21
Ḡozobaꞌa Ḡahunaniroteꞌe Moniḡa
(Mareko 12:41-44)
1 Iesu ani kuru neḡano maꞌora azaḡaniꞌa Badiꞌa ḡahunaniꞌeteꞌe moni mauḡaḡano zeḡe ḡahunone ufiꞌeteꞌe horoziro.
2 U ani zahara ḡozobaḡa ꞌahoga zuni moni komeꞌa ꞌaheu ofoga horoniro.
3 Ebu ane tahiꞌatahiꞌa ziro, raenaꞌa, “E hube hune ziꞌohe, Zahara ḡozobaḡa ꞌadaꞌa ofataꞌe vaze ꞌahoga ꞌahoganiꞌa ofateꞌe teite mene idaḡa. Ḡozobaꞌe boro hune ofeha.
4 Maꞌora azaḡaniꞌa zeḡe moni ḡehaḡaonoꞌo tahiḡa daꞌo ofeha. U ḡozoba ꞌadiꞌe zahara roḡaeḡa, rehano ane mazao radiꞌuꞌeteꞌe moniḡa niduꞌa ofeha.”
Mada Ḡonaganoꞌe Haḡai nu Badeḡa
(Mataio 24:3-14, Mareko 13:3-13)
5 Iesu tahiꞌatahiꞌa nuꞌa kuru neḡa hadi manoḡa hina ogoraroteꞌe zu Badiꞌa haroteꞌe rohorohoḡa biri ragano tiroteꞌe ḡoꞌaniro. Rehano Iesuꞌa ziro, raenaꞌa,
6 “Izidi zaeꞌa horoneꞌeteꞌe ḡauḡa eꞌe niduꞌaꞌe agire azaḡaniꞌa ruine hune hauḡiꞌuma. Madaḡaniꞌa onaine hadi ꞌahoga ani ranano mene radiꞌuma.”
7 ꞌOugadu ze Iesu ḡadiniro, raenaꞌa, “Ihore vazeḡa, ꞌahi ḡauḡaꞌe naniꞌa fureraꞌuma? Eꞌe haḡaiḡa niduꞌa fureraꞌuma madaḡano, nagi haḡai nu badeḡaniꞌa ibite fureraꞌuma?”
8 Aniꞌa naenaeziro. “Ḡianoꞌi, vazeꞌa tutuze veꞌoziꞌuma! Zeꞌe eḡe ni radu onaiꞌuma, zu ꞌahige reꞌuma, raenaꞌa, 'Eꞌe Keriso,' ebu 'Madaḡa ꞌai haniteha!' Rehano ḡoereze ago egoꞌi!
9 Uti zu agato hariḡa egoꞌidene, ago rihanoꞌi! ꞌAhi ḡauḡaꞌe ibite fureraꞌuma, rehano mada ḡonagaꞌe zogone mene ariꞌuma.”
10 Ebu hena ani ziro, raenaꞌa, “Habaꞌa ꞌahoganiꞌa habaꞌa ꞌahoga teite utitiꞌuma, zu gavamani ꞌahoganiꞌa gavamani ꞌahoga teite utitiꞌuma.
11 Haba nunu zamaḡano habaꞌa hagareꞌeteꞌe boroꞌa fureraꞌuma, zagaꞌa hiaꞌuma zu ugi boroꞌa fureraꞌuma. Ebu adureonoꞌo riho ḡauḡa zu haḡai nu badeḡa boroboroꞌa fureraꞌuma.
12 Rehano ꞌahi ḡauḡa ize mene fureranogano, vazeꞌa za oboze teadu sausauziꞌuma, zu nuꞌonuꞌo neḡano zu ḡuꞌa neḡano ohoze tiꞌuma. Eḡe uꞌano, kini zu gavana azaḡa mazao riꞌiziꞌuma.
13 Eꞌeꞌa fureraune, zaeꞌa zeḡe mazao eḡe hari rouga madaḡa reꞌuma.
14 Zae moneo nagini ḡoeꞌa reꞌuma rae ago ibite zamare borofoꞌi!
15 Mazaḡa zaꞌa nagini reꞌuma ḡoeꞌaꞌe eḡeꞌa huhuzaziꞌuma, eꞌanoꞌo agireze ꞌahoganiꞌa zuni mene agatoziꞌuma.
16 Zae vize moze, negoze, nabudize zu vazezeꞌa revoziniꞌuma ebu za nuꞌe runeo tuḡuziꞌuma.
17 Zaꞌe eḡe hegoteꞌeteꞌe ꞌuꞌano vaze niduꞌaniꞌa heꞌeheꞌeziꞌuma.
18 Rehano iguze zuni hube hune mene ruiziꞌuma.
19 Zaeꞌa edau gigaraune zaꞌe ḡabone tuḡutuḡu hidiꞌuma.
Ierusalema Habaꞌa Ruiniꞌuma
(Mataio 24:15-21, Mareko 13:14-19)
20 Ierusalema habaꞌaꞌe uti azaḡaniꞌa ganaḡeḡanoga horonoꞌidene, aꞌe Ierusalema habaꞌa ruiniꞌuma madaḡa ꞌai haniteha rae ederiꞌuma.
21 Eꞌe madaḡano Iudea habaꞌano radiuꞌeteꞌe azaḡaꞌe haba maḡa ferau itoꞌi! Ierusalema habaꞌa zamaḡano radiuꞌeteꞌe azaḡaꞌe ferau vaḡinoꞌi! Ierusalema habaꞌa enogano radiuꞌeteꞌe azaḡaꞌe Ierusalema habaꞌa ago diuḡoꞌi!
22 Mazaḡa eꞌe madaḡano Badiꞌaꞌa Ierusalema azaḡa aduga hune ziniꞌuma. Ebu Buka Zaḡoḡano peroveta azaḡaniꞌa mirihiroteꞌe ḡauḡa niduꞌa hudaꞌuma.
23 Eꞌe madaḡano ahiꞌeta roḡaeḡa zu nune hina ene guraḡa ḡubuzeꞌeteꞌe roḡaeḡa, zeꞌe fase vetuḡaḡa, feranoga mene idaḡa uꞌano, aduga hidiꞌuma. Raha ꞌahiꞌe aduga boro bagaḡa hidiꞌuma ebu Badiꞌaꞌa vaze mazao maḡuno ziniꞌuma.
24 Ze nuꞌe venisi hina ḡouze ruziꞌuma, ebu nuꞌe oboze teadu, ḡuꞌa azaḡa teige, ꞌavoꞌa habaꞌa nunuo tutuze onamiꞌuma. Iuda mene azaḡaniꞌa Ierusalema habaꞌa sausaune radiꞌuma onamo zeḡe madaꞌa hauḡiꞌuma.
Iesuꞌa Onaiteꞌe Madaḡa
(Mataio 24:29-31, Mareko 13:24-27)
25 Mada, bato zu buzuva ragano haḡai nu badeḡa horoniꞌuma. Ebu raha ꞌada haba nunu zamaḡano, davara zu saꞌu boroboro guguḡa uꞌano vaze niduꞌa rihau rudaꞌuma ebu zamazeꞌa adaꞌadiꞌuma.
26 Vazeꞌa nagini rahao ada fureraꞌuma rae zamareꞌenaꞌa rihau rudanadu higau bauriꞌuma, mazaḡa adure ḡianeteꞌe gigiꞌaḡaniꞌaꞌe hagahagariꞌuma.
27 Ebu eꞌe madaḡano eḡe, Vaze Ubuganiꞌa ḡoze zamaḡano gigiꞌa inaraḡa boro zuni agaḡa manoḡa madu ovaiꞌuma. Ebu vazevazeꞌa eꞌe horoniꞌuma.
28 ꞌAhi ḡauḡaniꞌa ḡadahe fureranoꞌidene, iḡunadu dude ehamanoꞌi, mazaḡa Badiꞌaꞌa zae ḡaboziꞌuma madaḡa ꞌai haniteha.”
Figi Ireḡa Hari Idaidaḡa
(Mataio 24:32-35, Mareko 13:28-31)
29 Ebu Iesuꞌa hari ꞌahoga idaniro, raenaꞌa, “Figi ireḡa zu ire niduꞌa ḡianoꞌi!
30 Rouḡaniꞌa udufaꞌoga horonoꞌidene, aꞌe irugu madaḡa haniteha rae edereꞌohe.
31 Eꞌe teige, ꞌahiguḡaniꞌa fureranoga horonoꞌidene, aꞌe Badiꞌaꞌa ibitohauꞌeteꞌe habaꞌa haniteha rae ederoꞌi!
32 E hube hune ziꞌohe, izidi radiuꞌeteꞌe azaḡaꞌe mene hauḡiꞌuma onamo ꞌahiguḡaguḡaniꞌa fureraꞌuma.
33 Adure zu rahaꞌe hauḡiꞌuma, rehano eḡe ḡoereꞌe mene hauḡiꞌuma.
Ruhibe Radoꞌi
34 Tohutohe radoꞌi! Za mene ꞌougine, reꞌoreꞌeteꞌe, gageꞌeteꞌe zu ḡaboneze zamare borofeꞌeteꞌe uꞌano, zamazeꞌe adudaꞌuma. Ebu eḡeꞌa bare onaeꞌeteꞌe madaḡanoꞌe zaguzagaꞌuma, mazaḡa eꞌe ꞌahiri miniḡaniꞌa mani zu aba tabara ꞌahiriniꞌeteꞌe teigiꞌuma.
35 Raha ꞌadi azaḡa niduꞌa eꞌe madaḡa hidiꞌuma.
36 Eꞌanoꞌo aduganiꞌa fureraune, ferauꞌeteꞌe zu eḡe, Vaze Ubuga zamao edauꞌeteꞌe veize, mada niduꞌa kurauꞌenaꞌa tohutohe radoꞌi!”
37 Mada niduꞌa Iesu ani kuru neḡano ihozinu, u ohere niduꞌaꞌe vaḡinadu Olive maḡa onamadu eꞌea radiunu.
38 Ebu oherebau uzeuze vaze niduꞌa Iesu ḡoere abitoga veize kuru neḡa onaminu.