6
Ʋ ‑ha nyibli nɩ ꞊hlon'hʋɛn, ‑ʋ di ‑Yusu a ‑mɔnanyʋ* ‑hɛɛ ‑nɩ
1 Ti a 'mʋ 'yri, ‑ɛ ‑bɩ ‑Yusu a nyibli, ʋ yɩ bii klɛ. ‑Yusu a nyibli a 'mʋ, ʋ mɔ la ‑Juukʋɛ*. ‑Ʋ ‑bɩ pɩ Glɛkɩkʋɛwin. 'Kɩ ʋ kuu 'lɩ 'blʋgbɩ ‑bɩ kɩ, 'tɩ‑ 'ʋ di 'bli; 'waa dɛ ‑mʋ', ‑ʋ pɩ ‑Juukʋɛwin, ʋ nʋ‑ ‑mɔ ‑bɩ 'kɩ ʋ nɩ 'lɩ 'bli. Nyibli ‑mʋ', ‑ʋ pɩ Glɛkɩkʋɛwin, ʋ yɩ 'pʋplɛ wlɔn lɛ, 'kɩ 'ʋ 'waa 'bio ‑mʋ', ‑ʋ pɩ ‑Juukʋɛwin a nunuklɔ a ‑ta', ‑ɛ nu꞊o, ʋ wɛn 'nɩ, 'a ‑nɛ ‑nyrɔwɔ, nyibli 'bʋ yɩ didi‑tɛblɩ nɩ ꞊glɛ, ʋ 'nɩ ‑kɔ꞊ɔ 'lɩ 'waa ‑nɛ ‑tʋgbanʋgbɩ a dɛ ‑mɔ.
2 Ɛ nɔ‑ kɔ ‑tɩ ‑Yusu a ‑mɔnanyʋ nɩ ‑pu ꞊tu 'ʋ 'hʋɛn ‑mʋ', 'ʋ da ‑Yusu a nyibli a pɛpɛ, 'ʋ 'kukue ꞊nʋ lɛ, ʋ wɛn: «Ɛ 'yɩ 'ʋ lɛ ‑nɔɔ ‑nɩ, 'kɩ ‑a mʋ ‑bʋ, ‑ʋ mɔ ‑Yusu a ‑mɔnanyʋ, ‑ba di 'ʋ 'a ‑tɩ a ‑mɔlɛnɩna bʋ hie, ‑ba di didi‑tɛblɩ ꞊gla.
3 'A ‑tɩ, 'dɩayɩnʋ ‑na, ba ta 'lɩ 'a mʋ 'nyɩ lɛ, ba ‑ha 'lɩ nyibli nɩ ꞊hlon'hʋɛn, ‑ʋ kɔ ‑pli nyibli pɩ, 'waa 'klɔ a yɩnɩnɔ a ‑tɩ. Bʋ mɔ nyibli, Nyɩsʋa a ‑Hihiu* kɔɔ win kɩ pɛpɛ, 'tɩ‑ ‑ʋ kɔ ꞊tɔ. Nyiblidʋ a 'mʋ, nʋ‑ ‑a di didi‑tɛblɩ a ꞊gɩgla ‑nyi,
4 ‑a mʋ ‑mɔ ‑bɩ, ‑a 'mʋ ti kɔ, 'kɩ ‑ba da Nyɩsʋa, kɔ, 'kɩ ‑ba lee nɛ 'a ‑tɩ nyibli lɛ.»
5 ‑Tɩ a 'mʋ, ‑Yusu a nyibli pʋ 'ʋ bʋ, ɛ klɔɔ nyibli a pɛpɛ kɩ. Ɛ nɔ‑ nu꞊o, 'ʋ ta 'lɩ 'waa dɩɔnʋ 'nyɩ lɛ, 'ʋ ‑ha 'lɩ nyibli nɩ ꞊hlon'hʋɛn. Yɩ‑hɛnyiblo, ʋ ‑ha 'lɩ, ɛ nɔ‑ mɔ Etiɛnɩ. Ɛ kuo ‑Yusu ꞊wlʋ yɩ dɩakɩ, Nyɩsʋa a ‑Hihiu 'ɛ kɔɔ ꞊nɛ win kɩ pɛpɛ, ɛ kɔ, 'ʋ ‑ha 'lɩ Filipʋ kɔ Plʋkɔɔlʋ, kɔ Nikanɔlɩ, kɔ Timɔ, kɔ Pamɩnasɩ, kɔ Nikola, ‑ɛ kɔ 'lɩ Atiɔsɩdɩɔ 'kwli. Nikola a 'mʋ, ɛ 'yɩ la ‑Juukʋɛyu 'pa‑, kɛɛ, ɛ ‑hɛ ‑Juukʋɛyu.
6 ‑Tɛ ʋ wa ꞊nʋ 'nyrɛ, ‑ɛ ‑bɩ ʋ gba ꞊nʋ nɩ, 'ʋ tɔɔ ꞊nʋ ‑Yusu a ‑mɔnanyʋ yɩ, ‑mɔnanyʋ a 'mʋ, 'ʋ da Nyɩsʋa, 'kɩ 'ʋ 'waa ‑ta', 'ʋ pʋ ꞊nʋ dabʋɩ 'lu blɛ, ‑ɛ di꞊e nu, Nyɩsʋa 'mʋ ꞊nʋ ꞊haandɛ ‑mɔ nu.
7 Ti a 'mʋ 'yri, Nyɩsʋa a win 'hɛɛn bʋ, 'kɩ 'lɩ 'blʋgbɩ a pɛpɛ kɩ. Dɛ a 'mʋ, nɔ‑ nu꞊o, ‑Yusu a nyibli 'ʋ bii klɛ dɩakɩ, 'kɩ 'lɩ Jrusrɛdɩɔ 'kwli, kɔ Nyɩsʋa a ‑cɔhlʋnpinyʋ* ‑hʋɔhʋɩ 'ʋ kuo ‑Yusu ꞊wlʋ yɩ ‑wɛ.
‑Tɛ ʋ klɔ la Etiɛnɩ
8 Nyɩsʋa ni ꞊haandɛ gbagbʋ Etiɛnɩ ‑mɔ, kɔ, 'ɛ ‑nyi꞊e 'klɩ, 'kɩ bʋ nu ꞊wlɩlɛkɛɛ‑tɛblɩ gbagbɩ, 'kɩ 'lɩ dakɔ 'nyɩ.
9 ‑Nyrɔwɔ ꞊dʋ 'kwli, nyibli ꞊dʋ, nʋ‑ ‑di, 'ʋ ‑tʋa Etiɛnɩ a 'blini a lɛ꞊mʋmʋɔ. Nyibli a 'mʋ, 'waa dɛ ‑bɩ, ʋ yɩ 'kukue 'lɩ Nyɩsʋa a 'kayu ꞊dʋ blɛ. Nyiblidʋ a 'mʋ, ʋ dɛɛ ꞊nʋ bʋtɛ꞊koyo. 'Waa dɛ ‑bɩ ‑mʋ', ‑ʋ ya ꞊yɛ, 'kɩ ʋ ‑hɔn 'lɩ Silɛnɩdɩɔ kɔ Alɛsadridɩɔ 'kwli, 'kɩ ‑ʋ ‑bɩ ‑hɔn 'lɩ Silisiblʋgba kɔ Asiblʋgba 'kwli. Ʋ nʋ‑ kɔ Etiɛnɩ 'hʋɛn‑, ‑ʋ pɩ gblɛ.
10 Kɛɛ, ‑tɛ bʋ di 'a ꞊wɔn a ꞊tutuo nu, ʋ 'yɩ꞊ɩ ‑yi, ‑kɔtɩ ꞊tɔ ‑mʋ', Nyɩsʋa a ‑Hihiu* yɩ꞊ɩ ‑nyi, nɔ‑ kɔ 'kwli ɛ nɛɛ 'lɩ, 'ɛ yɩ hle.
11 Nyibli a 'mʋ, ‑ʋ ya ꞊yɛ, ʋ 'pɛɛ nyibli, 'ʋ lee ꞊nʋ, ‑ɛ mɔ: «Kɛ‑ ba pʋ nyibli yɩ: Etiɛnɩ ‑bʋ, ‑a 'wɩn nɩ, ‑ɛ mɔ, Nyɩsʋa kɔ 'a winwlɔn‑hanyɔ* Moise 'hʋɛn‑, nʋ‑ ɛ yɩ ‑tɩ 'hʋɩ lɛ ye'.»
12 Nɔ‑ ɛ kʋɛ yɩ, 'ʋ ꞊tutuo nyibli kɔ 'blʋgba a ye'nanyʋ, kɔ Nyɩsʋa a tetetɔɔnyʋ 'hʋɛn‑, 'ʋ 'yɩya 'ʋ Etiɛnɩ 'hʋɩ bʋ, 'ʋ klɔ꞊ɔ, 'ʋ gba 'lɩ꞊ɩ ‑Juukʋɛ* a ‑gbolugbo a nyibli yɩ, ‑ɛ di꞊e nu, ʋ 'mʋ꞊ʋ ‑bati lɛ ‑pʋʋ ‑nɩ,
13 'ʋ lee nyibli ‑bɩ, 'kɩ bʋ pʋ Etiɛnɩ hɩ kɩ, ʋ wɛn: «Nyiblo ‑bʋ, Nyɩsʋa a 'kagbaʋ kɔ tete ‑mʋ', Nyɩsʋa ‑nyi la 'a winwlɔn‑hanyɔ Moise, nʋ‑ ɛ hlɛ ‑tɩ 'hʋɩ lɛ. Nɔ‑ ɛ 'cibi 'ʋ, ɛ ni.
14 ‑A 'wɩn nɩ, ‑tɛ ɛ yɩ꞊ɩ nɩ hlɛ, ‑ɛ mɔ, Nasalɛtɩ a ‑Yusu ‑bʋ, ɛ di Nyɩsʋa a 'kagbaʋ 'nɩ 'wla, kɔ, ‑aan nunuklɔ, Moise tɔɔ la ‑aan 'baɩnʋ, ‑ba 'cɩcɩ꞊ɩ.»
15 Nyibli a pɛpɛ ‑mʋ', ‑ʋ nɩ 'lɩ ‑gbolugbokayu a 'mʋ bʋ, ʋ yɩ Etiɛnɩ 'nɩ 'ye yrʋʋ, 'ʋ yɩ꞊ɩ 'ye, ‑ɛ mɔ, 'a yigbakla 'wɩ‑ Nyɩsʋa a lɛlenyɔ a yigbakla yɩ.