20
Iesu Gigiꞌaḡa Moneo Ḡadiniro
(Mataio 21:23-27, Mareko 11:27-33)
1 Mada ꞌahogano Iesuꞌa kuru neḡano Badiꞌa hari manoḡa haraminu zu vaze ihozinu. Eꞌe madaḡano Badiꞌa dibuꞌo hauꞌeteꞌe ḡihiꞌaḡaḡihiꞌaḡa, Mose goro ḡoeꞌa ihozeꞌeteꞌe azaḡa zu vaze boroboroꞌa ani vaḡe onamiro.
2 Ebu ze Iesu ḡadiniro, raena, “Eme efoꞌi, ḡa noꞌe gigiꞌaḡa hina haḡai eꞌe haḡaeꞌohe? Iniuꞌa ꞌahi gigiꞌaḡa ḡaniro?”
3 Iesuꞌa naenaeziro, raenaꞌa, “Eḡe zuni ḡadimu ꞌahoga zinihi.
4 Ioaneꞌa bapatizo haḡainutaꞌaꞌe Badiꞌa mazaonoꞌo ga vaze mazaonoꞌo? Ehoꞌi!”
5 Zeḡeꞌa zeḡe daꞌo neneḡaniro. “Badiꞌa mazaonoꞌo reine, 'Za nougadu Ioane ḡoere mene mae ḡihinido?' rae ifiꞌuma.
6 U vaze mazaonoꞌo reine, vaze niduꞌa hadi hina uḡue ruiꞌuma, mazaḡa zeḡe niduꞌa Ioane aniꞌe hube hune peroveta vazeḡa rae mae ḡihiniro.”
7 Eꞌanoꞌo ze naenaeninaꞌa, “Eme aḡuꞌa Ioane gigiꞌaꞌe noumanoꞌo meiro.”
8 Ebu Iesuꞌa zinaꞌa, “Eḡe zuni noꞌe gigiꞌa hina haḡai ꞌahi haḡaeteꞌe mene ihoziꞌuma.”
Hihi Azaḡa Sauꞌa Hari Idaidaḡa
(Mataio 21:33-46, Mareko 12:1-12)
9 Iesuꞌa vaze mazao hari ꞌahi idaniro. “Vaze ꞌahoganiꞌa vaini mebaḡa ḡoranadu hihi azaḡa nuꞌevora tiꞌenaꞌa, ꞌahige reiro. 'Hiriviꞌeteꞌe ḡauḡa nu eꞌa meꞌuma.' Ebu aniꞌa haba ꞌahoga onamadu mada faḡa ragavinu.
10 Vaini maḡa riꞌiꞌeteꞌe madaḡa reirotene, vaini maḡa nu mouga radu ani tuḡureḡa vazeḡa ꞌahoga hihi azaḡa eꞌe vaḡe tuḡune onamiro. Rehano zeꞌa bounadu ꞌevoꞌa isoḡa tuḡune baroniro.
11 Ani hena tuḡure vazeḡa ꞌahoga bare tuḡuniro, rehano ani zuni bouniro, mazagarone runiro zu ꞌevoꞌa isoḡa tuḡuniro.
12 Ebu ani tuḡure vazeḡa uḡiduḡa bare tuḡuniro, rehano eꞌe vazeḡaꞌe ruharo zu uhine baroniro.
13 Ḡonagano vaini mebaḡa vazeḡaniꞌa ꞌahige reiro. 'E nagini haḡaiꞌuma? Eḡe ubude zamarone tahiꞌaḡa tuḡuniꞌuma, giseha ze ani uꞌu gubaniꞌuma.' ꞌOugadu ani tuḡuniro.
14 Rehano hihi azaḡaniꞌa horonirotene, zeḡeꞌa neneḡaniro. 'Aniꞌe vaini mebaḡa ꞌadi meꞌuma vazeḡa! 'Aro matihi, ebu vaini mebaḡa ꞌadi emeḡeꞌa meꞌuma!'
15 Eꞌanoꞌo zeꞌa vaini mebaḡanonoꞌo ani uhine bunadu mau runiro. ꞌOugadu vaini mebaḡa vazeḡꞌe ze mazao nagini haḡaiꞌuma?
16 Ani onaadu hihi azaḡa eꞌe mau ruziꞌuma ebu vaini mebaḡaꞌe vaze nu ziniꞌuma.”
Vazeꞌa hari eꞌe igirotene, ze niro, raenaꞌa, “ꞌAhiguḡa mene fureraune manoḡa!”
17 Rehano Iesuꞌa ḡiazadu zinaꞌa, “ꞌOuge rouga idaḡa, rehano Buka Zaḡoḡa zamaḡano ꞌahige mirihiroteꞌe ḡoeꞌa hugaꞌe zamaroꞌi!
Vazeꞌa hadi hina ne ogorarotene, zeꞌa mene uratadu mae modiroteꞌe hadiḡaniꞌe, gauḡa boro hadiḡa raha.
18 Vaze ꞌahoga hadiḡa eꞌe rana higaune, ani vahegu tahitahiꞌuma, zu hadiḡa eꞌeꞌa vaze ꞌahoga rana higaune, aniꞌe seꞌetiꞌuma.”
19 Mose goro ḡoeꞌa ihozeꞌeteꞌe azaḡa zu Badiꞌa dibuꞌo hauꞌeteꞌe ḡihiꞌaḡaḡihiꞌaḡaꞌe Iesu hari idaidaḡa zeḡe veize reiroteꞌe ederirotene, zeꞌe Iesu zogone obone tihi reiro. Rehano ze mene ꞌougiro, mazaḡa vaze ḡuḡuvaḡaniꞌa ze mazao maḡuniꞌuma radu rihoziro.
Roma Kiniḡa Takesi Moniḡa
(Mataio 22:15-22, Mareko 12:13-17)
20 Mose goro ḡoeꞌa ihozeꞌeteꞌe azaḡa zu Badiꞌa dibuꞌo hauꞌeteꞌe ḡihiꞌaḡaḡihiꞌaḡaniꞌa Iesu faine ḡianiro. Zeꞌe uꞌuru gaueꞌenaꞌa duduḡa rae ḡurireꞌeteꞌe azaḡa madu Iesu mazao tuḡuziro, mazaḡa Iesu ani ḡau nu rae veꞌonine Roma gavana vazeḡa mazao utoga reiro.
21 Ebu ze Iesu vaḡe onamadu ḡadiniro, raenaꞌa, “Ihore vazeḡa, eme edeḡa ḡaꞌe huga daꞌo ḡoereꞌohe zu ihozeꞌohe. Ebu vaze boro zu komeꞌa idazeꞌohe, zu Badiꞌaꞌa urateꞌeteꞌe ibiḡa hugano daꞌo ihozeꞌohe.
22 Eꞌanoꞌo ꞌahi ḡadimatihi. Roma kiniḡa takesi moniḡa haune, idaḡa ga mene?”
23 Iesu ani zeꞌa ani soꞌoneꞌetaꞌaꞌe ederiro, ebu zinaꞌa,
24 “Roma moniḡa ihohoꞌi! Iniu viga zu iniu niḡa eꞌe rana touga?” Zeꞌa naenaeniro. “Aꞌe Roma kiniḡa viga zu niḡa.”
25 Ebu aniꞌa ziro. “Tena Roma kiniḡa ḡauꞌe Roma kiniḡa ane hanoꞌi, u Badiꞌa ḡauꞌe Badiꞌa ane hanoꞌi!”
26 Eꞌanoꞌo ze vazevaze ubumao Iesuꞌa reiroteꞌe ḡoeꞌaꞌe veꞌoga raꞌeteꞌe mene idararo. Ebu Iesuꞌa ḡadimuze naenaeniroteꞌano ze zaguzagadu sifu radiro.
Runeonoꞌo Iḡuneꞌeteꞌe moneo Ḡoeꞌa
(Mataio 22:23-33, Mareko 12:18-27)
27 Eꞌe ḡarugano Sadukea azaḡa nuꞌa Iesu vaḡe ariro. Sadukea azaḡaꞌe vazeꞌa runeonoꞌo mene bare ḡabode iḡuniꞌuma rae reiro.
28 Ze Iesu ḡadiniro, raenaꞌa, “Ihore vazeḡa, Moseꞌa goro ḡoeꞌa ꞌahige mirihiro. 'Ohoze ꞌahoganiꞌa rudanadu ane inugaꞌe eneḡa ꞌoꞌoꞌa reine, ohoze negoḡaniꞌa ḡozobaḡa teite hahuradu ani rune negoḡa niḡa mouga veize ene fureno haꞌuma.
29 Negoḡa niduꞌa 7 radiudo. Ibiꞌaniꞌa hahuriro ebu ubuga oꞌoꞌano rudaro.
30 Negoḡa ꞌaheuḡaniꞌa ḡozobaḡa teite hahuriro, rehano ani zuni ubuga oꞌoꞌano rudaro. Ebu negoḡa uḡiduḡa zuni ani teite hahuriro, rehano haḡai idaḡaniꞌa fureraro.
31 Ebu negoḡa niduꞌa 7 ḡozoba teite hahuriro, rehano niduꞌa rudau hauḡadu, ubudeze ꞌoꞌoꞌa reiro.
32 Hena vesuꞌu ḡozoba zuni rudaro.
33 ꞌOugadu runeonoꞌo bare iguniꞌuma madaḡano roḡae aꞌe iniu inuga reꞌuma? Mazaḡa ohoze 7 ani teite hahuriro.”
34 Iesuꞌa naenaeziro, raenaꞌa, “Hahuꞌe raha azaḡa ꞌadi veize raꞌohe.
35 Rehano runeonoꞌo bare iḡunadu Badiꞌa habao radoga idaḡa raꞌeteꞌe azaḡaꞌe mene hahuriꞌuma.
36 Ebu ze mene bare rudaꞌuma, mazaḡa zeꞌe tuḡure viga heuḡa. Zeꞌe runeonoꞌo iḡuniroteꞌe azaḡa uꞌano, Badiꞌa ubuga raꞌohe.
37 Runeonoꞌo bare iḡuniꞌuma moneo, Moseꞌa zuni Buka Zaḡoḡa zamaḡano mirihiro. Ani butu zamaḡano Badiꞌa hidirotene, ꞌahige huniro, raenaꞌa, 'Aberahamo Badiꞌa, Isako Badiꞌa zu Iakobo Badiꞌa!' Mazaḡa ze amahi rudaro rehano, ze vineꞌe ḡabodeꞌenaꞌa Badiꞌaꞌe zeḡe Badiꞌa rae reiro.
38 Badiꞌaꞌe mene rune azaḡa Badiꞌa, rehano ḡabone azaḡa Badiꞌa. Zeḡe niduꞌa ani ubumaoꞌe ḡaboḡa.”
39 Ebu Mose goro ḡoeꞌa ihozeꞌeteꞌe azaḡa nuꞌa naenaeniro. “Ihore vazeḡa, ḡa faifaine raha!”
40 Eꞌe enogano ze Iesu inare ḡadineꞌeteꞌe mene bare haḡairo.
Kerisoꞌe Iniu Mariga?
(Mataio 22:41-46, Mareko 12:35-37)
41 Ebu Iesuꞌa ziro, raenaꞌa, “Nougadu vazeꞌa Kerisoꞌe Davida mariga raꞌohe?
42 Davida aneꞌa Keriso moneo Salamo bukaḡano ꞌahige mirihiro.
'Badiꞌaꞌa eḡe Zuhiꞌa Keriso niro, raenaꞌa,
“Eḡe edaꞌe moneo ehoroꞌi,
43 onamo eḡeꞌa agireḡo niduꞌa madu odaḡo ꞌuꞌuḡano tiꞌuma.”
44 Davidaꞌa Keriso mazao 'Zuhiꞌa' rae huniro. Eꞌanoꞌo Kerisoꞌe Davida mene mariga raꞌohe.”
Mose Goro Ḡoeꞌa Ihozeꞌeteꞌe Azaḡa Ḡianoꞌi
(Mataio 23:1-36, Mareko 12:38-40, Luka 11:37-54)
45 Vaze niduꞌa abitiroteꞌe zamaḡano, Iesuꞌa ane tahiꞌatahiꞌa ziro, raenaꞌa,
46 “Mose goro ḡoeꞌa ihozeꞌeteꞌe azaḡa faine ḡiazoꞌi! Ze niguzoga raduni, dabua faḡa haḡadu oname onaihi, ebu vazevazeꞌa ne hunio hidine, 'Vaze boro,' rae gubaze ḡorezihi raꞌohe. Nuꞌonuꞌo neḡa zamaḡano vaze boroboroꞌa ehoreꞌeteꞌe habaꞌano ehorihi raꞌohe, zu muio zuni ehoro habaꞌa manoḡano daꞌo ehorihi raꞌohe.
47 Ebu zeꞌe ḡozoba soꞌozadu toheze niduꞌa meizeꞌohe, zu kuru faḡafe ḡurire kurauꞌohe. Eꞌanoꞌo zeḡe haḡai sauꞌa uꞌano, aduga boro bagaḡa hidiꞌuma.