22
Diuda edi ḡalibona Dosaiya
1 Mba sauginemo Dosaiya ena kwalabu 8 bi tamana gabuna i vai te Diuda edi ḡalibona bi Yelusalem noponemo i waibadana ba kwalabu 31. Bi tinana ba Yedida bi Yedida tinana ba Adaiya tana ba Boskat lavana.
2 Dosaiya ena wai bada i visu Maimaituwa matanemo bi ena magula Deivida i voivoiyena mainana i voiye bi Maimaituwa ena waiḡake matabudi i kaikaiwatedi.
Dosaiya lava ḡesaudi i giuwedi te Bada ena vanuwa sa laivaliu. Bi laḡannemo a lailaivaliu ba Mousis ena waiḡake bukana a banavi bi a vai natome Dosaiya a vite.
11 Sauginemo waiḡake bukana a iyevi bi ḡalibona i vaivaiye ba nopona i kalati bi ena gala i lisi kamaḡe.
12 Bi Pilisi Ḡilkiya, Safet natuna Aḡikam, Mikaiya natuna Akbo, Safet ba ediya taugiluma bi Asiya ba ḡalibona taulaididimanina. Tana i giuna gado,
13 “Eda magumagula niga bukana bai i giugiuwena mote a kaiwata. Bi mote a giuweda te maso te kaiwata. Taunana aubaina Maimaituwa lisidemo i medi gulata. Ko nawa pali vanuwinemo te tagu bi Diuda lavedi matabuda aubaida Maimaituwa koi baḡa.”
Bi Dosaiya ena tauwaibada ḡesaudi i giukamaḡedi Bada taugiuwatana ḡemota lisinemo. Bi taugiuwatana waivinina, niga giuna i giukamaḡe munaḡe ḡalibona lisinemo.
16-17 “Bada niga mainana i giu, ‘Egu lava Diuda a dabokegu bi maimaituwa ḡesaudi lisidimo a laulausewasewa bi gebogebo ḡesaudi a voivoiyedi taunana aubaina lisidimo e medi gulata. E medina Yelusalem lisidimo mote aiyai kaka ima ka tautaugu, kamaina te ya tubuḡa.’ Niga mainana Maimaituwa i giu, ‘Tagu kaka Yelusalem lavedi matabudi yà kovoḡidi, maibena bukamo gilugilumimina ḡalibona i iyeiyevina mainana ya tubuḡa.’
18 Bi ko munaḡa te Diuda edi ḡalibona ko giuwena gado, ‘Bada Islael edi Maimaituwa niga mainana i giu: Tam buka gilugilumina wadubonemo kuna vaiye.
19 E giuna gado, niga dobuna kaka yà kovoḡi te ya pupu. Tam Maimaituwa matanemo kuna sako yovoḡem bi maḡabam em gala kuna lisi kamaḡe te dobu bi lava aubaidi kuna laukuvasa aubaina em pali e vaiye.
20 Taunana aubaina kovoḡa e giugiuwapayena ma miyammo mote ima tubuḡa bi ma nuwaubam kwa peki.” Kamaina bi waivini ena giu a vai a munaḡena ḡalibona lisinemo.