81
Kirumu Gaso Da Yaruri.
1 Namondeda sonemba kato God dae ivuga ghae fumbu arugaore!
Jacob da God dae sakai sise, yaru didivuse fumbu arugaore!
2 Foyago da ghasaghasa (tambourine) doruse, yaru tuturo edo divore!
A yaru ningari vivi ava gita dombu eni dombu eni aimi doruse divore!
3 Tambuno seka jorugharira ainda kirumudae, a tambuno vosiya tifughe jorughedo gharira,
ainda kirumudae barago tavuya fusevu!
4 Emo Israel embo da agho dariri. Geka emo Jacob da God kena ghe fusira.
5 Agho dari setena ava, Egypt embo dedo gaedo ghusira da sifo aminda Israel embodae futusira.
Genembo eni na jo kasama ae, geka eminge siri niningusena, amo eviri:
6 “Na ango bouvu nenda sagada ava bu fiteno vovosusira. Egypt aminda kanda fumbudo ghuseva barago, nane seteno fitevo vovosusira.
7 Ne dubo mema use, javono namoa gatetevo sonembuseni. Nanda junge irari vasa, biria barara jokáda irise,
nenda tumondari uvu Meribah dengesida dere gosuseni.
8 Nanda natofo, ningivu! Dombuda sari dae erena. Israel embo nanda geka ningaeteva, aindae uju erena.
9 Ne jo sifo nanjigo aminda oro eninda god tumonde bainghae areva.
10 Bajari God ne unumbe Egypt ghedo bu fusira amo, namori.
Ava sedo nenda beka fangevu, bayau mutono mindove!
11 Avata nanda natofo nanda geka jo ningae eraera. Israel embo nanda geka jo bae eraera.
12 Ava sedo na ungo bebesugeteno ghambura da irari ava use irá ghuseri, kotugo reju uju usera ava, edo ghuseri.
13 Nanda natofo nanda geka ningaetera aindae, uju erena. A Israel embo nanda geka baetera, aindae uju erena.
14 Amingaetera, na nenda gitofu totoigo de atai duboda fataeteni,
nenda isoro embo isambu barago de atai duboda fataeteni.
15 Mave na imboe eraera amo, ne ojuimi tumo taroroda sire nanda dombuda anosegaeteri.
Nenda dara eraera da mino mo, evovodae tafudo yaeteri.
16 Avata ne nanda natofori. Ava sedo, na farava evevago bekáimi undaeteni
a taimada finje firukago aimi undono, tini bajaetira.”