79
God, Natofo Israel Embo Ava Nange Gitofukena Saghimbe Bu Darigaetira Ainda Banungariri.
1 Arie God, gitofu ni jo tumondae eraera aimi, ninda enda ava bari dae fera namanekena isoro useri.
Edo, nene ninda Kambo Kakarago ava bebeta edo, reighi Jerusalem ava basa eko beká jijighuseri.
2 Ne ninda natofo Israel embo ava dedo,
tamo rika riduna mane aimi mindoro dae dodo iseri.
Ninda saramana kakato da tamo ava taima sino fukaimi mindoro dae useri.
3 Ne ninda natofo Israel embo ava dive gafetero ororo vose gaunghusira.
Ororoimi reighi Jerusalem isambu yausa gaghari gusira. Kokomana bu furugari embo eniko jo fetaeri.
4 Oro mendeni God jo tumonde bainghae eraera tinguda iritirera aimi,
namanendae jijivu ekoko sesegeraera. Ne namanendae gegha jise,
ã kotugo namanedae makoede sise, dere jise gegha yaru eraera.
5 Arie Bajari, namanekena evovodae janje eko use iraresa, ai?
Ninda janje eko beká namanekena eraesa ava, nanjigo tukughari?
6 Namane dodo, oro mendeni ni jo tumonde bainghae eraera aikena janje eko aetesi.
Natofo nimokena jo tumonduse banungae eraera aikena, ninda dubo eko ava ijugaetesi.
7 Ai resira amo, nene ninda natofo Israel embo ava detero amomonjeguseri.
Ninda reighi teria ava, nene basa eko beká ava jijighuseri.
8 Erá avia abua da ari ekoko aindae sedo namanedae mema mutudo, ghamo baoro dae eose!
Oroko namanendae joka aetesi. Namanenda gigitari isasambu dadabetira.
9 Arie God, namane sonembuse, a kotugo namane gitofukena bu darige jebugaore!
Ninda binódae sedo, namane dara jokáda saghimbe ruruse, namanenda ari ekoko kote doyaso dae resena.
10 Redae oro mendeni mendeni namanekena eminge sareri,
“Nenda God da sonemba mo, redari?”
Ninda saramana kakato ava oro mendeni mendeniimi dive gafetero,
ororo yausa gaghari gusira aindae nine daso ghamo baoro dae resena.
11 Dibura embo aoro sise irera, ava ningaso dae resena.
Evetu genembo amboro dae setero diburada iritirera ava,
ninda fakina teriago aimi vujege, buvu jebugaore!
12 Arie Bajari, namanenda gitofu dengesida irá gheraera aikena,
ninda javoda jijivu ekoko sisera, ainda mino futuse, etoda mokogo mutaso, itatamudo yarera.
13 Amingaso, namane ninda totofo, ninda sifi (sheep) mane kaifa eraesa, nindae aiyakoe sise irarera.
A namane, namanenda sasingu, imemesiri gamemesiride nindae sakai sido yarera.