4
Alig Chi Sumimitan Cha Liwagaweg
(Mat. 13:1-9; Luk. 8:4-8)
1 Kasin si Jesus ummoy lantudtuchu si igid chi byeybyey ud Galilee. Gapu ta achu-achu cha taguʼn langalluɏung kan siya, summakyat siya si byangka ot ummamuy, ked inggew cha tagu si teɏanteg.
2 Ot achu cha intudtuchula kan chicha si pangngalig un kalala,
3 “Chongɏonyu! Inggew chi osaʼn taguʼn ummoy lanwagaweg si bukeɏ.
4 Si lanwagawagelad chi bukeɏ si umala, liweɏsi cha uchum si chaɏan ot ummoy cha sissiwit tiluktukan.
5 Cha uchum un bukeɏ liweɏsicha si kabyetbyetuwan un akit chi pitala. Lasalimitcha ti manyapit chi pitala.
6 Ot ummilit pun, lakɏawcha ot leɏangucha ti achipun lachaɏom chi lamutcha.
7 Cha uchum un bukeɏ liweɏsicha si lassi-lassi ot summimitcha. Ngim chummakeɏ cha lasi, ot laaɏung cha muɏa, ot achipun lamunga.
8 Ngim liwagaweg cha uchum un bukeɏ si mallogway un pita. Mampogos chi tummubuwancha ya chummakɏancha ot lamunga cha losan si sintutlumpuɏu bungan cha uchum, sin-oolompuɏu ya singgagasut cha bungan cha uchum.”
9 Ot kalan Jesus, “Chongɏonyu ya somsomkonyu pion chi inyaligku un uguchon.”
Ha Pion Chi Liwagaweg Un Bukeɏʼn Uguchon
(Mat. 13:10-17; Luk. 8:9-10)
10 Ummabus pun si Jesus, ummoy cha lasawaɏan si chuwaʼn disipulusla ya cha uchum un lanchongeɏ kan siya, ilimuscha pion chi inyaliglaʼn uguchon.
11 Ot kalala kan chicha, “Impatagammuk kan chikayu chi palimod mipanggop si Mampangatan Apudyus. Ngim kan cha uchum un achipun mamati, pangngalig chi mitudtuchu kan chicha,
12 ‘Ti ulay itutullongcha, achipuncha maila. Ya ulay chochongɏoncha, achipuncha maawatan.
Ta lu somsomkoncha, ked maawatancha, mansagungcha kan Apudyus ked pakawalola chicha.’ ”
Imbyegan Jesus Chi Pion Chi Pangngalig Chi Lanwagaweg Un Uguchon
(Mat. 13:18-23; Luk. 8:11-15)
13 Hachi ked, kalan Jesus kan chicha, “Lu achipunyu maawatan chi pangngalig alla, simma in-ilonyuʼn makaawat si uchum un pangngaligku. Allaya pion chi pangngalig un uguchon:
14 Ha lanwagaweg, inwagawegla ugud Apudyus.
15 Cha liweɏsi si chaɏan miyalig cha si taguʼn langngeɏ si ugud Apudyus, ngim kakma ummoy si Satalas ot kilaanla ugud Apudyus un chingngeɏcha.
16 Ked cha liweɏsi si kabyetbyetuwan, miyalig cha si taguʼn langngeɏ si ugud Apudyus ot kakmacha ilawat un silalagsak.
17 Ngim achipun lummamut chi ugud Apudyus si somsomokcha. Oli pun, gumatong chi masuklutancha ya lapaligatancha gapu si langawatancha si ugud Apudyus, ot achipuncha intuɏutuɏuy un mamati ngim kakmacha lan-awichen chi pammaticha.
18 Ked cha liweɏsi si lassi-lassi, chicha cha taguʼn langngeɏ si ugud Apudyus,
19 ngim gapu si chanchaleg chi biyeg, ya gosgos chi bilaklang, ya akokos cha losan un byaleg un pioncha, laoy cha langaɏung si ugud Apudyus un chingngeɏcha, ked siya achipuncha mamungaan.
20 Ngim cha liwagaweg si pitan mallogway, chicha cha taguʼn langngeɏ si ugud Apudyus ked tiluttuwacha. Ot lamunga pammaticha si sintutlumpuɏu, sin-oolompuɏu ya singgagasut cha uchum.”
Achipun Makwa Un Malakkobyen Chi Silaw
(Luk. 8:16-18)
21 Kalan Jesus kan chicha, “Tonggem kamman chi silaw ked lilakkobyem si chungchung? Willu iggam kamman si guweb chi katli? Chakampun, ti misap-eɏ si ustuʼn papattayala.
22 Somsomkonyu yan. Lappun mitataɏu un achipun mitokweɏ. Ya losan un achipun matagammuwan si sala, gumatong chi timpun mipakaammu.
23 Lu awed laingaan kan chikayu, chongɏola otyan.”
24 Ot kalala bo kan chicha, “Ammanyu chochongɏon chi ibyegak kan chikayu, ha koonyu kan cha uchum, hachi bo koon Apudyus kan chikayu, ngim sinchumadlu chi koola.
25 Ha taguʼn tumuttuwa si chingngeɏla, machogchog-an chi maawatala. Ngim ha taguʼn achipunla koon chi chingngeɏla, makaan ulay akit un laawatala.”
Ha In-ilon Chi Chumakɏan Chi Liwagaweg Un Bukeɏ
26 Intuɏuy Jesus un lan-ugud un kalala, “Ha Mampangatan Apudyus miyalig si osaʼn taguʼn ummoy lanwagaweg si bukeɏ si umala.
27 Masuyop si lilabi ya bummangon si biligbigat. Ked ha muɏala, summimit ya chummakeɏ. Ngim achipun chi hachiʼn tagu ammu lu hilu in-ilon chi muɏalan chummakeɏ.
28 Ti ha pita langipatubu kan cha muɏa ked mamungacha. Umulan tumubu, lamusbus, oli ked lootong.
29 Ked lu meum, ummoyla aliyon si man-aali.”
Ha Alig Chi Bukeɏn Chi Mustasa
(Mat. 13:31-33; Luk. 13:18-19)
30 Ot kalan Jesus, “Simma miyisuwan chi Mampangatan Apudyus? Simma miyaligela?
31 Isun chi bukeɏn chi mustasa, siya kabyen-itan un bukeɏ un imuɏan chi tagu si pita.
32 Ngim lu chumakeɏ, siya kachakɏan un muɏa ya mangkalachu pangala un makwaʼn malukbutan chi sissiwit.”
33 Hachi in-ilon Jesus un lantudtuchu kan cha tagu un achu inyuseɏlaʼn pangngalig ta awed kan chicha lu maawatancha.
34 Inyuseɏla pangngalig kan cha losan un intudtuchula. Ngim ummabus cha pun kan cha disipulusla, ammala impakaawat kan chicha.
Pilagilok Jesus Chi Byali
(Mat. 8:23-27; Luk. 8:22-25)
35 Lummaschom pun si hachiʼn eɏgew, kalan Jesus kan cha disipulusla, “Intaku si chomang chi allaʼn byeybyey.”
36 Ot tilelancha cha achuʼn tagu. Lallugencha si byangka un lalluluggalan Jesus. Illinggew bo cha uchum un byangkaʼn lakaoy kan chicha.
37 Umooli pun, maeg ga gummatong chi lapigsan byali ot pin-an chi challuyun saksakyabyen chi byangka ot mapmaplu byangka si chelum.
38 Inggew si Jesus si ammutan chi byangka un lamupungngan un lasusuyop. Bilangon cha disipulusla siya un kalancha, “Mistulu, achipunka kamman machalagen un allaʼn milutob taku?”
39 Bummangon si Jesus ot pilagilokla byali un kalala, “Ustun!” Ot kalala bo si challuyun, “Gumilokka!” ot lumin-awa taɏun.
40 Ot kalan Jesus kan cha disipulusla, “Pakayuggey umogyat? Ha lappun gey pammatiyu?”
41 Ngim laslaschaawcha ot lan-asi-imuscha, “Himmaga taguʼn alla? Ulay chi byali ya challuyun ked tuttuwaoncha siya!”