51
David Mema Use, God Nunda Ari Eko Kote Doyare Dae Benunu Sisira.
1 Arie, God, ninda dubo bari sifo ghousa ijugeraesa aindae sise, na joka aetesi!
Ninda joka ari tomanako aimi, nanda ari ekoko isasambu ghaje fugaetesi.
2 Nanda ari ekoko isambu seghaso, na eveva aone!
3 Nanda dara ava, na kasama erena.
Nanda ari ekoko ainda bouvu ava, sifo evia inono, na itatamuse irá gheraena.
4 Na nimokena ari eko useni, nisuka ninda dombuda ari eko eteno gido, aindae ni nandae “eko” sisesi.
Ava sedo, namo ijujeresa amo, evevada eresa.
à kotugo, nanda dara da bouvu ava fumbono dae resesa amo, geka bekári.
5 Na sirorusena amo, ari eko jokáda siroredo refena.
O saone, na aya tambuno ambo tafusegusira ai tano ghedo, na ari eko jokáda siroredo refena.
6 Ni geka beká sari ã ari beká ari ava uju eraesa.
Avori, ninda dubo kotari ava namokena mutaso sembudo, nanda dubo joká bedo are!
7 Nanda ari ekoko bu darigaso, na eveva aone!
Nanda ari ekoko seghe kosughe fugaso, na eveva aone, nanda asisi forosogo beká ava are!
Avata rofoma amo jo foyago beká iraeri.
O namo segharesa amo, nanda dubo joká foyago beká ava arira.
8 “Avori” saso, na sekago divu fuse, sino tavuya da duka nininguse, riria aone!
Ni nanda jebuga fati munjisesi, a kotugo, nanda fakina ava jighi bejisesi.
Avata sonembaso, na sekago dubo jama arena.
9 Ninda diti gajaetesi! Erá fuge, nanda ari ekoko geose!
A nanda ari ekoko isasambu ghaje fugaetesi!
10 Arie, God, nanda dubo aso, eveva ã kakara are.
à kotugo, asisi seka eni, ni tumonde gogoghombarira ava, nanda dubo jokáda fitaso irare.
11 Erá na dirigeóso, ni do buvu ya esike irione!
Ninda Asisi Kakara namokena erá bu dirigeóso yeure!
12 Ninda sonemba muteaso, namane ivuga eraera. Ainda ivuga ava, sekago mutaso itatamaone!
à kotugo, na nange ninda geka ningido, sekago ava ari uju arena ava kotise,
ni sonembaso dae resena.
13 Amingaresa amo, na ninda agho dari ari ekoko embokena ijugaono kasama use, ne dubo jovereghari, foa ni tambarera.
14 Arie, God, na genembo deteno ororo gutusira ainda bouvu ava,
joka edo erá namokena muteose dae sise,
benunu resena.
Sonembaso, na jebuga irarena.
Aminguse, na ninda kavevera aindae,
ivugaghae osa sarena.
15 Bajari, sonembaso, na beka fainghedo, nindae sakai sarena.
16 Na joba nimokena mutaetena, avata ni joba amo jo uju ae eraesa.
Joba futuse dungeoro avirureari ni gido, jo ivuga ae eraesa.
17 O joba nane mutarena amo, na tumo darido,
nanda ari ekoko vujeguse, nanda asisi ninda ungoda fitarena.
Arie, God, evetu genembo namoá avaga tumo darido nimokena ya gheraera,
nenda asisi ava, ni jo imboe use ighagha ae aresa.
18 Arie, God, ututu Saion gido, veka eveva ururaso fakina barira.
Jerusalem da furu ava, sekago dighaso, namane gajari irarera.
19 Amingaso gido, joba nine mutoro dae sisesa ava mutarera.
Mutoro gido, ni ivuga aresa.
Amo, burumakava (bulls) ninda oltada fiti dungoro gido, ni ivuga aresa.