4
Isibose qapie hâmowec
1 Eme Saulo ŋokâ‐ticne Isibose e Abenezi Heboroŋ haeo hâmowec irec biŋe manarâ hâbi‐ticne ŋeŋgoroŋkewec â Israe ŋic jaŋe wâc fâsâe‐fârembiŋ.
2 Eme Saulore ŋokâ ere ŋic jajahec jahe ʒikaŋic jaŋere micne jupic, mocte ʒâŋe Bana â mocte ʒâŋe Rekaba. Jahe Beroti haeonec, Benjamiŋ ŋic moc ʒâŋene Rimoŋ, ere ŋokâ jahec. Beroti hae i Benjamiŋ guru jaŋere,
3 erâ ine hae irec rune jaŋe wiserâ Gitaim haeo ra jaba jumbiŋzi juŋgopieŋ jaha.
4 Saulo ŋokâ‐ticne Jonataŋ ere ŋokâ moc juwec, e kike jahecne mâmâc jaha sâqorekicne. E jara‐ticne 5 bazurâ juhame Saulo â Jonataŋ jahere hâmoc biŋedâŋzi Jesere haeonec fisiwec. Eme soŋaŋ‐ticne jauŋ ŋokac moc eki rorâ wisewec, erâ wiseocte fâro ehuc motec batataŋneme waha qarâ qâpuriŋkewec. Motec ʒâŋe‐ticne Mefibose.
5 Eme Beroti ŋic Rimoŋte ŋokâ jahec Rekaba â Bana jahe faharerâ raku guŋpitic eme Isibose e fomanaha ficticnao fisipic.
6 Eme motâc soŋaŋ e padi qâzuckehuc juku guŋguŋne ecneme fowec. Fohame Rekaba â ɋaticne Bana jahe jâururâ fotâcne raʒi Isibose ficmaŋ‐ticnao fofoo fohame qâhâmopic.
7 Qâhâmorâ upe‐ticne qâtâcnerâ qizecne rorâ ŋafeoa wâneŋ hatao raku Heboroŋ haeo fisipic.
8 Erâ Isibosere qizec i Dawidirao barapic. Ehuc ŋicwofuŋ ʒiŋuc âzâcnepic: “Saulo ŋokâ‐ticne Isibose, e kisâ egarehuc qâhâmocguocte eekac ere qizec ʒi. Wofuŋzi miŋecgac ŋicwofuŋ gore erâ Saulo â ɋâricfâcne jaŋerao okacne bazukac.”
9 Eme Dawidizi Beroti ŋic Rimoŋte ŋokâ jahec Rekaba â ɋaticne Bana dâŋ ʒiŋuc bâtikie‐jactewec: “Bahac â râsi fuŋne fuŋne irecnec bataracnuwec Wofuŋ e jujâmbâŋkekacte
10 no ŋic moc e Saulo hâmoc‐ticnere biŋedâŋ bafisirâ nazahuc, biŋedâŋ biaŋne âzâcnekopac muha rorâ Zikilaga haeo biŋedâŋ‐ticnere okacne qâhâmopo.
11 Eme ŋic hehesicne ŋohe ŋic tiŋne ficticnaoa guŋ fohame qâhâmopic i tofamâc foocmu moc mupire! No miŋecgac ere socte okacne ŋoherao batarahuc mâreŋkonec sâcne mi bârârâŋ‐ŋofapemu me?”
12 Iŋuc murâ ŋicfâcne ejareme jofarâ me kike‐jekic hetâcnerâ Heboroŋ haeo opâ ʒâkâŋ qaŋeŋnao ɋetic‐jofapie waha domapic, â Isibosere qizec ine Heboroŋ haeoa Abenere ʒâŋeruŋ hawecko duckembiŋ.