104
God Utuda, Evada A Endada, Roera Nanjogo Setiri Sirorusira Aindae, Sakai Saore!
1 Arie namoako! Bajari dae sakai saone! Arie Bajari, nanda God, tomanakogo mo, nimori.
Ninda tamo asugari mo, usasa duroghae aimi asugedo iresa.
2 Ni tofo usasa aimi doghedo iresa. Ni utu kau sasoro darari gusesi.
3 Ninda nati da gima mo, foroga ikáda iti simbugusesi.
Kotugo foroga mo, ninda ghasemo dae budo, yaura da ghabuda vose deingheraesa.
4 Yaura mo, ninda aghi kakatori, edo avaraka bubura mo,
ninda saramana kakatori.
5 Nine simbugeteso endaé nunda vasada susu gambu takegha edo, javi itatako jo ae arira.
6 Enda mo, ni evaimi emboi afurugarigo usesi. A doriri barago evaimi afurugusira.
7 Avata, ni uvu isambu dombuda avito sisesa ainda sifoda ne oju sufuseri.
Ni koko fuge sisesa da sifo aminda ne sumbudo era dadabuseri.
8 Uvu doriri mane do gisighe vose tevisada fetetiri, doriri mane isagha ututusira.
Oroko nunda vasa nine simbugusesa aminda irira.
9 Ni enda sekago afurugeure dae tano garusesa ava, nu itako jo jarigari da kaugo iraeri.
10 Nine eoso, enda tevisa karevada uvu kirikara ghuse sumburaira,
kotugo enda jiro fumbari da soróda barago uvu sumburaira.
11 Taima da sino fuka uvu daba aminda mindiraera,
taima da donki (donkey) uvu daba ava rise, dubo jo saghae eraira.
12 Ika mane uvu tinguda iritirira ainda jokada, rika mane mogha fafatu da fitido beka sise, iritirá gheraera.
13 Ni utuda ghe borija muteaso enda jiro fumbari etoda vovosegeraira,
eoso endada ninda esimbugari aimi bedo eraira.
14 Borumakava mindore dae sise nine eoso kikisa vivitigeraira, kotugo namane roera veka mane vareda govedo bayau bu mindoro dae sedo, enda esimbugeaso vivitigeraira.
15 Aminguse, asi vaini govedo bambu rise dubo jama tafuse, orivi muka bu dombu jighoro jaraghurari,
kotugo farava inge rise, fakina baore dae sedo amingusesi.
16 Lebanon aminda ika mainada babai Bajari nunda tofodae sedo govusira, borija teriago buraera.
17 Rika mane, nenda mogha aminda itiraera. O rika ebena da kakaugo mane
maina ainda ikada nenda mogha fifitigeraera.
18 Taima gouti babaigo ne kunika da iritirá gheraera,
kotugo kaisi aroro tokáda junge iritirá gheraera.
19 Tambuno mo, ghaeko baimara da tano ijugare dae sise, nine seteso sirorusira.
Kotugo iji sifo reda ya voseraira ava nine seoso, nu kasama use ya voseraira.
20 Nine seoso tumba ainda jokada taima sino fuka isambu foa buvudo ghatagheraera.
21 Raiyoni seka babojegari gangara ghae nenda oka bayau God nine muturaesa ava bu mindari dae, kakova eraera.
22 Iji vitiraira amo, ne sekago jovereghe ya nenda tokáda fafaseraera.
23 Amingurureoro, evetu genembo eredo ya buvu nenda saramana eraera,
kotugo saramana use iroro, ungobu eraira.
24 Arie Bajari, roera digari futo emo nine usesi!
Roera isasambu dubo kotise e gogoghombusesi!
Sino fuka, sivoro kororo mane dombu eni dombu eni nine eteso, aimi enda bedo edo irira.
25 Eva barago kotore, teria kotugo beraghari. Oka, kotugo roera dombu eni dombu eni,
babaimi a veveyako ava jokáda iritirera, jo tegari da kaugo mo iraeri.
26 Bouti mane eva etoda sumbu ya foa gheraera, kotugo gambauva
nombura da kaugo babaigo ava eteso aminda yaru use irira.
27 Ne isasambu nenda ighoi sifoda nimoa gigitururoro, nenda uvu bayau nine muturaesa.
28 Nenda bayau rea muturaesa, ne ava mindiraera.
Sino fuka nine unduraesa, isambu inono beka irá gheraera.
29 Ni gukai muturaesa ainda sifoda, ne oju eraera.
Ninda janje asegari nemokena buraesa amo, ne amburaera, kotugo fonja aimi usesa,
aminda jovereghe fonja jineraera.
30 O ni enda eminda jebuga seka sirorare dae saresa amo, ninda Asisi mutaso ne siroredo fetarera.
31 Nanda uju enda eminda, Bajari da duroimi beda edo evovo dae iraeti!
Nu rea setiri sirorusira aindae Bajari nune ivuga are dae resena.
32 Nu fuge enda giraira amo, enda daradara gheraira.
Nu doriri mane nunda ungoimi dereraira amo, ne imbosi gombe gambe geraera.
33 Na enda eminda ghousa mavega irarena, Bajari kena yaru sise irarena.
Sifo ghousa God kena yaruimi sakai sise irarena, ambari tano.
34 Nanda yaru sarena aindae nu ivuga aeti, ai resira amo,
nanda ivuga Bajari kena ghe foa gheraira.
35 Nanda uju ari eko embo enda eminda ava sosighi aetesi.
Ari ekoko embo ava ambu tefo aeteri.
Arie namoako! Bajari dae sakai saone!
Bajari dae sakai saore!