3
Ha Leɏakiʼn Lasikod
(Mat. 12:9-14; Luk. 6:6-11)
1 Si osaʼn Sabyechu, ummoy kasin si Jesus si sinagoga. Inggew chi osaʼn leɏakiʼn lasikod chi imala.
2 Inggew bo cha taguʼn mansingisingit si mangichiɏumancha kan Jesus. Tamtamchagencha siya lu palin-awaola lasikod si Sabyechuʼn man-illongan.
3 Ot kalan Jesus si hachiʼn leɏakiʼn lasikod, “Umalika utla.”
4 Ot kalan Jesus kan chicha losan, “Himma ipalubus chi lintog taku un makwa si Sabyechu? Koon taku bibiɏu willu lawwing? Taguwon taku tagu willu patoyon taku?” Ngim gummigillokcha.
5 Summanga si Jesus si lilangɏangala chicha, manchachauy bo ti latangkin chi somsomokcha. Ot kalala si hachiʼn leɏaki, “Uyachom chi imam.” Ot iluyedla ot bummaɏu imala.
6 Lummawa cha Pariseo ot ummoycha kan cha tagun Herod ta tuɏagoncha in-ilonchaʼn mangtoy kan Jesus.
Tilun-ud Cha Amod Un Tagu Si Jesus
7 Ummoy cha Jesus kan cha disipulusla si teɏanteg chi byeybyey. Litun-ud cha amod un taguʼn lampeɏpuʼd Galilee ya Judea,
8 Jerusalem ya Idumea, ya inggew cha uchum un lampeɏpuʼd chomang chi chewwang un Jordan ya cha lampeɏpu si sakup chi Tyre ya Sidon. Ummoycha intullong si Jesus ti lanchilameg cha pin-ala killingwa.
9 Gapu si kaachun cha tagu, imbyegan Jesus kan cha disipulusla un isagalacha byangka ta inggewala, ta achi maipit kan cha amod un tagu.
10 Gapu ta achu cha pilalin-awala, langgunggulod cha losan un lasakit kan Jesus ta appachencha siya.
11 Ot intullong pun cha taguʼn laaɏan si Jesus, lampalintumingcha si sangwalala ot illipkawchaʼn, “Sika Alak Apudyus!”
12 Ngim ammala bililin chichaʼn achicha ibyegbyega chi mipanggop kan siya.
Chilutukan Jesus Cha Lasawaɏan Si Chuwaʼn Apostolesla
(Mat. 10:1-4; Luk. 6:12-16)
13 Lalagecha si Jesus si osaʼn tagudtud. Ot ilayagela cha taguʼn piola, ot ummoycha kan siya.
14 Chilutukala cha lasawaɏan si chuwa un lingachenla apostoles un mambiɏunla, ya ibuunla chichaʼn umoy mangibyegbyega si Bibiɏuʼn Chameg.
15 Illidchela chicha si kalobbongan un mameɏyaw kan cha aɏan.
16 Allaya ngachen cha chilutukalan lasawaɏan si chuwa: Si Simon (lingachalala si Peter);
17 cha James kan John un alak Zebedee (lingachalan Jesus chicha, Boanerges un ha piolaʼn uguchon, “Alak chi kuchuɏ”);
18 si Andrew, si Philip, si Bartholomew, si Matthew, si Thomas, si James un alak Alphaeus, si Thaddaeus, si Simon un mangisasakkit si ilila,
19 ya si Judas Iscariot un langiyibit kan Jesus.
Si Jesus Kan Beelzebul
(Mat. 12:22-31; Luk. 11:14-23)
20 Oli pun ummoyon si Jesus, ot kasin bo lachagup cha achuʼn tagu ked mippun in-iloncha un mangan.
21 Chingngeɏn pun chi paminyala killingwala, ummoy cha ta itallaycha siya ti kalan cha uchum un taguʼn latingtingangan siya.
22 Awed cha uchum un mimistulun chi lintog un lampeɏpuʼd Jerusalem, kalancha, “Awed kan siya si Beelzebul un pangat cha aɏan ked siya chi langatod kan Jesus si kilabyelin un mameɏyaw kan cha aɏan.”
23 Ot ilayagen Jesus chicha ot lan-alig un kalala, “Ha makwa kamman un italung Satalas peɏyawon chi long-egla?
24 Ulay siluʼn turay lu lappun timpuyug cha tagu un mantitillalungcha mampapatoy, lalakachaʼn mayam-an.
25 Katchi bo makwa si simbyeyan, lu lappun timpuyugcha un mantitillalungcha mampapatoy maasibbyakawcha.
26 Ked lu makapatoy si Satalas si asin-aaɏanla, un lappun timpuyugcha, lappun kakwaancha ked mangkiged chi kalobbongancha.
27 Lappun makaslok si byeɏoy chi mangkoscheɏʼn tagu ked lan-aɏa kan cha kukkuwala lu achila yan ulaon byaɏuchon chi mangkoscheɏ, asila ot samsamon cha kukkuwala.
28 “Tuttuwa ibyegak kan chikayu, makwa un mapakawan cha losan un byasuɏn cha tagu ya cha lawwing un ibyegbyegacha mipanggop kan Apudyus.
29 Ngim lu silu mangibyega si lawwing mipanggop si Ispiritun Apudyus, achipun mapakawan ing-inggala.”
30 Imbyegan Jesus chi hachi ti imbyegbyegacha un, “Laaɏan siya.”
Cha Ibilang Jesus Un Susuludla Ya Ilala
(Mat. 12:46-50; Luk. 8:19-21)
31 Ot gummatong chi ilan Jesus ya cha susuludla, illinggew cha si paway ot impaayegcha si Jesus.
32 Amod cha taguʼn ummaammuy un langalluɏung kan Jesus, ot imbyegacha kan siya, “Awed si ilam ya cha susuludlu ud paway un ipaayeg chika.”
33 Summongbyat si Jesus un kalala, “Silu si ilak ya silu cha susuludku?” Ti lu silu cha mangwa si pion Apudyus, chicha cha ibilangkuʼn ilak ya susuludku.
34 Ot lanlangɏanga kan cha taguʼn langalluɏung kan siya ot kalala, “Itullongyu! Allaya cha ibilangku un ilak ya susuludku!
35 Ti lu silu mangwa si pion Apudyus, chicha cha ibilangkuʼn ilak ya susuludku.”