataonec rorâ kâteo sârockeme hume ŋaqi moczi qofackewec.
13 Eme Amasa hataonec bârârieme ŋic jaŋe ʒuhuckerâ Joabe bâjâpehuc Bikiri ŋokâ‐ticne Seba jâpembiŋ.
14 Eme Seba e Israe gurune gurune jaŋerao fotâcne‐fârerâ Abe‐Bete‐Maka haeo fisiwec. Fisime Bikirire tucne tofane jaŋe tumaŋne‐fârerâ erao qohotambiŋ.
15 Ehame Joabehec jumbiŋ ŋic i jaŋe Abe‐Bete‐Maka haeo fisirâ somâckehuc hae i heropieniŋte mâreŋ qapie feme ira domahuc fuŋkerâ tuŋzi sâpe âeckembiŋ.
16 Iŋuc epie ŋokac maŋɋârâŋhec moczi haeonec wirahuc muwec: “Hazec râeniŋ, hazec râeniŋ. Ŋoŋe Joabe ecnepie ʒira mai wareme dâŋ âzâcnepe.”
17 Iŋuc mume Joabe e ŋokaczi domaweckopec ra domame wiocnerâ muwec, “Go hâcne Joabe me?” Wiocneme muwec: “No hâcne ʒi.” Iŋuc mume ʒiŋuc âzâcnewec: “Kiŋaŋ naruge no dâŋ muzo ekopacte hazec râe‐jâmbâŋkezemec.” Iŋuc mume Joabezi muwec, “No hazec râekopac.”
18 Iŋuc mume ŋokaczi ʒuhuckerâ muwec, “Mârâc qâqiŋdâŋ moc ʒiŋuc mujumbieŋ: ‘Ŋoŋe dâŋ okacne manazore Abe haeo raniŋ,’ iŋuc mupie dâŋ i me i fua jujec i tara jujec.
19 No Israe guruo wamane â urucne juekopac. Goki ine Israe guruo hae ʒizi neŋgoc moc ekac i bâsirowecmurâ juju gie bakomec. Go Wofuŋte biŋe hae ʒi bâsirowecmu me?”
20 Iŋuc mume Joabezi dâŋ ʒiŋuc bâtikiecnewec: “No hae ʒi bâsirowepemurâ moc mi manasukopac, aricne.
21 Ŋoŋe Eferaim tiki mâreŋkonec ŋic moc Bikiri ŋokâ‐ticne ʒâŋene Seba e ŋicwofuŋ Dawidi râsi ecnehuc qazo ewecte e sawa nârepie nâŋe hae ʒi sâcne beherâ ranaŋmu.” Iŋuc mume ŋokaczi Joabe dâŋ ʒiŋuc bâtikiecnewec: “Manakic, qizec‐ticne haesac râpeo behepene hufâocmu.”
22 Iŋuc murâ ra maŋɋârâŋ‐ticnere sâcko ŋic jaza‐fâreme jaŋe Seba upene qâtâcnerâ qizec‐ticne Joaberao behepie huwec. Jaŋe iŋuc epie Joabe e qeŋ qame momori jaŋe hae i beherâ hae‐jeŋic sâc râwiŋnembiŋ. Ehame Joabe e wâc ŋicwofuŋtao Jerusalem haeo risiewec.
Dawidi micnefâcne jaŋere ʒâŋe
(Sam II 8:15–18; Bin I 8:23–26)
23 Joabe e Israe momori sasawa jaŋere micne juwec. Eme Jojada ŋokâ‐ticne Benajazi ine Kereti â Peleti ŋic jaŋere micne juwec.
24 Ehame Adoramzi ine kiŋaŋ gie baniŋte mujarekicne jaŋe soŋaŋ‐jopawec â Ahiludu ŋokâ‐ticne Josafatazi ine dâŋ mujujec.
25 Ehame Sewazi ine qâqâreŋ ŋic juwec, erâ Zadoko â Abiata jahe ine taha bapa jupic.
26 Eme Jairi ŋic Ira e wâc Dawidire taha bapa jaha juwec.