3
1 Saulore kikefuŋ â Dawidire kikefuŋ jaŋerao rârâsi i dameŋ ʒora fowarehuc juwec. Eme Dawidi e dameŋ sâc tâpiri‐ticne fahareme Saulore kikefuŋ jaŋere tâpirizi uneŋ uneŋ qaʒue wahawec.
Heboroŋ haeo Dawidire ŋokâfâc fuambiŋ
(Bin I 3:1–4)
2 Heboroŋ haeo Dawidire ŋokâfâc ʒiŋuc fuambiŋ: Mârâc fufua ere ʒâŋe Amnoŋ. E Jesere haeonec Ahinoam eki rowec.
3 Eme ere râpeo Karamele haeonec Nabali ere hozec Abigaizi Kileaba rowec. Kileabare râpeo Gesuru ŋicwofuŋ Talamaire otâ Makazi Abisalom rowec.
4 Eme Abisalomte râpeo Hagitizi Adonia rowec. Adoniare râpeo Abitalizi Sefatia rowec.
5 Eme Sefatiare râpeo Dawidire ŋonâŋ Egelazi Itiream rowec. Dawidire ŋokâfâc iŋuczi Heboroŋ haeo fuambiŋ.
Abenezi Dawidihec ʒâʒâfic moc enicte maŋkewec
6 Dawidi â Saulo jahere kikefuŋko ʒikazi fohame jaha Abene e Saulore kikefuŋ qizec‐jopahuc jaŋere ŋondeŋko qacboc‐ticnehec juwec.
7 Saulo e Ajare otâ ʒâŋene Rizipa e mamare rowec. Eme Isibosezi Abene âzâcnerâ muwec, “Go mamac‐nanezi ŋokac mamare rowec ehec wemocte fomec?”
8 Eme Abene e Isibosere dâŋ i manarâ aarickeme ʒiŋuc muwec: “No Judaŋic jaŋere qâto me? No dameŋ ʒi mamacge Saulore kikefuŋ, ɋafâcne â âgofâcne sâsec‐jopahuc doc bacgurâ Dawidire meo mi râecguekopac. Eme go miŋecgac ŋokactao bahac bâfuapac irec erâ dâŋ enarekomec.
9 Ʒi ine Anutuzi baficnume Wofuŋzi Dawidirao wiac eocte mupaŋkewec irec sâcko giene bape fua‐jâmbâŋkezejec.
10 No Saulore kikefuŋ bawahac‐joparâ Dawidizi Israe â Judaŋic jaŋere ŋicwofuŋ juocte âkendâŋnepe uucmaŋ‐ticnezi Daŋ mâreŋkonec fuŋkerâ raku Bere‐Seba haeo fisizejec.”
11 Iŋuc mume Isibosezi Abenere hâwickeme dâŋ okacne mi bâtikiecnewec.
12 Eme Abenezi Dawidirao kiŋaŋ sorec‐jopahuc muwec, “Mâreŋ ʒi more? Nâhâc ʒâʒâfic‐nâhec moc bâfuanac, eme no gohec juhuc Israe ŋic gorao ʒuhuc‐jopa‐fârepemu.”
13 Iŋuc mume Dawidizi dâŋ ʒiŋuc bâtikiecnewec: “Biaŋne, no gohec ʒâʒâfic epemu. Mâc, wiac ʒiŋuc ecmurâ sawa mukopac: Go norao ʒira mâc mi warezemec. Go Saulore otâ Mikali e jowa ware‐narezemec.”
14 Eme Dawidizi Saulo ŋokâ‐ticne Isiboserao kiŋaŋ sorec‐jopahuc muwec, “Go ŋonâŋ‐nane Mikali, Filisa ŋic jaŋere sahac tofa masune 100zi biŋe qanarekicne, e bârisie‐narezemec.”
15 Eme Isibosezi kiŋaŋ sorec‐jopame jaŋe rarâ ŋowe‐ticne Laisire ŋokâ Palatie, eraonec jowa warembiŋ.
16 Jowa warepie ŋowe‐ticne e bâjâperâ kio kio raku Bahurim haeo fisiwec. Eme Abenezi risieocte âzâcneme risiewec.
17 Eme Abenezi Israe micne jaŋehec ʒiŋuc muc manac ewec: “Ŋoŋe Dawidizi ŋicwofuŋ juŋareocte dameŋ ʒoricne mana warehuc jueŋgopieŋ.
18 Eme miŋecgac hâcne dameŋne maickekacte âkendâŋnezo. Wofuŋ e Dawidi mupaŋkecnehuc dâŋ ʒiŋuc muwec: Kiŋaŋŋic‐nane Dawidizi micne ehame Israe ŋicfâc‐nane jaŋe Filisa ŋic jaŋere meonec mecne â kisâfâc‐jeŋic gâcne jaŋere meonec batarac‐jopa‐fârepemu.”
19 Eme Abene e dâŋ i Benjamiŋ guru jaŋe mufua‐jarewec wâc. Ehuc Israe ŋic â Benjamiŋ guru jaŋe ʒeŋgoma dâŋ irec maŋ mocjaha embiŋ i Dawidi âzâcneocte Heboroŋ haeo rawec.
20 Rame ŋic 20 jaŋe bâjâpembiŋ, eme Heboroŋ haeo fisipie Dawidizi tiwâ bâzi ejarewec.
21 Eme Abenezi Dawidi ʒiŋuc âzâcnewec: “No rarâ Israe ŋic hefârec‐jopape uucmaŋgao warerâ gohec ʒâʒâfic enʒepieŋ. Eme go weni jaŋerea egareme sâc ŋicwofuŋ juzemec.” Iŋuc mume Dawidizi bubiaŋko Abene râeme risiewec.
Joabezi Abene qâhâmowec
22 Abene e Dawidizi râeme Heboroŋ haeonec risiehame Dawidire ŋicfâc jaŋe Joabehec hae mocko ʒika qaku mafa sâkohec risiembiŋ.
23 Joabe â momorifâcne jaŋe haeo risiehapie Joabe ʒiŋuc âzâcnembiŋ: “Nera ŋokâ‐ticne Abene e ŋicwofuŋ honeocte ware juku akioa risiejec.”
24 Iŋuc âzâcnepie Joabezi ŋicwofuŋtao rarâ ʒiŋuc muhuc âzâcnewec: “Go wemo mâsi emec? Go Abene fisime ehec mâmâc juku râetec rajec.
25 Go Nera ŋokâ‐ticne Abenere fuŋne manakic, e mâc eatucguhuc fisijec. E rac warecge â juju bapage weniŋuc jaha fokac i hone manac eocte fisijec i.”
26 Joabe e iŋuc murâ Dawidire fickonec waharâ kiŋaŋ sorec‐jopame jaŋe rarâ Abene hatao Sira opâ nombâŋko ira rahuc juhame jowapie Heboroŋ haeo risiewec. Dawidi e wiac iŋuc fuawec i mi manawec.
27 Eme Abene e Heboroŋ haeo risiehame Joabezi bucko dâŋ âzâcneocte tinac jowarâ sacmotâcko bâŋoriehuc ira ɋaticne Asahelere okacne bunao âeckeme hâmowec.
28 Eme ʒâhec Dawidizi biŋe manarâ muwec, “Nera ŋokâ‐ticne Abenere socte kiŋ i no â uucmaŋ‐nane nâhere faio mi feha Wofuŋte maio kiŋ tâmiric juraʒihuc juzeperec.
29 Soc hoŋkekicne irec kiŋ i Joabe e jahacnao â garikiŋfâcne jaŋerao fozejec. Ehame Joabere kikefuŋko wicbâroŋ me wakoc me gunuhec juju me ʒikao hâhâmo me rorocte hâmo sipiric ee i fohuc juzejec.”
30 Abenezi ʒikao ɋajekic Asahele Gibeoŋ haeo qâhâmowecte hahac jahecne Joabe â Abisai jahe Abene qâhâmopic.
31 Eme Dawidizi Joabe â ŋic ehec jumbiŋ i jaŋe jazarâ muwec, “Ŋaqi qoruc‐ŋeŋic bâsuckerâ mateŋ hepie huoc. Ehuc Abenere erâ ki mamakuc eniŋ.” Iŋuc murâ Dawidi e jahac qâŋɋâŋ katapa bâjâpewec.
32 Eme jaŋe Abene qâŋɋâŋ‐ticne Heboroŋ haeo duckembiŋ. Ehuc ŋicwofuŋ e Abenere ʒâŋeruŋko mâretec kiome ŋic ŋokac jaŋe wâc bafickehuc ʒeŋgoma kiombiŋ.
33 Eme ŋicwofuŋ e Abenere ʒiŋuc muhuc gae makuc hewec:
“Abene e hâmoc kosane iŋucne hâmoocte moc mukicne me?
34 Mege muczi mi qakicne,
kikege kâpâcwâruzi wâc mi qakicne,
ŋic moczi ŋic kosane jaŋere meo waha qaekac
iŋuc tinac waha qameŋ hâcne.”
Gae iŋuc heme ŋic jaŋe ere erâ mocwâc kiombiŋ.
35 Eme ŋic jaŋe ʒoaŋ ŋeha jaha Dawidirao fisirâ nânâ nâocte fotariecnepie mupaŋkehuc ʒiŋuc muwec: “No ʒoaŋ mi huhame nânâ wiac i me i moc nâ bâuac epe Anutuzi bâtiŋnuzejec.”
36 Eme ŋic ŋokac jaŋe ʒeŋgoma manapie sâckewec. Ehuc ŋicwofuŋzi wiac sasawa ewec irec manapie biaŋke‐fârewec.
37 Eme ʒoaŋ ira Israe ŋic sasawa jaŋe ʒiŋuc mana tarambiŋ: Nera ŋokâ‐ticne Abene qâhâmokicne i ŋicwofuŋzi manaha mi ekicne.
38 Eme irec ŋicwofuŋzi kiŋaŋ qaqafâcne ʒiŋuc jazawec: “Israe guruo ŋic fekicne â ʒâŋe biŋe sâkoheczi ʒoaŋ ʒira hâmojec i ŋoŋe mi manaŋgopieŋ me?
39 No ŋicwofuŋ jupemurâ wokemaŋ rua‐narekicne, erâ ine ʒoaŋ ʒira sifu rokawekopac. Zeruja ŋokâfâcne keci jaŋe siricnuhuc maŋ sanaŋ jâmbâŋ eeŋgopieŋ. Irec Wofuŋzi sâqocne bapa moc e hehesic‐ticnere sâcko okacne râcnezejec.”