21
Diuda edi ḡalibona Manasa
1 Mba laḡannemo Manasa ena kwalabu ba 12 bi i wai ḡalibona bi Yelusalem i waibadaena ba kwalabu 55 a kovi. Bi tinana isana ba Ḡebsiba.
2 Bi Manasa Bada i laukasaḡaiḡaiye te lava mabai Keinan doḡanemo a miyamiya bi Bada i kwavivaidi, muliḡa kaka Islael lavedi a tava. Mba lavedi edi vaivai gebogebodi i kaikaiwatedi.
3 Bi anilaudune gabudi tamana i kaka gebogebodina i ḡala munaḡedi bi kota olta i voiyedi Bal anilauduneyena. Bi kai taditadina maimaituwa waivinina Asela aluwina i voiye, maibena wala Islael edi ḡalibona Aḡab. Bi kota Manasa kipola i laulauduneyedi.
4 Bada i giuna gado, Yelusalem ba tagu anilauduneyegu bi geḡa te tana, Bada ena vanuwa noponemo maimaituwa ḡesaudi edi olta gabudi i voiyedi.
5 Bi kota Bada ena vanuwa ganakukuna noponemo ani waiḡemota gabunemo olta labu i ḡaledi te kipola anilauduneyedi.
6 Manasa natuotina kaimo i lausewasewaye kota yabune bi ginauli kauwidi i voivoiyedi bi tauwaidoḡadibu bi alualuwa vaitedi a waigiugiu bi kalinedi i kaikaiwatedi. Tana gebogebo nananaki otidi i voivoiyedi aubaina te Bada i medi gulata.
10 Bi Bada, taugiuwatana lisidimo i giuna gado,
11 “Diuda edi ḡalibona Manasa gebogebo nananaka otidi i voiyedi mote mai Keinan lavedi. Bi lava i voiyedi te ena koikoitau a lauduneye bi gebogebo a voivoiyedi.
12 Taunana aubaina Bada Islael edi Maimaituwa i giuna gado, kauwa wainuwa nainailidi Diuda bi Yelusalem lisidimo yà voiyedi. Bi mba sauginemo mabai niga kauwidi wainuwa nainailidi sa vaiyedina ba sa naila.
13 Bi tagu Yelusalem lavedi yà kovoḡidi, maibena Sameliya bi lslael ḡalibonana Aḡab ena tubulelesa vaitedi e kovokovoḡidina. Tagu mainana yà voiye, maibena lava aboma ya koḡa bi ya waikabubutawana.
14 Bi egu lava miyamiya bagibagidi kauwa gebogebodi a voiyedi, taunana aubaina edi ḡaviya sa laukivigebogeyedi bi edi ḡonaḡona sa kwayavaidi.
15 “Tagu mainana yà voiyena banina egu lava a voiyegu te e medi, nove edi magumagula Idipmo a potipotiyovona sauginemo bi i saḡa te niganana.”
16 Manasa lava yabayababa i waipekidi bi Yelusalem taunina isuna te isuna kwasina i nawa yaḡosi. Bi kota Diuda lavedi nuwedi i wailausoludi te koikoitau a laulauduneyedi bi Bada matanemo gebogebo a voivoiye.
18 Manasa i peki bi tamana ena animiyamo belana daibina isana Usa noponemo a dobo. Bi natuna Amon i saḡa te tamana ena gabu i vai.
Diuda edi ḡalibona Amon
19 Mba sauginemo Diuda edi ḡalibona Amon ena kwalabu 22 bi tamana gabuna i vai. Bi tana Yelusalem i waibadaena kwalabu labu. Bi tinana Alus tana ba Mesulamet natuna bi Yobat lavana.
20 Amon Maimaituwa i laukasaḡaiḡaiye maibena tamana Manasa.
21 Bi Amon tamana pesina i vai bi ena vaivai i kaiwata bi koikoitau i laulauduneyedi.
22 Tana tamatamana edi Maimaituwa ena waiḡake i miya tautauliyedi.
23 Bi ḡalibona Amon ena waibabada ḡesaudi ai ogatala bi ena vanuwa noponemo ai peki.
24 Bi Diuda lavedi ḡesaudi a miya moito te ai ogatala bi Amon tauwaipekina ai pekidi bi natuna Dosaiya a sako saḡe te i waibada.