29
Bajari Da Beka Duka Mo, Borija Biria Barara Amingori.
1 Ne maveju maveju utuda ireva, nemokena resena: Bajari dae sakai sevu!
Nunda duró a fakinadae sakai sevu!
2 Bajari da Javo durode aindae sakai sevu!
God kakarago beká ai fururari garesa amo, nunda dombuda tumonde bainghevu!
3 Bajari da beka duka mo, evada sirurari ningarera.
God durode ainda beka mo, barara evakena fugari tatarigho ningarera.
4 Bajari da beka duka fakina a duroghaeimi sirurari ningarera.
5 Bajari da beka dukaimi ika saoro ava dari jorarira,
Lebanon da saoro barago nunda bekai dari jorarira.
6 Nunda bekaimi fugari, doriri Lebanon Frovensi aminda dadaragaruse,
borumakava mandiimi jorujorugharigo urureari,
Doriri Hermon mo, borumakava kandana seka bajariimi
vurari garira.
7 Bajari da beka dukaimi fugari, biria tarigharira.
8 Nunda bekaimi sari reighi evetu genembo a uvu iraeda vasa
dara gharira, kotugo reighi uvu bayau iraeda vasa Kadesh aminda dara gharira.
9 Bajari da beka dukaimi ari ika odemo ava jajovururari,
nunda igi dore vosarira.
Aminge ururari, natofo nunda kamboda irera aimi koko sise,
“Arie God Da Duro sirorerira evia, givu!” sarera.
10 Usegha gisi mo, Bajari nunda tofori.
Nune king edo, evovodae kaifa use irarira.
11 Bajari nunda natofokena fakina futuse, nunda
dubo jama aimi ne esimbugarira.