5
Ananiasɩ kɔ Safila 'hʋɛn‑
1 Ɛ kɔ la nyɩbɛyu ꞊dʋ. 'A 'nyrɛ mɔ Ananiasɩ. 'A nʋgba a 'nyrɛ mɔ Safila. Ʋ nʋ‑ plo 'waa ‑ci ‑bɩ,
2 Ananiasɩ 'ɛ ꞊tu 'wliyɛ a 'kʋtɩɔ ‑bɩ bʋ, 'ɛ gba 'a dɛ ‑bɩ ‑mʋ' ‑Yusu a ‑mɔnanyʋ* yɩ. 'A nʋgba yi꞊e nɩ, ‑ɛ mɔ, 'a nyɩbɩʋ ꞊tu 'wliyɛ a 'mʋ, 'a 'kʋtɩɔ ‑bɩ bʋ.
3 ‑Tɛ Ananiasɩ a 'mʋ, ɛ nyre 'kɩ 'ʋ, ‑ɛ ‑bɩ Piɛlɩ wɛn: «Ananiasɩ, dɛ‑ kɔ ‑tɩ ꞊nɩ ‑ha 'kuo ‑hʋɩn* a nyiblo gbagbʋ Satan mɛ lɛ, 'ɛ kɔɔ ‑mʋ win kɩ, 'ɛ nu꞊o, ꞊nɩ ni hɩ, 'kɩ 'ʋ Nyɩsʋa a ‑Hihiu* ye', ‑ɛ mɔ, 'aan ‑ci, a plo wɛn, 'a 'wliyɛ a pɛpɛ, nɔ‑ ‑bʋ 'lɩ? Kɛɛ, ꞊tu 'a 'kʋtɩɔ ‑bɩ bʋ.
4 'Tɩ‑ ꞊mʋ ‑ci a 'mʋ plo mɔ mu, ꞊bɩ ɛ 'yɩ ‑mɔ 'pa‑, ꞊yɩ꞊ɩ ‑kɔ? 'Bɩ ‑mɔ kɔ꞊ɔ ‑o. ‑Tɛ ‑plo꞊o, ‑mɔ kɔ 'a 'wliyɛ ‑wɛ. ꞊Bɩ ɛ 'yɩ꞊ɩ 'pa‑? Dɛ‑ nu꞊o, ꞊nɩ ‑yra꞊a, 'kɩ 'lɩ ‑na ꞊wlʋ kɩ, 'kɩ ‑bʋ nu hɩdʋ ‑bʋ 'lɩ? Ɛ 'yɩ ‑tonyibli 'pa‑, ꞊yɩ ꞊nʋ hɩ lɛ ‑nuu ‑nɩ, kɛɛ, Nyɩsʋa, ɛ nɔ‑ ‑nuu hɩ lɛ.»
5 ‑Tɛ Ananiasɩ 'wɩn wuntɔbʋ a 'mʋ, ti nɩ ‑do a ti 'yri, ‑ɛ ‑bɩ ɛ bi ꞊hlɔn, 'ɛ 'kʋ. Ɛ nu꞊o nɩ, nyibli a pɛpɛ ‑mʋ', ‑ʋ 'wɩn ‑tɩ a 'mʋ, ʋ bi hʋannʋ' dɩakɩ.
6 Gbloyɔ ‑mʋ', ‑ʋ nɩ 'ʋ, ʋ 'hɩnhɩan꞊a danʋ lɛ, 'ʋ gba꞊a, 'ʋ ‑ha 'ʋ꞊ʋ 'ʋ.
7 ‑Haawɩ nɩ ta bʋ ‑hi, ‑ɛ ‑bɩ Ananiasɩ a nʋgba nyre 'lɩ 'a 'bio 'nyɩ nɩ. Dɛ ‑bʋ, ‑ɛ mu 'lu ‑mɔ, ɛ 'yɩ 'ʋ꞊ʋ ꞊dedede 'hʋɩ ‑yii ‑nɩ.
8 ‑Ɛ ‑bɩ Piɛlɩ 'bɛti꞊e nɩ, ɛ wɛn: «꞊Bɩ sɛyɩ‑sɛyɩ, ‑tɛ a plo 'aan ‑ci, 'a 'wliyɛ a pɛpɛ, nɔ‑ ‑bʋ?» ‑Ɛ ‑bɩ ɛ wɛn: «Iin, 'wliyɛ a pɛpɛ, nɔ‑ ꞊nɩɔ.»
9 ‑Ɛ ‑bɩ Piɛlɩ wɛn 'nɩ de: «‑Bɩ' a ‑nu, ‑kɔ ‑na nyɩbɩʋ 'hʋɛn‑, 'a ‑yra hɩdʋ ‑bʋ, ‑ɛ di꞊e nu, a 'mʋ Nyɩsʋa a ‑Hihiu 'yi ꞊tɛ 'lɩ? 'Ye kɛ, nyibli, ‑ʋ ‑ha 'ʋ ‑na nyɩbɩʋ 'ʋ, ‑tɛ ɛ 'kʋ, 'kɩ ʋ nɩ 'ʋ ꞊hʋan.yɩ. ‑Na 'mumu, ‑di 'nɩ 'kʋ ‑wɛ, ʋ 'mʋ ‑mʋ ꞊tu mɔ gba.»
10 Ti nɩ ‑do a ti 'yri, ‑ɛ ‑bɩ ɛ bi ꞊hlɔn, 'kɩ 'ʋ Piɛlɩ a 'mumu 'yi ꞊hlɔn, 'ɛ 'kʋ, gbloyɔ ‑nɩ wɛn, 'ʋ ‑pa. Bʋ 'ye꞊e, ‑ɛ mɔ, nʋgba a 'mʋ, ɛ 'kʋ nɩ, ‑ɛ ‑bɩ ʋ gba꞊a nɩ, 'ʋ pʋ 'ʋ꞊ʋ 'a nyɩbɩʋ 'hʋɩ bʋ.
11 'Cʋɛ a nyibli a pɛpɛ, kɔ nyibli ‑bɩ ‑mʋ', ‑ʋ 'wɩn, ʋ bi hʋannʋ' dɩakɩ.
‑Yusu a ‑mɔnanyʋ* nu ꞊wlɩlɛkɛɛ‑tɛblɩ ‑hʋɔhʋɩ
12 ‑Yusu a ‑mɔnanyʋ ni ꞊wlɩlɛkɛɛ‑tɛblɩ ‑hʋɔhʋɩ, 'kɩ 'lɩ Nyɩsʋa a 'nyrɛ 'kwli. 'Kɩ ‑Yusu a nyibli a pɛpɛ 'kukue 'lɩ Nyɩsʋa a 'kagbaʋ a ‑yaa 'kwli lɛ, 'kɩ 'lɩ pʋpa ‑mʋ', ʋ dɛɛ Salomɔ a pʋpa.
13 Nyibli ‑mʋ', ‑ʋ 'yɩ ‑Yusu ꞊wlʋ yɩ ‑kuo ‑nɩ, ʋ yɩ pie la hʋannʋ, 'kɩ bʋ bi ꞊nʋ kɩ. Kɛɛ, kɛ‑ ɛ nɩ 'mʋ, 'ʋ 'bʋa la 'waa ‑tɩ 'yi dɩakɩ.
14 ‑Tonyibli ‑hʋɔhʋɩ, nʋgbɩ kɔ nyɩbɛpʋ, ʋ kuo Kʋkɔnyɔ ‑Yusu ꞊wlʋ yɩ, 'ʋ yɩ ‑Yusu a nyibli kɩ bi.
15 Nyibli gbɛ la 'waa 'hʋɩhrennyʋ, 'ʋ pɩɛ la 'ʋ ꞊nʋ 'safʋɩ kɔ kʋɛ 'hʋɛn‑ kɩ blɛ, 'kɩ 'lɩ 'hrii wlɔn lɛ, ‑ɛ di꞊e nu, ti ‑mʋ' ‑kɔ 'yri Piɛlɩ di 'ʋ ‑hii mɔ di, 'a ꞊gbɛtʋ 'bʋ 'yɩ ‑ʋ ‑bɩ lɛ ‑hrɛn, 'a ‑hikɔ dadʋ 'mʋ ꞊nʋ lɛ ‑hrɛn.
16 'Dɩɩ ‑mʋ', ‑ʋ ꞊glaa 'lɩ Jrusrɛ lɛ, nʋ‑ nyibli ‑hʋɛn 'lɩ klɛ, 'ʋ yɛ 'waa 'hʋɩhrennyʋ, kɔ nyibli ‑mʋ', 'kuo ‑hʋɩn* nɩ 'ʋ ke' lɛ, 'waa pɛpɛ a 'mʋ, 'waa 'kʋɛ 'ɛ yɩ ‑wɛ.
‑Tɛ ‑Juukʋɛ* a nyibli gbagbɩ ꞊tui la ‑Yusu a ‑mɔnanyʋ* ꞊hɩʋɛn
17 ‑Ɛ ‑bɩ Nyɩsʋa a ‑cɔhlʋnpinyʋ* a nyibli gbagbɩ, kɔ nyibli a pɛpɛ ‑mʋ', ‑ʋ nɩ 'ʋ꞊ʋ 'hʋɩ, ‑ʋ mɔ ꞊tumu ‑mʋ', ʋ dɛ Sadusɩ꞊tumu* a nyibli, ca 'yii 'lɩ ꞊nʋ nɩ, 'kɩ 'ʋ ‑tɛblɩ ‑mʋ', ‑Yusu a ‑mɔnanyʋ ni a ‑ta', 'ʋ ‑yra꞊a, 'kɩ bʋ nyra ꞊nʋ bʋ,
18 'ʋ klɔ ‑Yusu a ‑mɔnanyʋ a 'mʋ, 'ʋ pʋ ꞊nʋ ꞊jɩ'.
19 Kɛɛ, 'tɔ', 'kɩ Nyɩsʋa a lɛlenyɔ ꞊dʋ ‑ha 'ʋ ꞊jɩkayu a 'maji lɛ, 'ɛ 'hrɔɔ ꞊nʋ, 'ɛ lee ꞊nʋ, ɛ wɛn:
20 «Ba mu 'lɩ Nyɩsʋa a 'kagbaʋ a ‑yaa 'kwli, ‑ɛ di꞊e nu, 'klɔ yrayrʋ ‑mʋ', ‑Yusu ‑ya, a 'mʋ 'a ‑tɩ nyibli ‑lee ‑nɩ.»
21 ‑Tɩ ‑mʋ', Nyɩsʋa a lɛlenyɔ ‑hla, ‑Yusu a ‑mɔnanyʋ ꞊tuu 'ʋ ‑tɩ a 'mʋ nɩ. ‑Nyrajru', 'ʋ mu 'lɩ Nyɩsʋa a 'kagbaʋ a ‑yaa 'kwli, 'ʋ ‑tʋa nyibli a tɔɔlɛ.
‑Ɛ ‑bɩ Nyɩsʋa a ‑cɔhlʋnpinyʋ a nyiblo gbagbʋ, kɔ nyibli ‑mʋ', ‑ʋ nɩ 'ʋ꞊ʋ 'hʋɩ, ʋ nʋ‑ ‑mɔ ‑bɩ, ʋ 'kukue ‑Juukʋɛ a 'blʋgba a nyibli lɛ, 'kɩ 'ʋ 'waa ‑gbolugbo gbagbʋ a ‑ta'. ‑Tɛ ʋ 'kukue 'kɩ lɛ, ‑ɛ ‑bɩ ʋ lee Nyɩsʋa a 'kagbaʋ a 'yie꞊tunyʋ nɩ, ‑ɛ mɔ, bʋ bla ‑Yusu a ‑mɔnanyʋ, 'kɩ 'lɩ ꞊jɩkayu bʋ.
22 Kɛɛ, ‑tɛ ʋ nyre 'lɩ ꞊jɩkayu a 'mʋ bʋ, ʋ 'yɩ 'lɩ ꞊nʋ bʋ ‑yɛɛ ‑nɩ, 'ʋ ꞊hɩan ‑mɔ, 'ʋ ‑mu, 'ʋ lee ‑gbolugbo a nyibli, ʋ wɛn:
23 «‑Tɛ ‑a nyre 'lɩ, ꞊jɩkayu a 'maji 'sii yɩ, 'ɛ kɛ 'ʋ lɛ ‑tɛɛ, ꞊jɩkayu a 'yie꞊tunyʋ 'ʋ nɩ 'ʋ 'waa ‑tuo kɩ blɛ ‑tɛɛ, 'kɩ 'ʋ 'maji 'yri. Kɛɛ, ‑tɛ ‑a ‑ha 'ʋ 'maji lɛ, ‑a 'yɩ 'lɩ ꞊jɩklapi ꞊dʋ bʋ ‑yɛɛ ‑nɩ.»
24 Nyɩsʋa a 'kagbaʋ a 'yie꞊tunyʋ a nyiblo gbagbʋ, kɔ ‑cɔhlʋnpinyʋ gbagbɩ 'hʋɛn‑, ‑tɛ ʋ 'wɩn ‑tɩ a 'mʋ, ‑ɛ mɔ, ‑Yusu a ‑mɔnanyʋ bʋ 'yɩ 'lɩ ꞊jɩkayu bʋ ‑nɩ a ‑tɩ, dɛ bʋ di 'lu ‑mɔ lɛ ‑hie, kɔ, dɛ ‑bʋ, ‑ɛ di 'lu ‑mɔ mu, ʋ 'yɩ꞊ɩ ‑yi.
25 ‑Ɛ ‑bɩ ti nɩ ‑do a ti 'yri, nyiblo ꞊dʋ nyre 'ʋ nɩ, ɛ wɛn: «Ba 'ye kɛ, nyibli ‑mʋ', a pʋ ꞊jɩ', ‑tɛ ti nɛ ‑bʋ, 'kɩ ʋ nɩ 'lɩ Nyɩsʋa a 'kagbaʋ bʋ, 'ʋ tʋɛ nyibli.»
26 ‑Tɛ ʋ 'wɩn, ‑ɛ ‑bɩ Nyɩsʋa a 'kagbaʋ a 'yie꞊tunyʋ a nyiblo gbagbʋ, kɔ 'a nyibli 'hʋɛn‑, ʋ mu nɩ, 'ʋ ‑mɩa ‑Yusu a ‑mɔnanyʋ kle. Kɛɛ, ʋ 'yɩ 'lɩ꞊ɩ 'klɩke 'kwli ‑nuu ‑nɩ, ‑ɛ nu꞊o, ʋ yɩ pie nyibli a hʋannʋ, ʋ 'nɩ ꞊ha ꞊nʋ 'hɩ ‑mɔ lɛ pʋ, 'kɩ bʋ 'la ꞊nʋ a ‑tɩ.
27 ‑Tɛ ʋ ‑mɩa 'kɩ ꞊nʋ kle, ‑ɛ ‑bɩ 'kɩ ʋ gba 'lɩ ꞊nʋ ‑gbolugbo gbagbʋ yɩ, Nyɩsʋa a ‑cɔhlʋnpinyʋ a nyiblo gbagbʋ 'ɛ ‑tʋa 'waa lɛ'bɛtilɛ,
28 ɛ wɛn: «‑A lee mɔ 'a mʋ nɩ ‑tɛɛ, ‑ɛ mɔ, a 'nɩ 'lee 'lɩ ‑Yusu a ‑tɩ nyiblo ꞊dʋ. Ba 'ye kɛ dɛ, a ‑nu. 'Aan tɔɔlɛ kaa 'lɩ Jrusrɛdɩɔ a pɛpɛ nɩ, 'tɩ‑, 'a ‑hʋɛ ba pʋ ‑a mʋ ‑Yusu a 'kʋkʋ‑tɩ 'lu lɛ.»
29 Kɛɛ ‑ɛ ‑bɩ Piɛlɩ kɔ ‑Yusu a ‑mɔnanyʋ ‑bɩ 'hʋɛn‑, ʋ ꞊tu ꞊nʋ ꞊wɔn, ʋ wɛn: «Yɩ‑hɛnyiblo, ‑a blɛɛ yɩ, ‑ba ꞊tuu 'ʋ, ɛ nɔ‑ mɔ Nyɩsʋa, ɛ 'yɩ ‑tonyibli 'pa‑.
30 ‑Yusu ‑bʋ, a kɔɔ la 'ʋ tugbɛ 'yie, 'kɩ ɛ 'mʋ la 'kʋ a ‑tɩ, Nyɩsʋa ‑bʋ, ‑aan 'baɩnʋ dɛ la, nɔ‑ ‑ha 'lɩ꞊ɩ 'kʋkʋnyibli 'nyɩ, 'ɛ ‑ha꞊a 'klɔ,
31 'ɛ nu꞊o, ‑Yusu a 'mʋ 'ɛ mu 'ʋ꞊ʋ 'hʋɩ, 'kɩ 'lɩ yakɔ 'kwli, Nyɩsʋa a 'mʋ 'ɛ ‑nyi꞊e 'klɩ, 'kɩ bʋ mɔ 'luyɩnɩnyɔ kɔ Wanyɔ. Dɛ a 'mʋ, Nyɩsʋa nu꞊o nɩ, ‑ɛ di꞊e nu, ɛ 'mʋ Yisraɛkʋɛ 'klɩ ‑nyi, 'kɩ bʋ hie 'ʋ 'waa dɛ 'kuku bʋ, ʋ 'mʋ 'waa 'klɔ a pɛpɛ Nyɩsʋa ‑nyi, Nyɩsʋa 'mʋ 'waa ‑tɛblɩ 'kukui a pɛpɛ 'wʋwla ‑nɩ.
32 ‑Tɛblɩ a pɛpɛ, ‑ɛ mu 'lu ‑mɔ, ‑a 'ye꞊e nɩ, ꞊a hlɛ꞊ɛ, ‑a kɔ Nyɩsʋa a ‑Hihiu* 'hʋɛn‑. ‑Hihiu a 'mʋ, Nyɩsʋa yɩ ‑nyi꞊e nyibli ‑mʋ', ‑ʋ ꞊tui 'ʋ꞊ʋ 'ʋ.»
33 ‑Tɛ ‑gbolugbo a nyibli 'wɩn win a 'mʋ, ‑ɛ ‑bɩ ʋ bi yrʋ' lɛ dɩakɩ, ʋ wɛn, bʋ 'la ‑Yusu a ‑mɔnanyʋ.
34 Kɛɛ, 'kɩ 'lɩ ꞊nʋ 'nyɩ, ɛ kɔ Falisi꞊tumu* a nyiblo, 'ɛ nɩ 'ʋ. 'A 'nyrɛ mɔ Gamaliɛlɩ. Ɛ mɔ Nyɩsʋa a tetetɔɔnyɔ ꞊nɩɔ. Nyibli ꞊tui 'ʋ꞊ʋ nɩ dɩakɩ. Nɔ‑ 'du ye', 'kɩ 'lɩ ‑gbolugbo a nyibli 'nyɩ, 'ɛ lee nyibli, bʋ 'hrɔɔ ‑Yusu a ‑mɔnanyʋ, 'kɩ 'lɩ ti gbi 'kwli.
35 ‑Tɛ ʋ 'hrɔɔ 'kɩ ꞊nʋ, ‑ɛ ‑bɩ kɛ‑ ɛ pɩ ‑gbolugbo yɩ, ɛ wɛn: «Yisraɛkʋɛ, dɛ a di nyibli ‑bʋ ‑mɔ nu, ba ‑hie꞊e 'lu ‑mɔ lɛ ‑tɛɛ.»
36 Ɛ wɛn 'nɩ de: «‑Tɛ nyɩbɛyu ꞊dʋ 'hrɩ la, 'a ti 'yɛɛ kɩ bʋ nɩ hlʋɛ. Nyɩbɛyu a 'mʋ, 'a 'nyrɛ mɔ Tedasɩ. Ɛ wɛn 'nɩ, ɛ mɔ la nyiblo gbagbʋ ꞊nɩɔ, ‑tonyibli, ‑ʋ yɩ la꞊a ꞊wien lɛ kʋɛ, ʋ ‑wɛ 'lɩ nyibli a ‑hɔtrʋwɩ nɩ ‑hɛn nɩ. Kɛɛ, ‑tɛ nyiblo ꞊dʋ 'la la꞊a, ‑ɛ ‑bɩ nyibli a pɛpɛ, ‑ʋ yɩ la꞊a ꞊wien lɛ kʋɛ, ʋ ‑gbɛ ‑tɛblɩ 'nyɩ lɛ, ꞊tumu a 'mʋ 'ɛ ‑gbɛ lɛ.
37 ‑Tɛ Tedasɩ a dɛ ‑hi, ti ‑mʋ' ‑kɔ 'yri ʋ yɩ la 'ʋ nyibli 'ʋ ‑hree ‑nɩ, 'kɩ nyɩbɛyu ꞊dʋ 'hrɩ la de. 'A 'nyrɛ mɔ Judɩa. 'Kɩ ɛ kɔ 'lɩ Galileblʋgba 'kwli, 'ɛ nu꞊o, nyibli ‑hʋɔhʋɩ 'ʋ kʋɛ꞊ɛ ꞊wien. Kɛɛ, nyibli ꞊dʋ 'la la꞊a nɩ ‑wɛ, nyibli a pɛpɛ, ‑ʋ yɩ la꞊a ꞊wien lɛ kʋɛ, 'ʋ ‑gbɛ ‑tɛblɩ 'nyɩ lɛ.
38 'A ‑tɩ o, 'n yɩ 'a mʋ 'nɩ ‑lee ‑nɩ, nyibli ‑bʋ, ‑a pɩɩ ‑bati lɛ, a 'nɩ 'nuo 'lɩ ꞊nʋ ꞊dedede ꞊dʋ ‑mɔ. Kɛɛ, ba ‑ha ꞊nʋ mɛ lɛ, bʋ mu. 'Bʋ mɔ, 'waa nunu‑tɛblɩ kɔ 'waa tɔɔlɛ 'hʋɛn‑, 'bʋ mɔ ‑tonyibli a 'lulɛ‑hihie, ʋ di ‑wɛ bʋ.
39 Kɛɛ, 'bʋ mɔ Nyɩsʋa, ‑ɛ yɩ ꞊nʋ 'klɩ ‑nyi, ‑ɛ ‑bɩ a 'yɩ 'lɩ꞊ɩ 'lɩ ‑wɛ, ba ‑wɛ ꞊nʋ bʋ. 'Bʋ mɔ, 'ba yɩ ꞊nʋ yɩ nɩ ‑wɛn, ‑ɛ ‑bɩ Nyɩsʋa a ‑wɛn yɩ.»
‑Tɩ a 'mʋ, Gamaliɛlɩ ‑hla, ‑gbolugbo a nyibli wɛn꞊ɛ kɩ,
40 'ʋ da ‑Yusu a ‑mɔnanyʋ de, 'ʋ lee 'sɛyo, 'kɩ bʋ bii ꞊nʋ lɔkɔ. ‑Tɛ ʋ ‑wɛ 'waa bibie ‑mɔ, ‑ɛ ‑bɩ ʋ ‑nyi ꞊nʋ tete ‑bɩ de, ʋ wɛn: «A 'nɩ 'tɔɔ 'lɩ ‑Yusu a ‑tɩ de,» 'tɩ‑ 'ʋ tɛ ꞊nʋ bʋ.
41 ‑Tɛ ‑Yusu a ‑mɔnanyʋ, ʋ yɩ 'lɩ ‑gbolugbo a nyibli 'nyɩ nɩ ‑hʋɛn, ‑ɛ ‑bɩ ʋ ni dɔdʋ, ‑ɛ nu꞊o, Nyɩsʋa nu ꞊nʋ ꞊haandɛ ‑mɔ. ꞊Haandɛ a 'mʋ, nɔ‑ mɔ bʋ 'ye ꞊hɩʋɛn, 'kɩ 'ʋ ‑Yusu a ‑ta'.
42 'A ‑nɛ ‑nyrɔwɔ, 'kɩ 'lɩ Nyɩsʋa a 'kagbaʋ bʋ, ɛ kɔ, 'kɩ 'lɩ 'waa dɩɔnʋ a ‑tɛ, ʋ 'cibi 'ʋ, 'ʋ yɩ nyibli ‑lee ‑nɩ, ‑ɛ mɔ, ‑Yusu, nɔ‑ mɔ Wanyɔ ‑mʋ', Nyɩsʋa pʋ la lɛ, ɛ di la ya.