105
God Nunda Natofo Kaifa Use Tavo Eraira.
1 Namonde Bajari dae aiyakoe saore! Nu teria beká irira aindae, osa saore!
Nune rea usira aindae, endada oro oro isambukena osa siruroro ningore!
2 Bajari dae yaru sise, sakai saore! Nune roera eveva gaveva nanjogo ututusira aindae,
numokena yaruimi sakai saore!
3 Namonde mo, nunda tofo ágido ivuga aore! Namonde maveju maveju numoa tumonde baingeraera,
nundae ivugaghae vure jasedo ghaore!
4 Bajari kena yasivu, sonemba tambove! A kotugo, sifo ghousa numoa tumonde bainghuse irivu!
5-6 God da saramana kato Abraham da imemisiri gamemisiri kena resena, ningivu!
Kotugo nunda imendi Jacob da veka nune gategusira ava, eminge kotovo dae resena, ningivu!
God da tano gi dudukugharigo, a kotugo nu nange Abraham ondi da gitofu ijujari dae sisira, ava kotevu!
7 Bajari mo, namonde God ri. Nunda Agho Dari mo, reighi isasambudae sisira.
8 Nu kotua gatise, rea ari sisira ava evovodae amingudo yarira. Nunda beka gajari mendeni isambu barago ghaeko evia inono evovodae nune use irarira.
9 Nune Abraham ghae kotua gatise rea setero fefetusira,
kotugo nunda beka gajari Isaac kena sisira ábarago edo gharira.
10 Bajari Jacob ghae dabade sekago kotua gatise, emingari sisira, amo eviri:
11 “Reighi Keinani (Canaan) ava nane mutono, ninda tofodae baresa.” sisira.
12 Sifo amo God da natofo reighi Keinani (Canaan) aminda mo,
jo anjaga iraeri, ne esa embo amingo ava iriari.
13 Ne yabayaba ghuse, oro eninda reighida ghe ya reighi enikena ghedo ghuseri.
Ne kotofu enikena buvudo, kotugo ya kotofu enikena buvudo ghuseri.
14 Avata, God jo doyari mave eniimi bouvu mema nemokena mutaeri.
Ne kaifa use, nune kini (king) nanjogokena nange ghoghora sedo ghusira, amo eviri:
15 “Nanda saramana kakato gategusena evia, erá deove!
Kotugo nanda feroveta barago erá dereove!” God aminge sedo ghusira.
16 Avori Bajari setiri baimara ava reighi Keinani aminda sirorusira.
Kotugo nenda bayau isambu nune saghimbe rurusira.
17 Nu amingusira, avata anakora nunda natofo gategusira ainda genembo eni Joseph,
sabua are dae oriro usera ava, giti dirigetiri isira.
18 Nunda ata seni (chains) auri arimi bundiseri a kotugo nunda dubo auri eniimi bundiseri.
19 Aminge iriri, nune gimasa irise, rea osa sisira amo, beká sirorusira.
Joseph geka beká vanembo sedo ghusira ava, geka Bajari numokena sisira, ai siroretiri gosuseri.
20 Sifo aminda, Egypt emboda kini (king) oro oro nanjogo kaifa edo ghusira aimi setiri, dibura do buvurutusira.
21 Etiri, kini setiri, Joseph Egypt da gavana a roera isambu reighi Egypt aminda ainda bajari edo irei.
22 Kini amingusira amo, nune setiri gavana da babojegari a kini da dengoro indari kakato barago,
Joseph da sari ningari edo irero, nunda geka da amboda amboda aoro dae sisira.
23 Aminge fetetiri, Joseph numamo Jacob ningi eredo, núbarago ira,
Noah da mandi Ham da imemesiri jokáda Egypt aminda buvudo, esa embo da kaugo ava edo irá ghedo ghusira.
24 Bajari setiri, Jacob da imemesiri digarigo siroruseri.
Amingusera aindae, nenda fakina aimi gitofuda fakina ava do darigusira.
25 Nune etiri, Egypt emboimi natofo Israel embo ava imboe gamboe useri. Aminguse,
Israel embo deredo ghuseri.
26 Amingero, nunda saramana kato Moses diriguse God Moses da koro Aaron barago,
gategedo dirigetiri nengae jovereghe Egypt iseri.
27 Nene God da tano gi dudukughari ava ututeoro gido ghuseri,
a tano gae gitida ava reighi Egypt aminda ututedo ghuseri.
28 God setiri reighi aminda tumba jinjanghusira, avata, Egypt embo nunda geka jo ningae useri.
29 Nune setiri, nenda uvu isambu ororo jinetiri, oka mane isasambu amomonjeguseri.
30 Nenda reighi tomanako isambu gerakuimi bedo usira. Amingiri, kini da nati barago nemo vanembo usira.
31 A kotugo God setiri, soinimi a jejeraimi funghuse reighi tomanako nemo vanembo useri.
32 Nune borija beká bureguse setiri, borija dombu eni yaughari kau ghamana da kaugo aimi diríri,
biria tarighusira.
33 Nune sosighi use, nenda vaini da asi a ika figi seraera isambu de bunununghetiri vovoseguseri.
34 Nune furore dae aghi etiri, sisi mane, jo tegari da kaugo irae aimi fera buvurutuseri.
35 Nene ika igi mane reighi jokáda isasambu mindi tefo useri. Vareda bayau barago isambu mindi tefo useri.
36 Ainda amboda God Egypt embo da vide jamena bebego detiri sirivo useri. Aminguse nu Egypt embo da fakina da susu ava de tisisira.
37 Amingetiri, Israel embo era, Egypt embokena nenda guri sosighi use, ruruseri.
Bero, God ne unumbetiri, Egypt do buvurutuseri. Ne tamo kae gego, fakinaghae buvurutuseri.
38 Egypt embo nendae oju usera aindae, Israel embo ne do darigetero, dubo jama beká useri.
39 God forogaimi nunda natofodae sasoro dadudurureari, tumbaghae usasa mutare dae sedo,
avaraka mutudo ghusira.
40 Ne benunu setero, rika ribo da kaugo avavago futusira,
kotugo roera farava da kaugo utuda ghe muteari bu mindido ghuseri.
41 Nune ghamana afigetiri, uvu jojojoghe vovosusira ava,
reighi uvu a evetu genembo irae vasada uvu teria eni sumbari gusira.
42 Ainda beká mo, nunda saramana kato Abraham kena rea ari dae sise beka gagojusira ava kotise, amingusira.
43 Aindae sedo, nunda natofo gategusira ava nune unumbiri, ne yaru sise,
ivugaghae fumbu aruguse reighi Egypt dodo buvurutuseri.
44-45 Avori, nunda natofo nange nunda Agho Dari kotugo nu rea aoro dae sisira,
kaifa aetera ava kotise, nune oro mendeni da enda bu mutiri nene ruruseri.
A kotugo, nenda vareghae daba ghabuda bariseri.
Bajari dae sakai saore!