96
God Nu Kini (King) Tomanakogo Endada Evetu Genembo Isambu Kaifa E Tavo Ari Katori.
1 Arie, endada evetu genembo isambu! Bajari dae yaru seka saore!
Bajari kena yaru saore!
2 Bajari kena yaru sise, nunda javo jighoro erare!
Nune sonembetiri namonde jebugusera ainda binó ava, sifo evia inono vironu sedo ghaore!
3 Nu duroderi a nunda ari isambu fakinagori. Ainda binó ava oro isambukena vironu siruroro dudukughaore!
4 Airesira, Bajari numo teriagori, a kotugo sakai teriago mo nundae saore!
Ove keveraera aindae igheghi jo ae arera. Bajari nusuka nundae igheghi aore!
5 Ai resira amo, oro mendeni mendeni ne isambu god mendeni ava, tumonde baingheraera, fakina tefori.
O Bajari, numo utuda roera isambu nune ututusira.
6 Numo duró a usasa aimi doghedo irira, fakina tomanakogo a usasa garigo beká aimi
nunda tafaroro kambo beda edo irira.
7 Arie, endada evetu genembo nenda ghagurude isambu, Bajari da javo jighivu, erare!
Nunda duró a fakina tomanakogo aindae numokena sakai sise jighoro erare!
8 Bajari da javo durode ava jighoro erare! Ango fayaya bambu fuvu, nunda tafaroro vasada terove!
9 God kakarago beká ai fururari garesa amo, nunda dombuda tumonde bainghevu!
Endada evetu genembo isasambu, nemokena resena,
nunda dombuda igheghi ojughae tumonde bainghevu!
10 Endada oro oro isambukena saore,
“Bajari numo Kini (king) ri! Enda mo, nune fitiri susu gambu fetirira, jo itako gisighae arira.
Nu evetu genembo isasambu ava nenda ari ekoko a eveva eraera, aminda gosuse ijujarira.”
11 Utu endaghae nemokena resena, dubo eveva use, ivuga aovo dae resena.
Eva a eva da roera gindovi gandovi isambu, nemokena resena, duka aovo dae resena.
12 Vare a vare jokáda reju iritireva, nemokena resena, ririaghae koko sevu!
Ika mane taimada iritireva isambu, nemokena resena, ivugaimi fumbu arugevu!
13 Ai resira amo, Bajari endada evetu genembo ijujari dae refira.
Nu endada evetu genembo isasambukena inono use, ne bekáda bekáda ijujarira.