78
God Nunda Natofo Eveva Iroro Dae Sonembedo Ghusira, Avata Nunda Geka Imboe Edo Ghuseri.
1 Nanda evetu genembo dengoro javevu! Nanda ijuga erena evia ningido, bu jighi fetevu!
2 Na kotofuda dubo kotari ava sari dae erena. Aminguse, tuka sufurono geka jungarida anakora sirorusira,
ava se disugari dae arena.
3 Roera abuamane setero niningusera a kasama usera ava,
4 namondeda sasingukena jo jungae arera.
Namondeda imemesiri amboda sirorarera nemokena barago saoro ningarera.
Amo Bajari da fakina a roera rejua ava edo ghusira, kotugo nunda tano dombu eni dombu eni etero,
dudukughusera, ainda bino ava saoro ningarera.
5 Nunda evovo Israel embokena futusira, a nunda Agho Dari Jacob da imendi gamendikena futusira.
Amingedo, namondeda abua mane kena, nunda agho dari nanjogo nenda sasingukena ijugaoro dae sisira.
6 Ainda beká mo, imendi gamendi seka sirorarera ningi kasama edo, nenda sasingu sirorarera barago,
saoro kasama aeteri.
7 Emboro eminguse, némbarago nenda tumondari God kena fitaeteri.
Aminguse, God reava nemokena usira ava kote gosuse, evovodae nunda Agho Dari ava edo ghaeteri.
8 Ne jo nombuamane da ari ava ae aeteri. Nombuamane gogore use, geka bu fugari kakatori.
Ne God jo tumonde gogoghombae edo ghuseri, a nunda sari ava jo evovodae ae edo ghuseri.
9 Ephraim ondi nenda feva nunda gorobaghae bambudo, iseri.
Avata tataya sirorusira ainda sifoda, ne oju edo do sufuseri.
10 Ne God de dabade beka gagojusera, ava bejedo, nunda Agho Dari imboe use, jo kaifa ae useri.
11 Nu rea ava nemokena usira amo, kotae useri, a tano mendeni mendeni nemokena etiri gosusera,
ábarago ne kotae useri.
12 Nenda nombuamane gosero, vasa tevisa Soan aminda, amo reighi Egypt ainda jokáda,
nu tano mendeni mendeni etiri gosuseri.
13 Nune etiri, karaje sarige furu digharige fetetero, Israel embo sembera, betu sovenikena vivituseri.
14 Ijighae mo, emboro kasama aoro dae sedo, God foroga muteari,
giti irureari ne gosuse amboda amboda ya ghedo ghuseri.
A tumba ghousa mo, God avaraka buburaghae muteari, giti irureari, ne gosuse amboda amboda
ya ghedo ghuseri.
15 Reighi evetu genembo a uvu irae vasa aminda nune setiri, ghamana sarigusira.
Sarigetiri, uvu duru bekáda ava fira vitiri riseri.
16 Nune etiri, uvu ghoghoro ava aroroda kirighe fira buvudo, uvu tomanako dukaghae sufusira.
17 Avata, ne God kena ari eko doyae tambuno edo ghuseri,
ne reighi uvu a evetu genembo irae vasa aminda God Ika Bekáda irá gheraira aikena, osogo edo ghuseri.
18 Ne avito sise, bayau mutari mindari dae sise, God dere gosuseri.
19 Ne God dae bauso use geka eminge siseri, “Reighi uvu a evetu genembo irae vasa eminda
God bayau mutari inonori, aĩ?
20 Geka bekári, nune ghamana de sarigetiri, uvu tomanako ava averege fira vovosusira.
Avata, nu oka bayaughae nunda evetu genembodae mutari inonori, aĩ, tefo?”
21 Ava ningido, Bajari dubo ekoko usira. Edo, nunda natofo mendeni setiri avarakai dungetiri ambubuduruseri.
Aminguse, nunda dubo ekoko nemokena baji tomanako beká usira.
22 Ai resira amo, nenda tumondari God kena tefori. Nu sari ne jebugaetera, ava ne jo tumondae edo ghuseri.
23 Avata, nu utu iká ominda kena setiri afigetiri
24 utuda farava da vuji futuse, mena mindoro dae sedo setiri vose firi riseri.
25 Ágido, ne anera da bayau ava riseri, a nanjogo mindari sisera, isambu God nune futusira.
26 Kotugo, nu etiri, yaura iji vitarikenaghe sufusira, a nunda fakinaimi etiri,
yaura beina doririkenaghe tuturo e sufusira.
27 A nunda evetu genembokena mo, rika mane da digari mo, inono kora da ghonesa aminga
ava mutiri vosefusira.
28 Rika mane du fafasusera amo, dobo itutugusera ainda soroda a demo damo isasambu
du birurughe fafasuseri.
29 Amingetiri, evetu genembo mindi tini babojusira.
God ne reju ava uju usera ava futusira.
30 Avata, nenda bayau da oduso, jo tukughae iriri, ne mokogo mokogo rero,
31 God nemokena dubo ekoko edo, nenda gegenembo fakina kakato,
amo Israel da gegenembo seseka gari garigo ava detiri amomonjeguseri.
32 God nu amingusira, avata, ne ari ekoko jo doyae, udo fuseri.
Aminguse, God tano nanjogo ututusira ava jo gi tumondae useri.
33 Ava sedo, ne iji nanjogo jebuga iraetera ava, God gafugetiri tufoko etiri ambubuduruseri.
Nenda jebuga irari da ghaeko ava dara a ojuimi gafugetiri, amomonjeguseri.
34 Sifo mendeni mendeni ne deari amomonjegedo ghusera ainda sifoda,
nenda mendeni dubo joveregheari, sekago God kena fa ghuseri. Aminguse,
ne sororaghae numokena vujeguse, benunu sedo ghuseri.
35 Sifo aminda, God mo nenda bere ava, a God fakina kato nemo sonembari jebugaoro dae sedo fusira,
ava sekago kotiseri.
36 Avata, nenda geka mo, isambu gungubori. Geka rea ava sedo ghusira amo, beká eni tefori.
37 Ne numokena jo dubo dabako aeri. Ne God de dabade beka gagojuse, rea ari dae sisera ava,
nene jo kaifa ae useri.
38 Avata, God nunda evetu genembokena joka edo ghusira. Nenda ari ekoko kote dotutuse,
jo dari amomonjegaeri. Sifo mendeni mendeni nu janje ekoko edo ghusira, avata, fati fetedo ghusira.
39 Nemo ambari embori, a kotugo ne taká yaura sumbu ya dadaberaira, amingo ava kotedo ghusira.
40 Sifo digari beká reighi uvu a evetu genembo irae vasa aminda numokena osogo edo ghuseri.
ifo digari beká ava urureoro, nu mema edo ghusira!
41 Sifo ghousa rea edo ghusera, ne ari daba ava use, God dere gido ghuseri.
Aminguse, Israel embo da God kakara aikena ghamo vevera bu foa ghedo ghuseri.
42 Nunda fakina teriago ava ne kotae useri. Ne nanjigo gitofu da ungoda saghimbe rurusira, ava ne jo kotaeri.
43 Nu nange enda tevisa Soan Egypt provensi aminda nunda fakina ijuguse, roera mendeni mendeni usira,
kotugo tano mendeni mendeni etiri dudukughusera, ábarago kotae edo ghuseri.
44 Nune etiri, uvu ororo jinisira. Etiri, Egypt embo uvu reda bu mindaetera ava buniseri.
45 Soini mutiri fera, nemokena buvu etero vevera teria beká itatama useri,
a gerakuimi nenda reighi bebeta usira.
46 A sisi mutiri fera, nenda bare baka mindi tefo useri.
Amingetero, bayau beká usira amo, jo digarigo sirorari bambudo mindaeri.
47 Nune nenda vaini da asi ava borija dombu eni aisi yaurago aimi detiri amomonjeguseri,
a nenda ika kayuyu barago ais (ice) imi etiri amomonjeguseri.
48 A nenda buramakau barago boriji aisi avavaga setena, aimi detiri amomonjeguseri,
a nenda sino fukamane mendeni biria barara aimi detiri amomonjeguseri.
49 Nu dubo eko beká ava usira nemokena. Aminguse, nunda janje eko nemokena bu fuse setiri,
nunda anera mane ambari budo fero, itatama useri.
50 Nu nemokena janje ekoko beká usira, ava jo jighi fetaeri.
Jo avori sari jebugae useri. Nu tauno eko mutiri, iri bambu sirivo useri.
51 Nu Egypt embo da ofo kambo daba daba da vide jamena bebego siroredo irara, ava detiri amomonjeguseri.
52 Inono sifi kaifa kato eraira aminga nunda evetu enembo unumbe bu buvurutusira.
Buvu, reighi uvu a evetu genembo irae vasa aminda tavo udo budo fusira.
53 Nune emboro ijuguse, eveva jebuga budo isira aindae, ne jo oju aeri.
Avata, nenda gitofu mo, evaimi viti fira, fatiri amomonjeguseri.
54 Ne budo, nunda enda kakara aminda, a doriri nune gitofukena isoro e rurusira aminda fira buvurutusira.
55 Nune setiri, evetu genembo aminda giti dighi iriara ava, nunda evetu genemboimi ondero buvutero,
ne era teteruseri. Nenda enda budo, Israel embo dae ghasedo, nenda ofo kambo barago
nunda natofodae futusira.
56 Avata, ne God Iká Beká aikena osogo bu fuseri. Aminguse, nu dere gosuse, nunda Agho Dari jo kaifa aeri.
57 Aminguse, ne osogo use, nombua mane nange edo ghusera aminga ava use, God da sari ava ighagha useri.
Ne rea sedo ghusera amo, goroba otombari amingori.
58 Ne eteni emboda tumondari ava eoro, nu dubo ekoko edo ghusira.
Ove kave ava tumondeoro gido, nu dubo eko beká ava edo ghusira.
59 God ava gosusira amo, nu dubo eko usira. Amingedo, nunda natofokena guka mutudo ghusira.
60 Nunda dobo reighi Sailo aminda namonde Israel embode dabade irá ghedo ghusira ava gukai futusira.
61 Nu ungo bebesugetiri, namondeda gitofui nunda fakina a usasa da tano,
amo Agho Dari da Mauva ava, nene ruruseri.
62 Nu nunda natofodae dubo ekoko usira. Amingedo,
ungo sokinembetiri, gitofui namonde dedo gaedo ghuseri.
63 Genembo gimasa seka bajari isambu isoroda de tefo useri. Etero, ade jamena mavekena vai ari?
64 Gitofui fristi mane de tefo useri. Amingedo, jo doyoro, nenda roriri sorara rovarova jo aeri.
65 Avori, Bajari kau genembo eni inono avise irara, erari da kaugo arira, o vaini da fakinaimi derari,
diti fangarira aminga ava nune usira.
66 Aminge eredo, nunda gitofu ondi detiri, tukughedo amboi iseri.
Ne de duboda fati fetetiri, nunda gitofo meka gosuse irá ghedo ghuseri.
67 Avata, nu Joseph da imendi gamendi gukai futusira. A Ephraim ondi mo, eni jo gatege baeri.
68 Ainda vasada mo, Judah ondi, a ututu Saion dubo bu gogoghombedo ghusira ava gatege rurusira.
69 Reighi aminda nunda Tafaroro Kambo inono nunda irari vasa utuda amingo ava itutusira.
Inono enda evovodae fakina e fetirira, aminga ava usira.
70-71 God da saramana kato, David, nunda sifi ekeroro jokáda kaifa use iriri, God nune David gategedo,
Israel embo da kini (king) a kotugo nenda sifi kaifa kato aminga ava are dae sisira.
72 Etiri, David natofo kaveveraimi unumbusira. Kaifa use, dubo kotise ne giti jighido ghusira.